Nia Gulim 27

Ba popone Wɛ nia yam kandwa baŋa ne

1Moses de Isarele nakwa bam laam ma ta de nɔɔna bam ba we, “Ta‑á tɔge-na Wɛ ni dem maama a na bere abam zem to. 2Á ná tu á bɛ Jɔdan buga kam á zo tega kalo á Tu Baŋa Wɛ wom na lage o pa abam to, á jege se á chwi kandwa-kamuna, á daare á fɔge-ya lanyerane de te-pwonnu. 3Á laam wó daare á popone Wɛ nia yanto maama á ke da. Á ná bɛ á zo tega kalo Baŋa Wɛ na lage o pa abam to, á jege se á ke konto mo. Ka maa ye te-ŋoŋa na ywomma de varem de kɔnɔ, nenɛɛne á nabaara Baŋa Wɛ wom na pwooli se o pa abam tei to. 4Á ná bɛ Jɔdan buga kam á kɛ á vo á yi Ebal peo kom, se á chwi kandwa yam konto á daare á fɔge-ya, ne a zem na bere abam se á ke tei to. 5Á ta wó kwei kandwa yadwonna á ma lɔ bimbini á pa á Tu Baŋa Wɛ wom. Á nam yé ma-na luuru á sare kandwa yam á ma á lɔ-de. 6Beeri-na kandwa-dale se á ma á lɔ bimbini dem, se á daare á ke zwɛɛm kaanem de baŋa ne á pa Baŋa Wɛ. 7Á ta wó ke yazura kaanem da, ye á tɔge daane á di ye á ke wopwolo á Tu Baŋa Wɛ wom yiga ne. 8Á jege se á popone Wɛ nia yanto maama á ke kandwa yalo á na chwi to baŋa ne mo, se botare sem taa nae jaja.”#Josua 8:32

Zwabania wó ja sɔɔlem ka ba

9Moses de Levi dwi tiina balo na ye Wɛ kaanem tiina to déem ma ta de Isarele tiina bam maama ba we, “Isarele tiina bam, cheigi-na sɔɔ se á ni a taane dem. Abam zem jigi á Tu Baŋa Wɛ tete nɔɔna mo. 10Konto to, sɛ-na o kwora kam se á ta‑á toŋe á tɔge o nia yam de o bera yam ne a zem na pɛ abam tei to.”

11Dɛ dem konto ne mo Moses déem tage de Isarele tiina bam o we:

12“Á ná bɛ Jɔdan buga kam á ti, Isarele dwia yanto mo jege se ya zege Gerizim peo yuu ne se ba kwei Wɛ zaane ba ma swɛ nɔɔna bam swolim: Simeon, de Levi, de Judah, de Isakara, de Josɛf, de Benjamin. 13Se dwia yanto de zege Ebal peo yuu ne se ba sɔɔle lwarem ba ke da: Ruben, de Gad, de Asere, de Zebulun, de Dan, de Nafitali.

14Levi tiina bam mo maa jege se ba tɔɔle botare-bia banto de kwor-dɛa ba ta we:

15‘Nɔɔno wolo ná kwei daa o ma sare jwoni, naa o mɔ kamɔgɔ, se o seigi o taa zuli-de, Wɛ wó sɔɔle lwarem o yage kotu baŋa ne, Baŋa Wɛ na chuli woŋo kolo gɔgɔ na ke o zuli to ŋwaane.’

Nɔɔna bam maama maa wó leiri we, ‘Ameena’.

16‘Nɔɔno wolo ná ba nege o kwo de o nu, Wɛ wó sɔɔle lwarem o yage kotu baŋa ne.’ Nɔɔna bam maama maa wó leiri we, ‘Ameena’.

17‘Nɔɔno wolo ná fofɔ o dwoŋi siseini, Wɛ wó sɔɔle lwarem o yage kotu baŋa ne.’ Nɔɔna bam maama maa wó leiri we, ‘Ameena’.

18‘Nɔɔno wolo ná gane lilwei se o tusi o chwoŋa, Wɛ wó sɔɔle lwarem o yage kotu baŋa ne.’ Nɔɔna bam maama maa wó leiri we, ‘Ameena’.

19‘Nɔɔno wolo ná kweele veiru, naa botaro, naa kadeim chega kam, Wɛ wó sɔɔle lwarem o yage kotu baŋa ne.’ Nɔɔna bam maama maa wó leiri we, ‘Ameena’.

20‘Nɔɔno wolo ná yaale o kwo yuu ye o peini de o kwo kaane wodwoŋi, Wɛ wó sɔɔle lwarem o yage kotu baŋa ne.’ Nɔɔna bam maama maa wó leiri we, ‘Ameena’.

21‘Nɔɔno wolo ná lage varem ye o peini ded‑o, Wɛ wó sɔɔle lwarem o yage kotu baŋa ne.’ Nɔɔna bam maama maa wó leiri we, ‘Ameena’.

22‘Nɔɔno wolo ná lage o nakɔ ye o peini ded‑o, o ná maŋe o ye o kwo bu naa o nu bu de, Wɛ wó sɔɔle lwarem o yage kotu baŋa ne.’ Nɔɔna bam maama maa wó leiri we, ‘Ameena’.

23‘Nɔɔno wolo ná peini de o tenkaane, Wɛ wó sɔɔle lwarem o yage kotu baŋa ne.’ Nɔɔna bam maama maa wó leiri we, ‘Ameena’.

24‘Nɔɔno wolo ná seigi o go nɔɔno, Wɛ wó sɔɔle lwarem o yage kotu baŋa ne.’ Nɔɔna bam maama maa wó leiri we, ‘Ameena’.

25‘Nɔɔno wolo ná jwoŋi sabu se o go nɔɔno wolo na wo maŋe se o te to, Wɛ wó sɔɔle lwarem o yage kotu baŋa ne.’ Nɔɔna bam maama maa wó leiri we, ‘Ameena’.

26‘Nɔɔno wolo ná ve Wɛ nia yanto se o taa toŋe o tɔge-ya, Wɛ wó sɔɔle lwarem o yage kotu baŋa ne.’ Nɔɔna bam maama maa wó leiri we, ‘Ameena’.”

Currently Selected:

Nia Gulim 27: KBG

Highlight

Copy

Compare