Nia Gulim 28

Ni-sɛɛm wó ja Wɛ swolim de ba

Chullu 26:3-13; Nia Gulim 7:12-24

1“Á ná sɛ á Tu Baŋa Wɛ wom kwora ye á toŋe á tɔge o nia yam amo na pɛ abam zem tento to, Baŋa Wɛ wó pa se á yere zaŋe de dwoni teene delo maama na wo logo kom baŋa ne to. 2Sɛ-na o ni dem chekke se swolim dento maama taa ye á nyem ye de woli abam maŋa maama:

3Wɛ swolim wó taa wo á teene dem baŋa ne de á kare sem baŋa ne. 4Wɛ swolim wó taa wo á bia baŋa ne, de á wodiiru baŋa ne, de á vara baŋa ne, ne ko ná ye á naane, de á pei, de de bia maama. 5Wɛ swolim wó taa wo á mena tetwaro baŋa ne, de á nwanno tem baŋa ne. 6Wɛ swolim wó taa wo á kikia maama baŋa ne, ne ko ná ye totoŋa yalo á na ke diga ne, de yalo á na ke pwooni ne to maama.

7Á dona ná nwoŋi se ba kwaare jara de abam, Baŋa Wɛ wó wane-ba o pa abam. Ba kɔgɔ kom wó da chwoŋa dedoa ba ba abam baŋa, ye ba laam jage ba da chwei serepɛ ba duri se ba lu abam jeŋa ne.

8 Baŋa Wɛ wó swɛ swolim o ke á tuli baŋa ne, de á jeŋa totoŋa maama baŋa ne, pa se á na swolim lanyerane tega kalo o na lage o pa abam to wone.

9Abam ná sɛ Baŋa Wɛ ni maama ye á tɔge o chwei sem, o wó fɔge abam pa se á ta‑á ye o tete nɔɔna, ne o na pwooli se o ke tei to. 10Ko maa wó pa se logo baŋa nɔɔna maama lɔre we á ye Baŋa Wɛ wom nyem, se ba ta kɔre abam. 11Baŋa Wɛ wó pa se á ŋwea maama ke lanyerane, se á ta‑á jege bia dedɛ, de vara dedɛ, de wodiiru dedɛ, ne á ná tu á zo tega kalo ne o na pwooli de á nabaara se o pa abam to. 12Baŋa Wɛ wó zege o wɛyuu sɔŋɔ kom ne o toŋe doa se ka ne á kare sem ne, pa se wodiiru telo á na dugi to ke lanyerane. O na wó ke zaane á totoŋa maama baŋa ne to wó pa se á ta‑á jene á pae dwi-gɛ tiina dedɛ. Abam nam bá jwoŋi jena nɔɔn-nɔɔno tei ne. 13Baŋa Wɛ wó pa á ta‑á wo nɔɔna maama yiga ne mo, ye á bá ta‑á wo ba kuri ne. Chega to, á ná sɛ á Tu Baŋa Wɛ wom kwora ye á toŋe á tɔge o nia yam amo na pɛ abam zem tento to, á wó ta‑á vei yiga mo maŋa maama ye á daa bá jwoori kwaga. 14Ko ná ye Wɛ nia yalo a na pɛ abam zem to, yé ywori-na ya wone se á vo jazem naa jagwia seeni. Á nam yé zaŋe á zuli wa-yɔɔro.

Zwabania wó ja sɔɔlem ka ba

Chullu 26:14-46

15Abam ná ve á Tu Baŋa Wɛ kwora kam ye á wo sɛ se á tɔge o nia yam amo na pɛ abam zem to chekke, lwarem dento maama wó ba á baŋa:

16 Baŋa Wɛ wó sɔɔle lwarem o yage á teene dem de á kare baŋa ne. 17Baŋa Wɛ wó sɔɔle lwarem o yage á mena tetwaro baŋa ne, de á nwanno baŋa ne. 18Baŋa Wɛ wó sɔɔle lwarem o yage á bia baŋa ne, de á wodiiru baŋa ne, de á vara baŋa ne, ne ko ná ye á naane, de á pei, de de bia maama. 19Baŋa Wɛ wó sɔɔle lwarem o yage á kikia maama baŋa ne, ne ko ná ye totoŋa yalo á na ke diga ne, de yalo á na ke pwooni ne to maama.

20 Baŋa Wɛ wó ja lɛɛro de cham o ba abam baŋa ne, pa se á boboŋa vugimi de kolo maama á na lage á toŋe to. Chɔgem wó ba de ti abam lela, á na toŋe lwarem totoŋa ye á lɔ Baŋa Wɛ kwaga ne to ŋwaane. 21Baŋa Wɛ wó ja jawe-chɛɛro dwi dwi o ba abam baŋa ne, pa se nɔɔn-nɔɔno daa yé daare tega kalo á na lage á zo se á ta‑á tei to wone. 22O wó pa sesa-dwonnu, de paa, de yera foosem ba te ja abam. O ta wó toŋe wulim de da-kore de jawe-chɛɛro dwi dwi se te chɔge wodiiru telo á na dugi to. Lɛɛro tento maama wó taa jaane abam se ko ta nii á toone. 23Kunkwonnu bá taa wo wɛyuu ne. Tega kam wó ko mo kaŋ-kaŋ ne luuru tei. 24Á na teene doa, ka bá ba, ye fwogo de kasol-koro yerane mo á wó na. Te wó ba te chɔge abam te ti.

25 Baŋa Wɛ wó kwei abam o ke á dona jeŋa ne. Á kɔgɔ kom wó da chwoŋa dedoa á vo á kwaare jara de-ba, ye á laam jage á da chwei serepɛ á duri se á lu ba jeŋa ne. Logo baŋa dwi tiina maama ná nɛ kolo na wó ba abam baŋa to, ko wó tiini ko so-ba ye foone ja-ba. 26Á ná tega, zuna de kago-vara mo wó ba ba di abam yera ye nɔɔn-nɔɔno daa bá daare se o zeili-ba o yage.

27 Baŋa Wɛ wó pa se ŋɔn-pwoni lei abam yera ne, ne o déem na ke tei de Ejipti tiina bam to. O ta wó pa se sankwɛ, de tambwala, de kasili-nabiina to abam yera ne, ye yɔɔrem tera. 28Baŋa Wɛ wó pa se á yuni vuvugi, á yia de wó dwei ye á boboŋa vugimi. 29Wea tetare ne de á wó ta‑á kare á taane mo ne lilwoa tei. Á bá na nyɔɔre á totoŋa baŋa ne. Maŋa maama de, nɔɔna wó taa bɛɛse abam, ye ba vere á wonnu tem. Nɔɔn-nɔɔno nam bá taa wora se o jwoŋi abam o yage.

30Nɔɔno wolo ná vei o cha kaane se o di, nɔn-gaa wó zi kaane wom. Wolo ná lɔge diga, kotu bá zo ka wone. Wolo ná dugi kara, kotu bá na ka wodiiru o di. 31Ba wó zage á naane ba go á yibia ne, ye á bá na nɔna yam á done. Abam ná zege á nia, ba wó vere á bonɛ ba vaŋe ba ja kɛ, ye ba daa bá jwoori ba pa abam. Ba wó vere á pei sem ba kwei ba ke á dona jeŋa ne ye nɔɔn-nɔɔno tera se o woli abam. 32Ba ta wó ja á bia bam, bakeiri de busankane, ba vo ba ke dwi-gɛ tiina jeŋa ne. Á wó ta‑á zege chwoŋa ni ne taa á nia se á bia bam jwoori ye á ga. Á bá wane kolokolo á ke. 33Sa-teena mo wó ba ba vere wodiiru telo á na koore luluŋu á na to. Á wó yeini á ta‑á nae yaara de bɛɛsem yerane mo. 34Keim-chɛɛre delo á yia na wó na to wó pa se á yu-punnu vugimi. 35Baŋa Wɛ wó waare abam pa se ŋɔn-pwoni jwoŋi á nɛ sem maama. Se wó kwoli á yera yam maama ye se ba jia.

36 Baŋa Wɛ wó zeili abam de pɛ wolo á na wó kuri se o taa tei abam to se á jage á vo sa-teo yiga yiga, teo kolo abam de á nabaara bam ya na yeiri ko ni ne to. Jei sem konto ne á wó ta‑á zuli jwona yalo ba na mɛ dɛ dedaane kandwa ba ma ke-ya to. 37Teene delo wone Baŋa Wɛ na wó jage abam to tiina ná nɛ kolo na wó ke abam to, ko wó so-ba dedɛ. Á wó ji memaŋa de wo-mɔnɔ á pa-ba.

38Á wó du dedɛ á kare ne, ye á ba á zage fenfee, kayere na wó di á wodiu kom to ŋwaane. 39Á wó jeiri Vini teeni á daare á nii de baŋa ne, ye á bá gwori de bia bam naa á ŋoke nyoa bam se á nyɔ, kanzwa na wó chɔge á teeni dem to ŋwaane. 40Olivi teeni wó nwoŋi á tega kam jei maama ne, ye á za bá na de nuga mo, de bia bam maama na wó siiri to ŋwaane. 41Á wó lo bia, bakeiri de busankane, ye á bá ta‑á nii-ba, á dona na wó ja-ba ba ja viiri to ŋwaane. 42Á teeni dedaane á wodiiru maama ye kayere mo wó deilimi se ti.

43 Dwi-gɛ tiina balo na zoore abam teo kom ne to wó fɔge ba taa puli de dam, ye abam tete wó ta‑á jwoori kwaga. 44Banto wó taa jege sabu ba jene ba pae abam. Abam nam bá ta‑á jega se á jene á pa-ba. Ba wó taa ye abam yuu tiina mo, se á ta‑á wo ba dam kuri ne.

45Chega ŋwaane to, abam ná ve á Tu Baŋa Wɛ kwora kam ye á wo sɛ se á tɔge o nia yam de o bera yam maama, lwarem dento dwoŋi wó ba á baŋa de bá yage se ko yi á laam na tu á chɔge á ti to. 46Tento maama mo wó taa ye maana se nɔɔna lɔre we Wɛ ban-zɔŋɔ wo abam de á kwaga kam baŋa ne taa wuu.

47Abam wo sɛ se á ta‑á zuli á Tu Baŋa Wɛ wom de wopwolo ye á toŋe á pa‑o, de o na maŋe o pa á jeŋa jege wo-laaro dedɛ to. 48Mo kokuri á laam wó ta‑á toŋe á pae á dona balo Baŋa Wɛ na wó toŋe se ba wane abam to. Kana wó ja abam, na-nyɔm de wó ja abam. Zore de wó ja abam woŋo maama wone ye á ta‑á vei kalambwolo. Á wó ji kabɛ ye á na bɛɛsem se ko taa nii á ná tu á chɔge á ti.

49 Baŋa Wɛ wó le dwi delo na wo yiga yiga ye á ba ni ba taane to se ba popo ba ba abam baŋa ne, ne maao na yeini ko chaale ko wodiu tei to.#Izaya 5:26; Hosea 8:1 50Ba maa ye balo na jege wo-dɛɔ ye ba ba duri nɔɔn-nɔɔno ŋwaŋa, nɔn-kwe de bia de to mo. 51Ba wó ba ba vere á vara de á wodiiru maama ye ba daare abam se á pu de kana. Ba bere ba bá daare kolokolo, mena, de sana, de nuga, de naane, de pei, de bone. Ba wó vere te maama ba daare abam se á laam ba á chɔge á ti.

52Á dona wó nwoŋi ba ba tega kalo á Tu baŋa Wɛ wom na lage o pa abam to ba kaare á teene dem maama ba pu. Ko ná ye kabiri-dɛɛro telo na dɔra ye á boŋe we te wó che á dona yiga to, tento wó to tega ne buri-buri. 53Á dona na wó peene abam konto to, ko wó pa se á chɔɔre ye á laam di bia balo á Tu Baŋa Wɛ wom na pɛ se á lo to. 54-55Á dona ná kaare á teene dem maama ba pu, nɔn-yero wolo maama na bere o jege yibwona to de lage o di o tete bia mo, o na yaare de kana to ŋwaane. O nam bá sɛ se o chɛ nɔna yam o pa o choro, naa o ka-swono, naa o bia balo ta na daare to. 56Ka-yero wolo de na jege yibwona ye o yeiri yaara to de wó ma o kwaga o ya o baro wolo o na swoi to de o bia maama. 57O wó seigi o di bu-seseŋa kalo o na loge to de ka nyeene, ye o ba ke o chɛ o pa o diga tiina, kana na jege‑o ye wodiu tera to ŋwaane.

58Abam ná wo sɛ se á toŋe á tɔge bera yalo maama na popone ya tiŋi tɔnɔ konto ne to, ye á ná ve se á zuli á Tu Baŋa Wɛ yere-kamunu kom, 59o wó waare abam de á bia pa se jawe-chɛɛro lɔgese abam maama ye te bá jei. 60Jaweero telo dwoŋi Ejipti tiina déem na nɛ ye á jege te lwia to wó ba á baŋa ye á bá na te yɔɔrem jei. 61Baŋa Wɛ ta wó pa se jaweero de yaara yalo na maŋe ya wo popone ya tiŋi Wɛ nia tɔnɔ konto ne to ba abam baŋa se te chɔge abam fase. 62Á kɔgɔ kom seene ko puli ne wɛyuu chalechwe sem na daga tei to mo. De ko de, abam fenfee yerane mo wó daare, á na ve á Tu Baŋa Wɛ ni to ŋwaane. 63Ko ya pwoli Baŋa Wɛ wo mo se o ke abam lanyerane pa se á puli dedɛ. Ko laam nam wó pwoli o wo se o chɔge abam pa se á ti. O wó pa se ba vuuri abam ba gɔ tega kalo á na lage á zo to ne.

64 Baŋa Wɛ wó zeili abam pa se á jage á vo á yi logo baŋa teene dem maama. Dáane mo á wó ta‑á zuli jwona yalo ba na mɛ dɛ dedaane kandwa ba ma ba ke to. Abam de á nabaara ya yeiri wa-yɔɔro tem konto ni ne. 65Jei sem konto ne, á bá na kugu jei de bochare-zuru. Baŋa Wɛ wó pa se lwia taa jege abam. Á yia wó ba ya dwei ye á vɔna pare. 66Á bochara wó taa jaana ye foone jege abam wea de tete maama. Á wó ta‑á kɔre foone de toone maŋa maama. 67Á ná zaŋe zezeŋa ne, á wó ta nenɛɛne, ‘Ko ya ná ye dedaan-ni mo tento, ko ya wó taa gara.’ Dedaan-ni ne á maa wó ta we, ‘Ko ya ná ye zezeŋa mo konto, ko wó taa gara.’ Á wó ta‑á tɛ konto dwoŋi de wo-lwanno telo á yia na wó na pa se foone ja abam to. 68Baŋa Wɛ wó pa se á zo nabwooru á jwoori á vo Ejipti, de o na maŋe o pa abam ni se á daa yé da chwoŋa kam konto to. Á ná yi da, á wó kwaane se á yeigi á tete á pa á dona se á ji ba kabɛ, ye nɔɔn-nɔɔno bá sɛ se o yeigi abam.”

Currently Selected:

Nia Gulim 28: KBG

Highlight

Copy

Compare