Nia Gulim 10

Wɛ jwoori o tiŋi o nia yam o pa Moses

1“Ka maŋa kam ne, Baŋa Wɛ ma ta de amo o we, ‘Sare kandwa-pelɛ selei ne boboa nyena yam, n daare n kwei daa n ma‑n ke dakaa, se n laam di peo kom yuu n ba a tei. 2Se a lage a jwoori a popone botare selo a na ke boboa kandwa yam ne ye n lɔ to mo a ke kandwa yanto baŋa ne. Ko kwaga ne, n jege se n kwei-ya mo n tiŋi dakaa kam wone.’

3A ma kwei golesaa dɛ a ma a ke dakaa a daare a sare kandwa-pelɛ selei ne boboa nyena yam. A ma zeeri kandwa yam a ja a di peo kom yuu. 4Baŋa Wɛ ma jwoori o popone o nia fuga kam o tiŋi kandwa yam baŋa ne, nenɛɛne boboa poponem dem dwoŋi. O ya zege min-vogo wone o tɔɔle o nia yam konto se abam ni dɛ dem á déem na gilimi o yiga ne to. O na jwoori o popone-ya to, o laam ma kwei kandwa yam o pa amo. 5A ma zege peo kom yuu ne a tu tega, ye a daare a kwei kandwa yam a tiŋi dakaa kalo a na ke to wone. A ke Baŋa Wɛ na we a ke tei maama to ye ya ta wora de zem maama.#2 Tigisim 5:10

6Isarele tiina bam déem ya zege Jaakan dwi tiina buli sem seeni mo ba vo ba yi Mosera. Ba na yi da to mo Aron tega ye ba suli‑o jei sem konto ne. O bu Eleaza ma leiri o yuu ne o ji Wɛ kaanem nakwe tu. 7Ba ma zege dáane ba vo Gudigoda. Ba daa ma zege Gudigoda ne ba vo ba yi Jotibafa, mɛ bu-nwaro na daga da to.

8Ka maŋa kam ne, Baŋa Wɛ ma pɔɔre Levi dwi dem o pa o tete, se ba taa zeeri dakaa kam, se ba kwori ba taa zege o yiga ne ba toŋe ba pa‑o ye ba kwei Wɛ yere ba ma swɛ Isarele dwi tiina bam maama swolim. Ba ta wora ba ke konto dwoŋi de zem maama. 9Konto ŋwaane mo tei Levi tiina bam ba jege se ba jwoŋi tega nenɛɛne ba chorro tem na nɛ ba nyem tega kam pɔɔrem baŋa ne tei to. Baŋa Wɛ tete mo ye ba nyem, nenɛɛne o na pwooli de-ba tei to.#Jeelim 18:20

10Amo nam ta ke da finna mo peo kom yuu ne, wea de tete maama, ne a ya na ke boboa kam ne tei to.#Nwoŋim 34:28 Baŋa Wɛ ma sɛ a wɛ-lworo kom pa se o wo chɔge abam. 11O ma ta de amo o we, a zaŋe a da abam yiga se á wane á zo á ta‑á tei tega kam nenɛɛne o na pwooli de á nabaara bam se o ke tei to.

Ta‑á kɔre-na Baŋa Wɛ

12Konto to, Isarele tiina bam, kikia dwi dɔ mo abam Tu Baŋa Wɛ wom beeri á tei ne? Ko ye se á ta‑á kɔre á Tu Baŋa Wɛ wom, se á ta‑á tɔge o chwei sem, se á ta‑á swoi‑o lanyerane, se á daare á ta‑á toŋe á pa‑o de á bochare de á boboŋa maama mo,#Mika 6:8 13ye á toŋe á tɔge o nia de o bera yalo maama amo na pɛ abam zem to. Á ná seene á ke konto dwoŋi, á ŋwea wó ke lanyerane ko pa abam. 14Chega ŋwaane to, abam Tu Baŋa Wɛ wom mo tei wɛyuu baŋa kam maama, dedaane logo baŋa de kolo maama na wo ko wone to. 15Baŋa Wɛ boboŋa nam dɛ á nabaara bam se o taa jege ba swono. O ma daare o kuri abam balo na ye ba bia to logo baŋa dwi maama wone, se á ta‑á ye wonto tete nyem, nenɛɛne á ta na ye tei de zem maama to.#Nwoŋim 19:5 16Konto to, kwɛ-na á bochara ne Wɛ na pɛ abam ni se á ke tei to, se á daa yé ke zwabania. 17Kokuri, abam Tu Baŋa Wɛ wom mo tei wa maama. O maa ye yuu tiina maama Yuu-tu. O ye Wɛ kamunu ye o tiini o jege foone. Wonto nam ba kuri nɔɔna daane de o na bore ba bora tei to ye o ba jwoŋi dim.#Kikia 10:34 18Ko ná ye botara de kadeina, o yeini o toŋe de chega mo o pa-ba.#Lei 68:5 O ta kwori o swoi veira balo na zoore á wone to, ye o woli-ba de wodiiru de gwaaro. 19Abam de jege se á ta‑á swoi veira mo, á de déem na ye veira Ejipti teo kom ne to ŋwaane. 20Ta‑á kɔre-na á Tu Baŋa Wɛ wom ye á toŋe á pa‑o. Ta‑á sale-na wonto. Á ná gwoni ni de nɔɔno, se á ma Baŋa Wɛ yere dem yerane á du duuri. 21Wonto mo ye wolo á na jege se á ta‑á tei‑o to. O toŋe wo-kenkagela na jege foone to á yibia ne se o ma jwoŋi abam. 22Á nabaara bam déem zaŋe ba vo Ejipti teo kom ye ba ye nɔɔna fuserepɛ yerane mo.#Pulim 46:27 Leile konto abam Tu Baŋa Wɛ wom pɛ se á kɔgɔ kom puli ko daga ne wɛyuu chalechwe sem na ye tei to.”

Currently Selected:

Nia Gulim 10: KBG

Highlight

Copy

Compare