Nia Gulim 29

Ba jwoori ba ke ni-gwonim de Wɛ

1 Baŋa Wɛ déem na lage o gwoni ni de Isarele tiina bam Moaba laŋa ne to, taane delo o na tage de Moses se o lwoni o bere-ba to mo tento. Tento de nam ta lage te tɔge te woli de ni-gwonim delo Baŋa Wɛ na maŋe o ke o pa-ba Sinayi peo yuu ne to mo. 2Moses ma bwoŋi Isarele tiina bam maama ye o ta de ba o we:

“Abam tete maŋe á na Baŋa Wɛ déem na toŋe kolo de Ejipti Pa-faro wom de o nakwa de o teo kom maama to. 3Á yia mo nɛ chana yalo, de wo-kenkagela yalo, de wo-kamunnu telo Baŋa Wɛ na ke o ma faŋe Ejipti tiina bam o nii to. 4De zem maama de, o ta wo pɛ abam yia poore se á wane á ni kolo maama á na nɛ to kuri.

5 Baŋa Wɛ tage o we, ‘Bena fintɔ mo a tɔge abam yiga kagoa kam wone ye dé via. Á gwaaro nam wo zareme, ye á natera de wo chɔge. 6Á na beeri konto to, á wo di bworobworo ye á wo nyɔge sana. De ko de, a woli abam se á wane á lɔre we amo mo ye abam Tu Baŋa Wɛ wom.’

7Dé na yi ywo-seeni to, Hesebon teo Pɛ Sihon de Basan teo Pɛ Oga ma nwoŋi se ba kwaare jara de debam. Dé déem ma wane-ba. 8Dé ma kwei ba tega kam dé pɔɔre dé pa Ruben dwi dem, de Gad dwi dem, de Manasɛ dwi chichworo kom se ba taa tei.

9Ta‑á yei-na se á tɔge kolo maama na popone ko tiŋi ni-gwonim dem konto ŋwaane to, se ko pa kolo maama á na lage á toŋe to taa ke lanyerane ko pa abam. 10Zem dɛ dem ne, abam maama zege á Tu Baŋa Wɛ wom yiga ne mo, de á yuu tiina, de á nakwa, de á dedɛɛra, de Isarele baara bam maama, 11ko ta woli de á kaana, de á bia, de veira balo na zoore de abam ye ba gwoni dɛ ba daare ba mɔɔne na ba zeŋe ba pae abam to maama. 12Á tu se á sɛ ni-gwonim delo á Tu Baŋa Wɛ wom na dugi duuri o ma ke de abam zem to mo. 13Ni-gwonim dem konto bere we á seene á ye o nɔɔna bam se o de taa ye abam Tu Wɛ wom, ne o na maŋe o pwooli tei de abam, de á nabaara Abaraham, de Izaak, de Jakob to. 14-15Ko dae abam balo zem na zege debam Tu Baŋa Wɛ wom yiga ne to yerane mo o lage o du duuri o ma ke ni-gwonim dem konto de-ba, se ko ta ye á kwaga kam de mo o lage o ke o pa-ba.

16Á wó wane á guli dé déem na zoore Ejipti ne ye dé daare dé tɔge teene dedwonna wone dé kɛ dé ba ywo ye ko ke debam tei to. 17Á nɛ dwia yanto tiina na zuli wo-zɔɔna de jwona yalo ba na mɛ dɛ, de kandwa, de lu-nyenno, de sabu-seŋa ba ma ke to. 18Ta‑á yei-na se abam wolowolo yé lɔ dé Tu Baŋa Wɛ wom kwaga ne se o daare o vo o zuli dwi-gɛ tiina jwona. Ko ná ye abam balo zem na wora to wone baaro, naa kaane, naa sɔŋɔ kolo, naa dwi delo maama, se á yé zaŋe á ke konto.#Hiburu 12:15

Wolo maama ná tɔge jwo-yɔɔro, kotu wó taa nye de tei-kugu kolo na bege se ko laam ba ko lei tio-bi-balwaaro to mo. 19O wae o ni ni-gwonim dento na bere wonnu telo to ye o boŋe o yuu ne we, o ta wó na lanyerane de o na maŋe o jege yi-dɛɛre ye o ba tɔge Wɛ chwoŋa to de. Kotu nam wó ja chɔgem o ba abam maama baŋa ne, nɔn-ŋona de nɔn-balwaaro maama. 20Baŋa Wɛ bá yage nɔɔno wom konto wɛleera o ma chɛ‑o. O ban-zɔŋɔ za mo wó tɔrege kotu baŋa ne, pa se chana yalo maama na popone ya tiŋi tɔnɔ konto wone to ba kotu baŋa ne se ko taa nii o yere ná saare logo baŋa maama ne. 21Baŋa Wɛ wó le‑o Isarele dwia yam maama wone se o tiini o na chɔgem. Sɔɔlem delo maama na popone Wɛ nia tɔnɔ kom wone o ni-gwonim dem ŋwaane to maa wó to kotu baŋa ne. 22Abam kwaga kam de sa-teena balo na nwoŋi yiga yiga to jwa wó na chɔgem delo Baŋa Wɛ na wó pa de to tega kam baŋa ne se yaara dedɛ ta wora to. 23Á tega kam maama wó chɔge, yɛ de chilibugu na wó li-ka to ŋwaane. Ba bá wane kolokolo ba du ka wone. Wodiiru de bá ke da, ye gaaro tete bá wane te nwoŋi. Laŋa kam maama wó taa nye de Sodom, de Gomora, de Adema, de Zeboyiim teene dem déem na chɔge tei, Baŋa Wɛ ban-zɔŋɔ kom ŋwaane to. 24Dwi-gɛ tiina maama ná nɛa, ba wó taa bwei nenɛɛne, ‘Bɛ laam mo ke ye Baŋa Wɛ chɔge ba tega kam konto dwoŋi? Bɛŋwaane mo o bane tiini de zaŋe de-ba konto?’

25Nɔɔna wó leiri-ba ba we:

‘Ko wó taa ye we, Baŋa Wɛ nɔɔna bam chɔge ni-gwonim delo o na ke de-ba maŋa kalo o na jaane-ba o nwoŋi Ejipti ne to, de o na ye ba nabaara Wɛ wom to. 26De konto de, ba déem yage‑o ba daare ba zuli wa-yɔɔro mo, te na ye wa yalo ba ya na yeiri, ye Wɛ wo sɛ se ba zuli-ya to. 27Konto laam mo pɛ se Baŋa Wɛ bane zaŋe ba baŋa ne, ye o pa se sɔɔlem delo maama na popone tɔnɔ konto ne to ba ba tega kam baŋa ne. 28Baŋa Wɛ ma vuuri-ba o le ba tega kam ne, ye o laam dole-ba o yage sa-teo ne, o ban-lom dem ŋwaane. Dáane mo ba ta wora de zem maama.’

29Wo-siseigiru wora, te na maŋe te wo dé Tu Baŋa Wɛ wom boboŋa ne, se ko daare bera yalo o na veere o pa debam to, yanto mo ye debam de dé kwaga kam nyem se ko taa vei wuu, se dé wane dé taa tɔge o nia yam maama.”

Currently Selected:

Nia Gulim 29: KBG

Highlight

Copy

Compare