Nia Gulim 12

Baŋa Wɛ zula jeiga kam

1“Wɛ nia yam de o chullu tem mo tento. Ta‑á yei-na se á ta‑á tɔge-ya maŋa kalo maama á na zoore logo kolo Baŋa Wɛ na pɛ abam se á ta‑á tei to wone. Wonto maa ye á nabaara Baŋa Wɛ wom mo.

2Abam ná tu á ba á zeili logo kom dwi tiina bam, se á chɔge jei selo maama ba na yeini ba kaane ba jwona da to. Ko ná ye peero yuu ne, naa zwonnu baŋa ne, naa tangwana baŋa ne, á jege se á yɔɔre á chɔge ba jwona kaanem jei sem maama mo. 3Mage-na ba kaanem bimbina yam á de tega ne, se á daare á lɔ kandwa yalo ba na chwi ba jwona ŋwaane to. Gwoni-na ba Asera nyenyego dɛ sem á de tega ne, se á daare á ke mini á zwɛ-se, ye á chɔge ba jwona yam maama pa se ya yera saare jei sem konto ne.#2 Pwa 18:4

4Abam nam ná zuli á Tu Baŋa Wɛ wom, se á yé ke nenɛɛne nɔɔna banto na zuli ba jwona yam tei to. 5Baŋa Wɛ wó kuri jeiga kadwoŋi Isarele dwi tiina bam maama tega kam wone, se ka taa ye o zoorem jei nɔɔna na wó vo ba zuli o yere da to.#2 Tigisim 6:6 6Dáane mo á wó ja á zwɛɛm kaanem vara bam á ja vo á kaane á pa‑o. Ko ta ná ye á kaanem dwi maama, de á Wɛ-teiri pɛɛra, de á jeŋa pɛɛra, de á ni-gwonim pɛɛra, de á wo-ywoŋo pɛɛra maama, ko ta woli de á vara bam na dɛ yiga ba lo bia balo to, á jege se á kwei-ya á vo jei sem konto á pa Baŋa Wɛ. 7Abam dedaane á sɔŋɔ tiina bam wó vo á jeini á Tu Baŋa Wɛ yiga ne á di wodiiru telo á na toŋe te ŋwaane to, ye á kwori á jege wopwolo Baŋa Wɛ na swɛ abam swolim to ŋwaane.#1 Samuwel 1:3

8Maŋa kam ná yia, á daa ba jege se á ta‑á ke nenɛɛne debam zem na yeini dé ke ye dé zuli Wɛ tei to. Leile konto nɔɔno maama yeini o zuli Wɛ ne o na lage tei to mo. 9Bɛŋwaane abam ta wo yi tega kalo á Tu Baŋa Wɛ wom na lage o pa abam se á ta‑á tei to se á daare á na wo-zuru ka wone. 10Á nam ná bɛ Jɔdan buga kam, ye á vo á jeini tega kam konto ne, Baŋa Wɛ wó pa se á dona daa yé daane abam pa se á sii de wo-zuru. 11Maŋa kam konto ne Baŋa Wɛ wó kuri jeiga dedoa se ka taa ye o zoorem jei nɔɔna na wó vo ba zuli o yere da to. Dáane mo á jege se á ja kolo maama amo na bere abam to á ja á vo á ma ke kaanem á pa‑o: vara zwɛɛm kaanem, dedaane á kaanem dwi delo maama, de á Wɛ-teiri pɛɛra, de á jeŋa pɛɛra, de á ni-gwonim pɛ-laaro tem. 12Dáane mo á wo di ywoni á Tu Baŋa Wɛ wom yiga ne, abam de á bia de á tontoŋena bam, baara de kaana maama. Levi dwi tiina balo na zoore abam tei ne to de wó tɔge de abam ba vo da, banto na ba jege ba tete tega se ba taa tei to ŋwaane. 13Ta‑á yei-na se ko dae we á ná yi mɛ maama, se á zwɛ varem á ma á ke kaanem da. 14Ko nam jege se á vo jeiga kalo yerane Baŋa Wɛ na kuri Isarele dwi tiina bam maama tega kam wone to, se á ke kaanem da á pa‑o, ye á daare á ke kolo maama amo na bere abam se á ke to.

15Chwoŋa nam wora se á go á sɔŋɔ-vara bam á di mɛ maama á na zoore to. Á wae á di á sui, ne á Tu Baŋa Wɛ wom na woli abam de vara balo to. Ko maa nye de á na lage á di woŋa naa feira ye nɔɔna maama jege chwoŋa se ba di, ba ná maŋe ba kwɛ ba tete Wɛ ŋwaane naa ba wo kwɛ ba tete mo de. 16Ko nam chula se á di vara bam jana mo.#Chullu 3:17 Á pa-na se jana bam lwo tega ne, ne á na wó lwo na á yage tei to. 17Ko daare ko ná ye wodiiru telo á na jege se á ma‑á ke kaanem to, ko chula se á di tento tem á sam dem ne. Ko ná ye á Wɛ-teiri pɛɛra yalo na ye mena naa sana naa nuga to, de á vara bam na dɛ yiga ba lo bia balo to, de á ni-gwonim pɛɛra, de á wo-ywoŋo pɛɛra dedaane á jeŋa pɛɛra yam maama, 18á jege se á kwei-ya á ja vo jeiga kalo á Tu Baŋa Wɛ wom na wó kuri to ye á daare á di-ya o yiga ne. Abam de á bia de á tontoŋena, baara de kaana maama, dedaane Levi tiina balo na zoore abam tei ne to mo wó vo á di ywoni Baŋa Wɛ yiga ne de kolo maama á na toŋe ko ŋwaane to. 19Ta‑á yei-na se á yé swei Levi dwi tiina bam ni ne maŋa kalo maama á na wó ta‑á zoore á tega kam ne to.

20Abam Tu Baŋa Wɛ wom ná tu o ba o pa se á laŋa kam yale nenɛɛne o na pwooli o pa abam tei to, pa se á fera zo nɔna dim, á wae á done á sui. 21Jeiga kalo Baŋa Wɛ na wó kuri se nɔɔna taa zuli o yere da to ná tiini ka ye yiga yiga de abam, á wae á le varem vara balo Baŋa Wɛ na pɛ abam to wone á goe ye á daare á di á sam ne á sui, ne amo na bere abam tei to. 22Ko maa nye de á na lage á di woŋa naa feira ye nɔɔna maama jege chwoŋa se ba di, ba ná maŋe ba kwɛ ba tete Wɛ ŋwaane naa ba wo kwɛ ba tete de. 23Ko nam chula se á di vara bam jana mo, kokuri ŋwea kam mo jege kuri jana bam ŋwaane. Ko nam dae se abam di ŋwea kam dedaane nɔna yam. 24Yé kwei-na jana bam á ma á ji wodiu. Nam kwei-na-ba á lwo tega ne, ne á na wó lwo na á yage tei to. 25Á ná seene á ve jana bam dim, ko wó pa se Baŋa Wɛ wo pwoli lanyerane. Á ŋwea maa wó ke lanyerane ka pa abam de á kwaga kam maama.

26Kwei-na á Wɛ kaanem pɛɛra yam de á ni-gwonim pɛɛra yam á ja á vo jeiga kalo Baŋa Wɛ na wó kuri to. 27Ko ná ye zwɛɛm kaanem, se á zwɛ varem wom Baŋa Wɛ kaanem bimbini dem baŋa ne, nɔna yam de jana bam maama. Ko nam ná ye kaanem delo á na wó di de nɔna yam to, á jege se á lwo jana bam bimbini dem baŋa ne á yage mo.

28Ta‑á yei-na se á ta‑á sɛ Wɛ nia yalo maama amo na bere abam to, se ko pa á ŋwea ke lanyerane ka pa abam de á kwaga kam maama taa wuu, á kikia na wó taa tɔge chwoŋa ye ya pwoli á Tu Baŋa Wɛ wom wo to ŋwaane.

Ba yé taa zuli jwona

29Abam ná lage á zo dwi-gɛ tiina logo kom, á Tu Baŋa Wɛ wom wó zeili-ba á yiga ne pa se ba daare ba tega kam se á jwoŋi-ka á ta‑á tei. 30Baŋa Wɛ ná tu o ba o chɔge dwi-gɛ tiina bam konto, yé pa-na se ba soge abam se á tɔge ba jwona yam. Yé bwei-na nenɛɛne: ‘Nɔɔna banto yeini ba tɔge chwoŋa kɔ mo ba zuli ba jwona yam? Debam de lage dé ke konto dwoŋi mo.’ 31Abam ba jege se á zuli á Tu Baŋa Wɛ wom ne banto na zuli ba jwona yam tei to. Kokuri, dwi-gɛ tiina bam konto yeini ba ke totoŋ-zɔɔna yalo maama Baŋa Wɛ na chuli to ba ma zuli ba jwona yam. Ba bere ba zwɛ ba bia mo mini wone ba ma ke kaanem ba pa ba jwona yam.

32Ta‑á yei-na se á ta‑á tɔge Wɛ nia yalo maama amo na bere abam to. Yé zaŋe-na á woli kolokolo ya wone, nam yé le-na kolokolo ya wone á yage.

Currently Selected:

Nia Gulim 12: KBG

Highlight

Copy

Compare