Nia Gulim 4

Wɛ nia yam taane

1“Isarele dwi tiina bam, ta‑á cheigi-na Wɛ nia yalo amo na lage a bere abam zem tento to, dedaane o chullu tem maama. Á ná sɛ á tɔge-ya, ko wó pa se á wori ye á daare á zo á jwoŋi tega kalo á nabaara Baŋa Wɛ wom na lage o pa abam se á ta‑á tei to. 2Ta‑á yei-na se á yé woli kolokolo nia yalo a na lage a pa abam to wone, nam yé le-na kolokolo ya wone á yage. Za á ke-na á tɔge Baŋa Wɛ nia yalo maama a na wó pa abam tento to.

3Abam tete déem nɛ Baŋa Wɛ na ke tei Baal-Peora jei sem ne to. Á nɛ we o go abam wone balo maama na sɛ ba zuli Baal-Peora jwoni dem to mo. 4Ko daare ye abam balo maama na sale Baŋa Wɛ to daa ta ŋwe de zem maama.

5Nii-na! Amo kwei a Tu Baŋa Wɛ chullu tem de o nia yam a bere abam nenɛɛne o na pɛ-ne ni se a ke tei to. Abam jege se á sɛ á ta‑á tɔge-ya mo, nenɛɛne á ná zoore tega kalo á na wó jwoŋi á ta‑á tei to wone. 6Seene-na á yia á ta‑á sɛ-ya, se dwi-gɛ tiina wó lɔre we á jege swa de yi-poro lanyerane. Banto wó ba ba ni Wɛ chullu tem ye ba ta ba we, ‘Te-zɔŋɔ konto tiina seene ba jege yi-poro de swa dedɛ.’ 7Dwi-gɛ tiina wa yam ba bwola de-ba, ba teo kom ná maŋe ko ye te-fɔrɔ tei. Debam Tu Baŋa Wɛ nam tiini o bwola de debam ye o yeini o cheigi dé wɛ-lworo kom maŋa kalo maama dé na wó bwoŋi‑o to. 8Dwi-gɛ tiina tera ba na jege chullu dedaane bera yalo na tɔge chega nenɛɛne Wɛ nia yanto dwoŋi amo na wora a pae abam zem to.

9Nam ta‑á cho-na á tete. Ta‑á yei-na se á yé zaŋe á swei wo-kamunnu telo Wɛ na ke ye á yi na-te to. Abam ta ná wo á ŋwea wone, lwoni-na-te á bere á bia dedaane á naaro tem maama. 10Guli-na dɛ dem abam déem na wo Sinayi peo kom teiŋa ne ye á zege Baŋa Wɛ yiga ne to. Dento dɛ dem ne mo Baŋa Wɛ tage amo o we, ‘Moses, pa se nɔɔna bam la ba jeeri-ne se ba wane ba cheigi a kwora. Konto wó pa se ba taa kɔre amo maŋa kalo maama ba na jege ŋwea tega baŋa ne to, se ba daare ba bere ba bia se ba de taa zuli-ne.’#Nwoŋim 19:9-19

11Abam déem tu á zege peo kom teiŋa ne. Min-vogo ma zaŋe peo kom baŋa ne ko di wɛyuu. Kunkwon-lilirru ma kwoli jei sem maama pa ko ke lim. 12Baŋa Wɛ déem ma zege mini dem tetare ne o ŋɔɔne de abam. Abam ma ni o botare-bia bam ye á wo nɛ o nyenyego de fenfee de. O kwora kam yerane mo á niga. 13O déem pɛ se á lɔre ni-gwonim delo o na lage o ke de abam to. O ma pa abam ni se á sɛ á tɔge o Nia Fuga kam, ye o daare o popone-ya o tiŋi kandwa-pelɛ selei baŋa ne. 14Ka maŋa ne, mo Baŋa Wɛ déem pɛ-ne ni se a bere abam o chullu tem de o nia yam se á sɛ á ta‑á tɔge-ya, nenɛɛne á ná tu á bɛ Jɔdan buga kam ye á zoore tega kalo á na wó jwoŋi á ta‑á tei to wone.

Ko chula se ba taa kaane jwona

15Dɛ dem Baŋa Wɛ na zege mini dem wone o ŋɔɔne de abam Sinayi peo kom yuu ne to, á déem wo nɛ o nyenyego. Konto ŋwaane, ta‑á yei-na 16se á yé biini á tete se á mɔ nyenyego se ko ji jwoni ko pa abam. Ko ná maŋe ko ye baaro nyenyego, naa kaane nyenyego, 17naa tega baŋa varem, naa zuŋa kalo dwi maama na kare wɛɛne ka jaane to, 18naa tega-veilu, naa ywoni de, se á yé mɔ-na te nyenyego.#Nwoŋim 20:4 19Ko ta woli da, abam na kwoni á yuni á na wea kam, naa chana kam, naa chalechwe sem, naa wonnu telo maama na wo wɛyuu ne to, nam yé ke-na fera se á tiiri á zuli-te. Baŋa Wɛ yage-te wɛyuu ne logo baŋa dwi maama ŋwaane mo. 20Ko daare ko ná ye abam, á ye balo Baŋa Wɛ na le o ja nwoŋi min-vogo yaara dwoŋi ne to mo. O déem vere abam Ejipti tiina jeŋa ne se á ta‑á ye wonto tete nyɔn-mage nɔɔna mo. Á chega nam seene á ye konto mo de zem maama.

21Abam ŋwaane mo Baŋa Wɛ bane déem zaŋe de amo. O ma ta o du o we, amo bá da a bɛ Jɔdan buga kam se a zo te-ŋoŋa kalo o na lage o pa abam se á ta‑á tei to wone. 22Konto ŋwaane, amo jege se a maŋe ywo-seeni mo a te. A bá da a bɛ Jɔdan buga kam. Abam nam wó bɛ á zo á jwoŋi te-ŋoŋa kam konto á ta‑á tei. 23Nam tiini á ta‑á yei se á yé swei ni-gwonim delo á Tu Baŋa Wɛ wom na ke de abam to. Yé ke-na jwoni dwi delo maama nyenyego á zege se á zuli-ko, Baŋa Wɛ na chuli-ko to ŋwaane. 24Kolo ŋwaane, abam Tu Baŋa Wɛ yi page abam baŋa ne mo. O maa nye de min-fɔrɔ kolo na di wo-yɔɔro maama to mo.

25Abam ná tu á zo tega kam ye á jeini da á dáane, pa se á lo bia dedaane naaro dedɛ, se á yé biini á tete de á na ke jwoni nyenyego á zege se á ta‑á zuli tei to. Konto wó taa ye lwarem mo Baŋa Wɛ yiga ne ye ko pa se o bane zaŋe de abam. 26Zem dɛ dento ne a kwei wɛyuu kom de tega kam baŋa maama mo, se te taa ye maana abam de Baŋa Wɛ tetare ne. Abam ná ve Wɛ ni dento, se á dwi yɔɔre de jei tega kalo á na lage á bɛ Jɔdan buga kam á zo to baŋa ne. Abam ná zaŋe á zuli jwona, se á yé dáane te-ŋoŋa kam baŋa ne. Á wó na chɔgem mo. 27Baŋa Wɛ wó ja abam o jage o yage teene dem maama tetare ne. O ná zeili abam o yage teene delo wone, á lage á te mo se á nɔɔna bam fenfee yerane daare de wone. 28Abam ná zoore jei sem konto maama ne, á wó ta‑á zuli nabiina na kwei dɛ dedaane kandwa ba ma ba ke jwona yalo to mo. Yanto ware se ya nii ya na wonnu naa se ya ni kwori. Ya nam ware wodiu se ya di, ya maa ba ni lwom. 29Abam na wó ta‑á zoore teene delo maama ne to, nenɛɛne á ná boŋe se á jwoori á beeri á Tu Baŋa Wɛ jei, abam wó na‑o. Ko nam wó tɔge dedaane á ná seene á yia á beeri‑o dedaane á boboŋa maama de á wo maama mo. 30Abam ná tu á zo cham wone, pa se wonnu tento maama yi abam, ko kwaga ne á laam wó pipiri á jwoori á Tu Baŋa Wɛ wom tei, se á sɛ o ni. 31Kolo ŋwaane, Baŋa Wɛ tiini o jege abam yibwona. O bá fɔge o de abam o yage. O nam bá chɔge abam. O bá swei ni delo o déem na gwoni dedaane abam nabaara bam ye o du duuri de baŋa ne to.

Isarele dwi tiina bam ye ba yera

32Boŋe-na á nii ko na ye tei faŋa faŋa to, se á lɔre kolo na wora to. Ko na zege dɛ dem Wɛ na bobo o naane nabiina se ko ba ko yi zem to, beeri-na tega baŋa ni maama ne, se á nii wo-kamunu konto dwoŋi fɔge ko ke jei selo ne na? Bwei-na á nii nɔɔno nigi keim dem konto dwi ŋwa jei ne na? 33Dwi dedwoŋi tiina wora ye ba ni ba wɛ dem kwora na zege mini wone ka ŋɔɔne de-ba ye ba ta ŋwe na? Abam yerane mo nɛ keim dem konto dwoŋi. 34Dwi dedwoŋi tiina wɛ ke kokeiri de vere de nɔɔna bam teo kodwoŋi jeŋa ne pa se ba ji wɛ dem konto tete tiina na? Se abam tete yi mo nɛ abam Tu Baŋa Wɛ wom na toŋe de o dam-fɔrɔ o ke wo-kamunnu dedaane wo-kenkagela se o ma faŋe Ejipti tiina bam o nii ye o daare o tɔge jara baŋa ne o vere abam ba jeŋa ne tei to.

35 Baŋa Wɛ déem pɛ se á na o keina yanto maama se á wane á lɔre we wonto yerane mo ye Wɛ chekke, ye wɛ dedwoŋi tera se de dwoni ded‑o. 36O ma pa se o kwora mo zege wɛɛne ka ba á tei se o ma o kaane abam se á ta‑á sɛ o ni. O ta ma pa se á zege tega baŋa ne á na o min-fɔrɔ kom o na tɔge ko wone o ŋɔɔne de abam to. 37O na jege á nabaara bam swono to ŋwaane mo o kuri abam na ye ba naaro to, se á ta‑á ye o nɔɔna. Baŋa Wɛ tete déem mɛ o dam-fɔrɔ mo o le abam Ejipti wone. 38O laam ma da á yiga o zeili dwi-gɛ tiina balo na daga ba dwoi abam, ye ba ta dana ba dwoi abam to, se o pa á kwei ba tega kam á ta‑á tei, nenɛɛne ko na ye tei zem tento to.

39Laam nam kwei chega kam konto á ke á bochare ne zem, se á sɛ we Baŋa Wɛ mo ye wolo na tei wɛyuu dedaane tega baŋa maama. Wɛ dedwoŋi daa tera. 40Ta‑á toŋe-na á tɔge Baŋa Wɛ nia yalo a na pɛ abam zem tento to. Abam ná sɛ o bera yam konto, á ŋwea wó ke lanyerane ka pa abam de á kwaga kam. Á laam maa wó ta‑á zoore tega kalo Baŋa Wɛ na kuri se á ta‑á tei taa wuu to wone á dáane.”

Ka-duri-ka-zo-ka-seigi teene dem

Jeelim 35:9-15

41Moses déem na tage konto maama o ti to, o ma le teene detɔ na wo Jɔdan buga kam wɛ-puli seeni to o zege dáane. 42Teene dem konto wora se nɔɔno ná wo paale o dwoŋi, ye o ná go‑o, se kotu duri o zo de wone mo se o jwoŋi o tete ŋwea. 43Ruben dwi dem wone o déem le Bezere mo. Teo kom konto maa wo zwonnu yuu ne ye ka ta ye kagoa laŋa. O ta ma le Ramofa o pa Gad dwi dem. Teo kom konto maa wo Gilead laŋa kam ne. O ma daare o le Golan o pa Manasɛ dwi dem. Teo kom konto maa wo Basan laŋa kam wone.

Wɛ nia yam pulim taane

44Wɛ nia yanto mo Moses déem tole o bere Isarele tiina bam. 45-46Yanto mo ye bera de chullu dedaane chwei selo Isarele tiina na jege se ba taa tɔge to. Maŋa kalo ba na nwoŋi Ejipti wone ye ba vo ba yi bwolo kolo na bwola dedaane Bɛte-Peora to mo Moses kwei Wɛ nia yam konto o bere-ba. Jɔdan buga kam wɛ-puli seeni mo konto, jei selo Amori tiina Pɛ Sihon na di o paare Hesebon ne to. Moses dedaane Isarele tiina bam déem na zege Ejipti ne ba maa kɛ to mo ba wane Pɛ Sihon ba di. 47Ba déem ta ma vere o tega kam dedaane Basan teo Pɛ Oga tega kam maama. Pwa banto balei maa ye Amori tiina pwa balo na di ba paare Jɔdan buga kam wɛ-puli seeni to. 48Ba laŋa kam konto déem zege Arowa teo kom seeni mo, ko na wo Aranon nabara kam ni ne to, ka yi Sirion peo kom seeni. (Peo kom yere dedwoŋi mo ye Heremon.) 49Tega kam maa tɔge Jɔdan buga kam wɛ-puli seeni dem maama mo ka yi Araba naneo kom.#4:49 Araba naneo kom = Yɛ naneo kom Pisiga peo kom teiŋa maa wo ka wɛ-puli seeni.

Currently Selected:

Nia Gulim 4: KBG

Highlight

Copy

Compare