Nia Gulim 3

Ba wane Pɛ Oga ba di

Jeelim 21:33-35

1“Konto maama na ke ko ti to, dé laam ma mage dé yuu Basan seeni. Pɛ Oga déem mo ye jei sem konto pɛ. O ma nwoŋi dedaane o jar-keira bam maama se ba kwaare jara dedaane debam Ederi ne. 2Baŋa Wɛ ma ta de amo o we, ‘Nam yé ta‑n kɔre‑o, se amo mo lage a kwei Pɛ Oga de o jar-keira bam a ke abam jeŋa ne, se á jwoŋi ba tega kam á ta‑á tei. Abam nam jege se á chɔge pɛ wom konto dedaane o nɔɔna bam mo nenɛɛne á na ke Amori tiina Pɛ Sihon na di paare Hesebon ne tei to.’

3Debam Tu Baŋa Wɛ wom ma seene o woli debam. O déem kwei Pɛ Oga de o nɔɔna bam maama mo o ke debam jea ne pa se dé mage ba maama dé go. Ba wolowolo wo daare. 4Dé ma wane teene dem maama Aragobi laŋa kam ne Pɛ Oga déem na di o paare Basan ne mɛ to. De ye teene fuseredo mo. Teo déem wo daare ye dé wo di-ko. 5Teene dento maama déem lɔge mo de pe de dam. De kabiri sem maa tiini se dɔra. Luuru mo ba déem ta mɛ ba che teene dem manchwoŋo nia yam. Te-balwa de déem wora, ye dento wo fɔge de che konto dwoŋi. 6Dé ma yɔɔre dé chɔge Pɛ Oga teene dem maama dé ke-de Wɛ dam kuri ne, nenɛɛne dé na maŋe dé chɔge Pɛ Sihon laŋa kam tei to. Dé ma chɔge de nɔn-bia bam maama: baara, de kaana, dedaane bia. 7Se ko ná ye ba vara bam dedaane ba jejegero tem, dé ma vere-te pa se te ji dé nyem.

8Sihon dedaane Oga déem ye Amon tiina bam pwa mo. Banto paare laŋa kam wo Jɔdan buga kam bubɛ delo na yɔɔre wɛ-puli seeni to mo. Ba laŋa kam déem tole ka zege Aranon nabara kam ne mo se ka yi Heremon peo kom na wo baŋa seeni to. Debam déem ma jwoŋi jei sem konto maama dé tei. 9(Sidon tiina bam jege Heremon peo kom ba bwoi we Sirion mo. Ko daare ye Amori tiina bam bwoi-ko we Senira.) 10Dé déem mage jara mo dé vere teene delo maama na wo peero tem laŋa ne to. Dé ta ma wane Gilead laŋa kam de Basan maama se ko yi Saleka dedaane Ederi. Teene delei dem konto de déem tɔge de wo Basan laŋa kam ne mo, mɛ Oga na di o paare dem to. 11Pɛ Oga déem mo kweeli Refayi tiina bam jeŋa ne. Ba déem na mɛ kolo ba suli‑o ko wone to ye luuru mo ba mɛ ba ke-ko. Ko dedɔrem baŋa maŋem maa ye jatwogo maŋem kuni nogo. Ko daare ye ko kayɔlɔ baŋa seeni maŋem maa ye jatwogo maŋem kuni bena. Ko daa ta wo Amon tiina teo Raba ne mo.”#Amosi 2:9

Jɔdan buga kam wɛ-puli seeni tega kam

Jeelim 32:1-42

12“Dé na jwoŋi tega kam dé tei konto to, mo amo déem kwei laŋa kadwoŋi a pɔɔre a pa Ruben dwi dem dedaane Gad dwi dem. Banto laŋa kam déem zege Arowa teo kom na wo Aranon buga kam ni ne to se ko taa vei baŋa seeni, ko woli de Gilead zwonnu laŋa kam chichworo de teene delo na wo jei sem konto ne to mo. 13Gilead tega kam chichworo kolo na daare to mo amo déem kwei a pa Manasɛ dwi chichworo kom. A ta ma kwei Basan maama a woli da a pa-ba. Pɛ Oga laŋa kam mo konto. (Aragobi laŋa kam na wo Basan ne to mo ba déem jege ba bwoi we Refayi tiina tega kam.) 14Nɔɔno wodwoŋi déem maa wo Manasɛ dwi dem wone, o yere mo Jayira. Wonto ma mage o vere Aragobi laŋa kam maama o vo o yi Gesura dedaane Maaka siseini dem. O ma pa se ba lɛɛre ba bwoi Basan teene dem konto we ‘Jayira teene’. Ko ta ye konto mo de zem maama. 15Se ko ná ye Gilead tega kam chichworo kolo na wo baŋa seeni to, amo déem kwei-ka a pa Makira na ye Manasɛ dwi tu to mo. 16A ma daare a kwei laŋa kalo na zege Gilead ne se ka yi Aranon nabara kam tetare ne to a pa Ruben dwi dem dedaane Gad dwi dem. Ba laŋa kam baŋa seeni siseini dem maa ye Jaboke buga kam. Amon tiina laŋa kam siseini mo konto. 17Wɛ-zoore seeni mo ba tega kam siseini dem déem tɔge Jɔdan buga kam, ko na zege Galili naneo kom seeni se ko taa vei tega-kuri seeni ko vo ko yi Araba naneo kom. (Yɛ naneo kom mo konto.)#3:17 Yɛ naneo kom = The Dead Sea Pisiga peo kom teiŋa maa wo tega kam wɛ-puli seeni.

18Amo déem ma pa abam ni dento we, ‘Debam Tu Baŋa Wɛ wom mo kwei tega kanto o pa abam se á ta‑á tei. Abam balo nam na ye jar-keira to jege se á kwei á jara zela ye á daare á tɔge Isarele dwi tiina badwonna bam yiga á bɛ Jɔdan buga kam, ba na ye á chorro to ŋwaane. 19Se ko daare á kaana, de á bia, dedaane á vara bam maama mo, á wó pa se banto maŋe á teene delo amo na maŋe a kwei a pa abam to wone. Kokuri a yei we abam vara bam tiini ba daga dedɛ. 20Abam jege se á woli á chorro tem mo se ba jaŋe ba di tega kalo na wo Jɔdan buga kam wɛ-zoore seeni to. Baŋa Wɛ nam ná tu o pa se ba sii de jara yam ye ba daare ba jeini ba tega kam ne, nenɛɛne abam na nɛ tei to, abam de laam wó jwoori mɛ amo na kwei a pa abam to mo á ta‑á wora.’

21Maŋa kam konto ne amo déem kwei ni dento a pa Josua we, ‘Nmo tete yi nɛ n Tu Baŋa Wɛ na toŋe tei dedaane pwa balei banto, Sihon de Oga to. Teo kolo maama abam nam na wó vo to, Baŋa Wɛ ta lage o toŋe konto mo ba yera ne. 22Konto ŋwaane, yé ta‑á kɔre-na foone de-ba. Abam Tu Baŋa Wɛ mo lage o jaŋe o pa abam.’ ”

Wɛ wo sɛ se Moses bɛ o vo o zo Kanaan tega kam

23“Kanto maŋa kam ne, a déem ma tiini a lwoori Wɛ a we, 24‘Yuu-tu Baŋa Wɛ, amo ye n tontoŋeno mo. Nmo laam nam bobo se n bere-ne nmo jeŋa na jege dam se n ma‑n ke wo-kenkagela yalo to. Kokuri to, wɛ dedwoŋi tera wɛyuu ne naa tega baŋa ne se de wane de ke nmo wo-kamuna yam dwoŋi. 25Ja, pa amo chwoŋa se a de tɔge a bɛ Jɔdan buga kam a zo te-ŋoŋa kalo na wo bubɛ dedwoŋi dem ne to, se a wane a na zwonnu tem laŋa kam na tiini ka lana to, dedaane Lebanon jei sem.’

26 Baŋa Wɛ nam wo sɛ se o cheigi a wɛ-lworo kom. Abam kɔgɔ kom ŋwaane mo o bane déem tiini de zaŋe de amo, ye o ta o bere-ne o we, ‘Pa se ko kweeli! Daa‑n yé ŋɔɔne taane dem konto de amo! 27Za n diini Pigisa peo kom yuu ne. Dáane mo n wó wane n nii n kaare tega kam jei maama. Nii n yiga ne, de n kwaga ne, ko woli de n jazem de n jagwia maama. Fɔge n nii n na, kokuri n bá‑n tɔge n bɛ Jɔdan buga kam.#Nia Gulim 34:1-4 28Véi n ta de Josua se o bochare ke dam. Ke baare n ke o kuri ne, se wonto mo lage o da amo nɔɔna bam yiga se ba bɛ ba zo tega kam nmo na wó na to. O ta wó pa ba jwoŋi-ka ba taa tei.’

29 Baŋa Wɛ na tage konto o ti to, dé déem ma maŋe bwolo kom konto seeni, ko na twɛ dedaane Bɛte-Peora to.”

Currently Selected:

Nia Gulim 3: KBG

Highlight

Copy

Compare