Nia Gulim 9

Baŋa Wɛ zeina yam taane

1“Isarele tiina bam, cheigi-na! Abam zem lage á bɛ Jɔdan buga kam mo, se á zeili dwia yalo na daga ye ba ta dana ba dwoi abam to ba tega kam ne. Nɔɔna bam konto zoore te-fwaaro wone, te kabiri sem na diini wɛɛne vili vili se yi wɛyuu to mo. 2Ba maa dɔra ye ba ta dana. Ba ye nɔn-sawaara balo na nwoŋi Anaki dwi dem ne to mo. Abam nam nigi ba na tɛ ba taane we, ‘Wɔ mo wó wane o dwoni de Anaki tiina bam?’ 3Nam lɔre-na we á Tu Baŋa Wɛ wom lage o da á yiga o bɛ buga kam, se o chɔge-ba mo. Ko wó taa nye de min-fɔrɔ na di wo-yɔɔro maama kula tei to mo. Maŋa kalo abam na wó vo á zo da to mo o lage o di-ba, se á wane-ba á zeili á daare á chɔge-ba lela ne Baŋa Wɛ na pwooli de abam tei to.

4 Baŋa Wɛ nam ná zeili-ba konto o pa abam, yé ta-na á tete ne we, ‘Debam totoŋ-ŋona ŋwaane mo Baŋa Wɛ kwei tega kanto o pa debam se dé taa tei!’ Aawo! Ko ye tega kam tiina totoŋ-lwanno ŋwaane mo o lage o zeili-ba. 5Ko dae á na ye nɔn-ŋona, ye á kikia tɔge chega to ŋwaane mo abam lage á jwoŋi ba tega kam á ta‑á tei. Ko ye banto wo-zɔɔna kikia ŋwaane mo Baŋa Wɛ wó zeili-ba, se ko ke ne o na pwooli de á nabaara Abaraham, de Izaak, de Jakob tei to. 6Lɔre-na we abam Tu Baŋa Wɛ wom ba lage o pa abam te-ŋoŋa kanto á na ye nɔn-ŋona to ŋwaane, se abam dae kɔtaa! Abam nam yɔɔre á ye zwabani-nyena mo.

Sabu-seŋa na-mɔra jwoni dem gula

7Guli-na abam déem na wo kagoa kam ne ye á tiini á pa se á Tu Baŋa Wɛ bane zaŋe tei to. Ko na zege dɛ delo ne abam na nwoŋi Ejipti ne, se ko yi á na zege ywo leile to, abam yɔɔre á lɔ o kwaga ne mo maŋa maama. 8Sinayi peo kom ne mo á tiini á chuchugi o bane pa se o lage se o chɔge abam. 9Amo déem diini peo kom yuu ne mo, se a jwoŋi kandwa-pelɛ selei selo baŋa ne Baŋa Wɛ ni-sɛɛm dem o na ke de abam to na popone de ke da to.#Nwoŋim 31:18 A ma maŋe dáane da finna, wea de tete maama, ye a ba di wodiu, a nam ba nyɔ na. 10Baŋa Wɛ ma kwei kandwa yalei yam o na mɛ o tete jeŋa o popone o nia yam maama ya baŋa ne to o pa-ne. Dɛ dem Isarele kɔgɔ kom maama na jeeri peo kom teiŋa ne to, mo Baŋa Wɛ zege peo kom yuu ne o ŋɔɔne min-vogo wone de abam.

11Amo na ke da finna peo kom yuu ne wea de tete maama to, mo Baŋa Wɛ kwei kandwa yalei yam, o na popone ni-sɛɛm dem ya baŋa ne to o pa-ne. 12Baŋa Wɛ déem ma ta amo o we, ‘Ke lela n tu tega se n yi nɔɔna balo n na jaane n nwoŋi Ejipti ne to tei. Ba chɔge ba tete mo, ye ba ta ke wɛleere. Ba gare ba yage ni delo a na pɛ-ba se ba taa tɔge to mo, ye ba ma sabu-seŋa ba ke jwoni ba pa ba tete.’

13 Baŋa Wɛ ta ma ta de amo o we, ‘Amo yei nɔɔna banto na ye balo to. Ba yɔɔre ba ye zwabani-nyena mo. 14Nam ta‑n zege dáa ne n nii-ne. A lage a chɔge-ba mo se ba yere saare logo baŋa maama ne. Amo laam maa wó zege nmo baŋa ne, a pa se te-fɔrɔ bobo de nmo kwaga kam. Banto teo kom maa wó taa daga ye ko dana ko dwoi nɔɔna banto na ye tei leile to.’

15Amo ma seene a pipiri a zege peo kom yuu ne a tu tega, ye a zei kandwa-pelɛ selei selo baŋa ne ni-sɛɛm dem na popone de ke da to. Peo kom nam ya ta yɔɔre ko di de min-vogo mo. 16Amo na seene a nii to, a nɛ sabu-seŋa na-mɔra kalo abam na mɔɔne se ka taa ye á jwoni to. A ta nɛ we á ke lela á ywori Baŋa Wɛ chwoŋa wone ye á ke wɛleere o yiga ne. 17A na nɛ konto to, mo a de yɔɔre a zeiŋi ni-sɛɛm kandwa yalo a ya na zei to wɛɛne, ye a feiri-ya tega ne a lɔ. Abam yibia ne mo a ke keim dem konto.

18Amo daa ma vwi a yibia tega ne Baŋa Wɛ yiga ne pa se da finna maama wone a ba di kolokolo, a nam ba nyɔ na, wea de tete maama. A ke konto bɛŋwaane abam ke wɛleere delo Baŋa Wɛ na yɔɔre o chuli to ye á pa se o bane tiini de zaŋe. 19Foone ya tiini de jege-ne mo de Baŋa Wɛ na wó ke abam tei to ŋwaane. O bane déem tiini de zaŋe mo ye o boŋe se o yɔɔre o chɔge abam. De ko de, a na lwoori Wɛ to, o cheigi-ne. 20Baŋa Wɛ bane ya ta zaŋe de Aron de mo ye o boŋe se o chɔge wonto de. A maa na lwoori Wɛ a pa Aron to, Baŋa Wɛ déem sɛ a wɛ-lworo kom konto de. 21A déem ma kwei woŋo kolo na pɛ se á ke wɛleere dem to, sabu-seŋa na-mɔra kam mo konto. A ma nyeene-ka, ye a daare a nɔne-ka mura-mura. A laam ma kwei-ka a dole a yage bu-dura ne pa se na bam zeŋe-ka ba ja ba viiri.

22Abam déem ta na vei á yi Tabera ne, de Massa ne, de Kiberof-Hataava ne to, á pɛ se Baŋa Wɛ bane zaŋe mo. 23Abam nam na yi Kadese-Baranea ne to mo Baŋa Wɛ pɛ abam ni o we, ‘Zo-na tega kalo a na pɛ abam to á kwei-ka á ta‑á tei.’ Abam ma ve Baŋa Wɛ ni dem konto, ye á wo pɛ‑o chega. 24Chega to, ko zege a na lɔre abam maŋa kalo ne to, á yɔɔre á ye balo na ve Baŋa Wɛ ni to mo.

25Konto ŋwaane nam mo pɛ se amo de to Baŋa Wɛ yiga ne, ye a ja o teiŋa da finna, wea de tete maama. Ko maa ye o na ti yiga se o chɔge abam de á na pɛ se o bane zaŋe to ŋwaane mo a ke konto. 26Amo ma lwoori Baŋa Wɛ ye a we, ‘Yuu-tu Baŋa Wɛ, ja! Yé chɔge nmo tete nɔɔna bam. Ba ye nmo nyɔn-mage nɔɔna balo n na kwei n dam-fɔrɔ kom n ma‑n vere-ba n ja n nwoŋi Ejipti teo ne to mo. 27Guli n tontoŋena Abaraham, de Izaak, de Jakob ni ne, se n yé jeeli nɔɔna banto wo-dɛɔ de ba keim-lwanno, de ba wɛleera yam. 28Nmo nam ná chɔge nɔɔna banto, Ejipti tiina bam wó ta we nmo wo wane n nɔɔna bam se n ja n zo tega kalo n na gwoni ni se n pa-ba to. Ba ta wó ta we, “Baŋa Wɛ na chuli o nɔɔna bam to ŋwaane mo o jaane-ba o vo kagoa kam wone se o go-ba!” 29Nam nii! Nɔɔna banto ye nmo tete nɔɔna balo n na kuri se ba taa ye nmo nyɔn-mage nɔɔna to. N tɔge n dam baŋa ne n toŋe wo-kamunnu n ma‑n ja-ba n nwoŋi Ejipti ne n ba ywo.’ ”

Currently Selected:

Nia Gulim 9: KBG

Highlight

Copy

Compare