Nia Gulim 11

Baŋa Wɛ jege dam

1“Konto to á jege se á ta‑á swoi abam Tu Baŋa Wɛ wom mo. Ta‑á toŋe á tɔge o nia yam, de o chullu tem, de o bera yam maama. 2Lɔre-na we a zem ŋɔɔne de abam mo ye ko dae á bia balo na wo nɛ Baŋa Wɛ koresem to. Banto tete yi wo nɛ Baŋa Wɛ kamunni dem dedaane o dam delo o na mɛ o vere abam to. 3O déem toŋe wo-kenkagela Ejipti teo kom ne se o ma waare ko Pa-faro wom de o nɔɔna bam maama. 4O ma chɔge ba jar-keira bam de ba sisei de se torokooro tem. Banto na kwaane se ba zeili abam ba ja to, Baŋa Wɛ ma pa se ba misi Nane-soŋo kom ne ba te.#Nwoŋim 14:26-28 Ko dɛ konto mo ye ba na ba chɔgem se ko ba ko yi zem. 5Á bia bam wo nɛ Baŋa Wɛ na toŋe tei o zeini abam maŋa kalo á na beeri taa kagoa kam wone á ba á yi ywo-seeni to. 6Ba wo nɛ Baŋa Wɛ na ke Ruben dwi tu Eliabi bia Datan de Abiram tei to. Wɛ déem pɛ se tega kam puri Isarele tiina kɔgɔ kom tetare ne ka li-ba, de ba sɔŋɔ tiina, de ba vwoa yam, dedaane ba jejegero maama.#Jeelim 16:31-32 7Abam tete yia mo nɛ totoŋ-kamunnu telo maama Baŋa Wɛ na toŋe to.

8Konto ŋwaane, sɛ-na Wɛ nia yalo amo na pɛ abam zem to maama, se á jwoŋi dam á wane á bɛ á zo tega kam á ta‑á tei-ka. 9Á laam maa wó ta‑á zoore tega kalo Baŋa Wɛ na pwooli de á nabaara bam se o pa banto de ba bia bam to wone á dáane. Tega kam tiini ka ywomma de varem de kɔnɔ. 10Tega kam á na lage á zo to dae ne Ejipti logo kom, á déem na zoore mɛ to. Jei sem konto ne á yeini á du wonnu mo ye á kwori á yage na da se ko chɛ á yera ne, nenɛɛne nɔɔno na ke gaare tei to. 11Tega kalo á nam na lage á zo to jege zwonnu de bwollu mo, ye doa nena da lanyerane. 12Abam Tu Baŋa Wɛ wom yi page tega kam konto baŋa ne mo. O maa nii-ka bene dem maama wone.

13Konto to, á jege se á sɛ Wɛ nia yalo amo na bere abam zem to, se á daare á ta‑á swoi á Tu Baŋa Wɛ wom ye á toŋe á pa‑o de á bochare dedaane á wo maama. 14Á ná ke konto, Baŋa Wɛ we, o laam wó toŋe doa pa se ka ne ka maŋa ne, duum de kwea wɛɛne. Tega kam wó ke wodiiru dedɛ se á na mena, de sana, de nuga maama. 15Á vara de wó na gaao lanyerane se ba di. Wodiiru telo maama á na lage to wó yi abam se á ta‑á di á sui.

16Nam ta‑á yei-na se ba yé soge abam se á ywori Baŋa Wɛ kwaga ne á daare á ta‑á zuli wa-yɔɔro ye á toŋe á pa-ya. 17Á ná ke konto, Baŋa Wɛ bane wó zaŋe de abam. O ta wó che doa kam se ka daa yé taa nena. Te-ŋoŋa kalo o na lage o pa abam to daa bá ke wodiiru ka pa abam, pa se á dwi ti lela logo baŋa ne.

18Ta‑á guli-na Wɛ nia yalo a na bere abam to se á ke-ya á bochare ne. Lwoni-na-ya á tiŋi tɔnɔ ne se á daare á vɔ-ya á je ne, dedaane á tira ne, se á ta‑á guli ya gula. 19Pa-na se á bia de lɔre-ya. Ta‑á tɛ-na ya taane maŋa maama, nenɛɛne á ná jei sɔŋɔ ne ye á lara, naa á ná tɔge daane á vei chwoŋa yuu ne, ko ta woli de á ná peini tete ne, naa á ná zaŋe zezeŋa maama ne. 20Popone-na-ya á tiŋi á di sem ni-bworru tem ne, se á daare á ta popone-ya á yage á manchwo-nia dɛ sem ne. 21Ke-na konto se abam de á kwaga kam wane á zo tega kam ne á dáane. Ka maa ye tega kalo Baŋa Wɛ na gwoni ni de á nabaara bam se o pa-ba to, ye á wó ta‑á tei-ka taa wuu, se ko maŋe de wɛyuu de logo baŋa ta na wora maŋa kalo to wone.

22Ta‑á yei-na se á ke á tɔge Wɛ ni dem maama, ne amo zem na bere abam se á ke tei to: Ta‑á swoi-na á Tu Baŋa Wɛ wom ye á tɔge o chwei sem maama. Nam sale-na o yera ne. 23Á ná seene á ke konto dwoŋi, Baŋa Wɛ wó zeili dwi tiina balo na maŋe ba wo logo kom wone to mo. O ta wó pa abam dam se á wane á jwoŋi teene delo na dana ba dwoi abam to se á ta‑á tei. 24Tega kalo maama á nɛ na wó nɔ ka baŋa ne to wó taa ye abam nyem mo. Abam laŋa kam wó zege kagoa kalo na wo kuri seeni to se ka vo ka yi Lebanon peero tem na wo baŋa seeni to. Ka daa ta wó zege Yuferata bu-zaŋa kam na wo wɛ-puli seeni to se ko yi Mediterania naneo kom na wo wɛ-zoore seeni to. 25Á ná vei mɛ maama logo kom ne, á Tu Baŋa Wɛ wom wó pa se abam foone mo ja jei sem nɔɔna bam, ne o na pwooli se o ke tei to. Nɔɔn-nɔɔno daa bá wane abam o cheiŋi.#Josua 1:3-5

26Nii-na! Amo zem kwei Wɛ swolim dedaane o sɔɔlem mo a tiŋi abam tetare ne, se á wane á kuri kolo á na lage to. 27Abam ná sɛ á tɔge Wɛ nia yalo amo zem na pɛ abam to, Wɛ wó swɛ abam swolim. 28Á nam ná ve o nia yanto ye á zuli dwi-gɛ tiina wa-yɔɔro tem, Wɛ wó sɔɔle lwarem mo o yage á baŋa ne.

29Ne abam Tu Baŋa Wɛ wom ná jaane abam o zo tega kam se á ta‑á tei, á jege se á zege Gerizim peo kom yuu ne á tɔɔle Wɛ swolim dem, ye á daare á zege Ebal peo kom yuu ne á tɔɔle o sɔɔlem dem. 30Á yei we, peero tem konto wo Jɔdan buga kam bubɛ dedwoŋi ne se ko taa vei wɛ-zoore seeni mɛ Kanaan tiina bam na zoore bwolo kom ne to. Te maa bwola de Giligal teo kom. Morɛ tei-zɔŋɔ kom seeni mo konto.

31Abam laam lage á bɛ Jɔdan buga kam se á zo tega kalo á Tu Baŋa Wɛ wom na pɛ abam se á ta‑á tei to mo. Á na tu á ba á jeini da á ti, 32se á tiini á ta‑á yei se á ta‑á toŋa á tɔge Wɛ nia yam de o chullu tem maama ne amo zem na pɛ abam tei to.”

Currently Selected:

Nia Gulim 11: KBG

Highlight

Copy

Compare