Nia Gulim 5

Wɛ nia fuga kam

Nwoŋim 20:1-17

1Moses déem ma bwoŋi Isarele tiina bam se ba jeeri daane, ye o ta-ba o we:

“Isarele tiina bam, cheigi-na se Wɛ bera yam dedaane Wɛ nia yam mo tento a wora a tɛ de abam zem. Seene-na á yia se á ta‑á zamese-ya, se á daare á ta‑á ke á tɔge ya na bere tei to. 2Debam Tu Baŋa Wɛ mo déem gwoni ni dedaane debam Sinayi peo kom yuu ne. 3Ko dae dedaane de kwoa bam yerane mo o ke ni-gwonim dem de-ba. O déem ke-de dedaane debam balo ta na ŋwe zem tento to mo. 4Baŋa Wɛ tete déem ma zege mini dem wone o ŋɔɔne de abam jaja peo kom yuu ne. 5Maŋa kam konto ne, abam déem kɔre foone mo se á di peo kom yuu, mini dem na wora to ŋwaane. Amo maa zege abam de Baŋa Wɛ tetare laŋa ne, se a lwoni Wɛ taane dem a bere abam. Baŋa Wɛ déem tage o we:

6Amo mo ye abam Tu Baŋa Wɛ wom. Amo maa ye wolo na jaane abam a ja nwoŋi Ejipti teo kom ne ye a vere abam á kabɛɛne dem ne a yage to.

7Daa á yé zuli-na jwona á woli amo wone.

8Yé zaŋe-na á mɔ kamɔgɔ se ko taa ye jwoni ko pa abam. Á yé mɔ woŋo se ko lwoni wɛyuu wonnu, naa tega baŋa wonnu, naa tega kuri na wo wonnu. 9Abam ba jege se á tiiri te yiga ne naa á zuli-te. Kokuri to, amo mo ye abam Tu Baŋa Wɛ wom. Amo yi page abam baŋa ne mo. Ko ná ye balo na ve amo to, a yeini a waare-ba de ba bia maama se ko vo ko yi ba dwi dem kuni betɔ naa bena laŋa ne. 10Ko nam ná ye balo na swoi-ne ye ba sɛ a nia yam to, a maa yeini a jege ba swono taa, se ko yi ba dwi dem kuni moro laŋa ne.

11Á yé zaŋe á bwoŋi á Tu Baŋa Wɛ yere kafɛ ŋwaane, se Baŋa Wɛ wó waare wolo maama na ke konto to.

12Ta‑á yei-na se á pɔɔre Wɛ siu dɛ dem da yam maama wone á pa Wɛ. Baŋa Wɛ maŋe o pa abam o ni dem konto.#Nwoŋim 20:8-11 13Da yarepɛ maama wone, abam jege da yaredo mo se á ma‑á toŋe totoŋa dwi maama. 14Ko nam ná ye da yarepɛ dɛ dem, abam Tu Baŋa Wɛ pɔɔre-de mo o pa o tete, se de ta ye siu dɛ. Dento dɛ dem ne, nɔɔn-nɔɔno ba jege se o toŋe totoŋe. Ko maa ye abam, de á bia, de á bukwa, de á kabɛ, de á ka-nyaana maama mo bá taa toŋa. Ko woli da, abam nabɛ, de á bonɛ, dedaane á vara bam maama, de veira balo na zoore á teo wone to de bá taa toŋe totoŋa dɛ dem konto ne. Abam kabɛ sem de jege se ba tɔge ba sii mo dento dɛ dem ne, nenɛɛne abam na wó sii tei to. 15Guli-na we abam de déem ye kabɛ mo Ejipti ne. Abam Tu Baŋa Wɛ ma tɔge o dam baŋa ne o toŋe wo-kamunnu o ma vere abam á kabɛɛne dem ne o ja o nwoŋi. Konto ŋwaane mo o we á jege se á pɔɔre siu dɛ dem se de taa ye de yera.

16Ta‑á nege-na á kwoa de á niina. Abam Tu Baŋa Wɛ pɛ abam ni dem konto mo se ko pa á ta‑á jege momwɛ-dɛɛre. Á ŋwea maa wó ke lanyerane maŋa kalo á na wó ta‑á zoore tega kalo o na lage o pa abam to wone.

17Yé zaŋe-na á go nɔɔno.

18Yé ke-na kabwoŋa de nɔɔno wodwoŋi kaane.

19Yé ŋɔ-na kolokolo.

20Yé zaŋe-na á bore vwa bora á ma á vane á dwonna.

21Yé pa-na se á fera zo á dwonna kaana. Nam yé kwei-na á boboŋa á daŋe ba sam baŋa ne, naa ba tega baŋa ne, naa ba kabɛ, naa ba ka-nyaana baŋa ne. Ta yé pa-na se á yi su á dwonna nabɛ, naa ba bonɛ, naa woŋo kolo maama na ye ba nyem to.

22Isarele kɔgɔ kom maama déem na jeeri peo kom teiŋa ne to, mo Baŋa Wɛ ŋɔɔne de kwor-dɛa o pa debam o nia fuga kam konto. O ma zege mini dem de kunkwon-lilirru tem wone mo o ŋɔɔne o nia yam, ye kolokolo déem wo woli ya wone. O laam ma popone-ya o daŋe kandwa-pelɛ selei baŋa ne o kwei o pa-ne.

23Abam déem na nigi we kwora mo nwoŋi lim wone ka yi abam, ye peo kom de tɔre mini konto to, mo balo na ye yuu tiina de nakwa abam dwi maama wone to tu amo tei, 24ye ba we, ‘Debam Tu Baŋa Wɛ wom seene o bere debam o nenɔŋ-fɔrɔ kom dedaane o kamunni dem na tiini de daga tei to. Zem dɛ dento, dé nigi o kwora kam na nwoŋi mini wone ka yi debam tei to, ye dé lɔre we nabiinu wó wane o ni Baŋa Wɛ na ŋɔɔne ded‑o ye kotu wó ta wo o ŋwea wone. 25Debam nam ba lage se dé te! Debam Tu Baŋa Wɛ daa ta ná ŋɔɔne dedaane debam ye dé ni o kwora kam, min-fɔrɔ kom wó wane ko go debam. 26Wɔ mo wora nabiina maama wone o na wó wane o ni Ŋwea Tu Baŋa Wɛ kwora na nwoŋi mini wone ka ŋɔɔne ded‑o nenɛɛne dé zem na nigi-ka to, ye kotu ta ŋwe? 27Konto to, nmo nam tutwoni n twɛ debam Tu Baŋa Wɛ, se n cheigi kolo maama o na jege se o ta o bere debam to, se n laam ba n lwoni n bere debam, se dé wó sɛ o ni dem.’

28 Baŋa Wɛ déem ma ni abam na tage kolo to, ye o ta de amo o we, ‘Amo nigi nɔɔna bam na tage kolo maama ba bere‑m to. Ba na tage kolo to nam lamma! 29Amo ya lage se ba boboŋa ja se ba taa kɔre amo ye ba sɛ a nia yam maŋa maama.#Lei 81:13 Konto ya wó pa se banto ŋwea ke lanyerane ka pa-ba de ba kwaga kam se ko taa vei wuu. 30Véi n ta-ba se ba jwoori ba vwoa yam ne. 31Se ko ná ye nmo, nmo wó maŋe ywo-seeni mo se a bere‑m a ni dem maama. Ko ná ye a chullu tem de a bera yam maama, nmo wó lwoni n bere nɔɔna bam se ba taa tɔge-ya mo tega kalo a na lage a pa-ba se ba taa tei to wone.’

32Konto to, Isarele tiina bam, ta‑á yei-na se á ke á tɔge Baŋa Wɛ na pɛ abam ni se á ke to. Yé ywori-na o chwoŋa kam wone á vo jazem naa jagwia seeni. 33Ta‑á tɔge-na abam Tu Baŋa Wɛ wom na bere abam chwoŋa kalo se á da to. Konto wó pa se, á ná zo tega kalo o na lage o pa abam se á ta‑á tei to, á wó zo ka wone á dáane ye á ŋwea ke lanyerane.”

Currently Selected:

Nia Gulim 5: KBG

Highlight

Copy

Compare