Nia Gulim 1

Wɛ pɛ Isarele tiina bam ni se ba yage Sinayi jei sem

1Moses déem na ŋɔɔne tetei maama de Isarele tiina bam ye ba ya ta wo kagoa kam wone to mo popone te tigi tɔnɔ konto wone. O na ŋɔɔne de-ba to, de ba ya ta wo Jɔdan buga kam wɛ-puli seeni ba bwola de Sufa teo kom. Ba maa wo bwol-fɔrɔ kom ne. Paran wo daa dedoa ne mo. Tofeli, de Laban, de Hazerofa dedaane Dizahabi maa wo kakam daa ne. 2Nɔɔno ná zege Sinayi#1:2 Sinayi: Hiburu = Horeb (Sinayi yere dedwoŋi) peo kom ne o tɔge Edom peero chwoŋa kam se o vo Kadese-Baranea, ko yeini ko ye da fuga-dedoa mo o wó ma o yi da. 3Ko nam na ke tei to, ko ye bena finna bene dem chane fuga-dedoa boboa dɛ dem ne mo Moses déem tage de Isarele tiina bam kolo maama Baŋa Wɛ na pɛ‑o ni se o ta o bere-ba to. 4Konto maama de Moses ya maŋe o di Amori tiina Pɛ Sihon na di o paare Hesebon ne to mo jara wone. O ma di Basan teo Pɛ Oga de jara wone. Oga paare dem maa di Asetarof dedaane Ederi teene dem ne mo.#Jeelim 21:21-35

5Moses na bobo se o taa maŋe Wɛ ni taane dem se nɔɔna bam lɔre to, de ba ya ta wo Jɔdan buga kam wɛ-puli seeni mo. Moaba laŋa kam ne mo konto. O ma ta o we:

6“Debam ya ta na wo Sinayi Peo kom teiŋa ne to, mo debam Tu Baŋa Wɛ tage debam o we: ‘Abam tiini á jeini ywo-seeni á dáane. 7Zaŋe-na á gɔ á vwoa yam se á ta‑á vei Amori tiina zwonnu laŋa kam ne, dedaane teene delo maama na gilimi jei sem konto to. Ko nam ye maama se ko taa vei peero tem laŋa kam maama mo. Ta véi-na á yi wɛ-zoore seeni bwollu tem, dedaane tega-kuri seeni kagoa kam, ko ta woli de teene delo na wo Mediterania naneo kom ni ne to. Véi-na jei selo maama Kanaan tiina na zoore to dedaane Lebanon laŋa kam, se á kɛ á yi Yuferata buga kam seeni. 8Nii-na ywo! Amo Baŋa Wɛ kwei tega kanto mo a pa abam. Laam zo-na ka wone á kwei-ka á ta‑á tei, se amo déem maŋe a gwoni ni mo de abam nabaara Abaraham, de Izaak, de Jakob se a kwei tega kam konto a pa-ba se ba de ba kwaga kam taa tei.’ ”

Ba kuri yiga tiina

9“Dé ya ta na wo Sinayi Peo kom ne to, mo amo tage de abam a we, ‘Ko tiini ko chamma ko gaale se amo yerane taa nii abam baŋa ne. 10Abam Tu Baŋa Wɛ mo pɛ se abam laam tiini á puli dedɛ nenɛɛne chalechwe sem na daga tetei to.#Pulim 15:5 11Baŋa Wɛ nam gwoni ni dedaane dé nabaara bam we o wó pa se dé puli dedɛ. Wɛ wó swɛ abam swolim se o pa á dwi dem puli kuni moro mo. 12Abam na jege á taana de á ni-kantɔgɔ á daane-ne tei to, amo yerane laam nam wó ke tetɛ mo se a taa nii á baŋa ne? 13Nam kuri-na nɔɔna balo na jege swa de yi-poro to se ba nwoŋi á dwi maama wone. Ba wó taa ye balo á na yei ba wo lanyerane to. Amo laam wó pa-ba dam se ba taa ye á yuu tiina.’

14Tɔ. Abam déem ma sɛ we boboŋe dem konto lana mo se dé ke. 15Amo ma le nɔɔna bam konto na ye yuu tiina to á dwia yam wone. Banto jege swa mo ye á yei ba wo, ye a daare a pa-ba dam se ba taa nii á baŋa ne. Ba badwonna ma ji jar-keira yiga tiina balo na nii nɔɔna moro, naa nɔɔna bi, naa nɔɔna finnu naa nɔɔna fuga baŋa ne to. Badaara de ma ji dedɛɛra á dwia yam wone. 16Ko ná ye balo na wó taa kwɛ á taana to, amo déem pɛ-ba ni a we, ‘Zuri-na á yera se á cheigi nɔɔna bam taane dwi maama se á daare á ma á bore bora á pa-ba. Ko ná ye Isarele dwi tu de o dwoŋi mo jege taane, naa ko ná ye Isarele dwi tu de veiru wodwoŋi, se á yé kuri-ba daane. 17Ko ná maŋe ko ye naduna naa nabwona de, se á yé kuri-ba daane de á na bore ba bora tei to. Ko dae se abam taa kɔre nɔɔna yia de taane dim. Ko ye Wɛ mo wó pa se á na boboŋa se á bore chega bora. Taane delo nam ná dana de dwoi abam jaanem, se á ja-de á ba á pa amo se a nii de baŋa ne.’#2 Tigisim 19:8-10

18Ko maama wone a maŋe a ta a bere abam kolo maama á na jege se á ke to mo.”

Nɔɔna vei ba nii Kanaan tega kam

Jeelim 13:1-33

19“Dé déem ke kolo Baŋa Wɛ na pɛ debam ni se dé ke to. Dé ma zege Sinayi peo kom seeni dé vo dé tɔge kagoa kam wone ka na yala ye ka jege foone dedɛ ka pa debam to. Dé ma tole konto taa dé vo dé twɛ Amori tiina zwonnu laŋa kam, ye dé yi Kadese-Baranea ne. 20Amo déem ma ta de abam a we, ‘Abam laam tu á twɛ Amori tiina bam zwonnu laŋa kam mo. Debam Tu Baŋa Wɛ wom laam nam lage o kwei-ka mo o pa debam. 21Chega to, Baŋa Wɛ maŋe o kwei tega kam o ke á jeŋa ne. Nam zaŋe-na á vo á zo ka wone á jwoŋi-ka á ta‑á tei. Baŋa Wɛ wom á nabaara bam na tɔge to maŋe o ta abam se á ke konto mo. Yé ta‑á kɔre-na foone. Yé pa-na se á vɔna pare.’

22Abam maama déem ma ba amo tei ye á we, ‘Nam pa se dé toŋe nɔɔna badwonna se banto da yiga ba vo ba ŋɔ ba nii logo kom. Ba laam maa wó wane ba jwoori debam tei ba pa dé lɔre chwoŋa kalo chekke dé na wó tɔge to, dedaane teene delo dwi na wo jei sem ne to.’

23Abam boboŋe dem déem maa lamma amo tei ne. A ma seene a kuri nɔɔna fuga-balei se ba nwoŋi abam dwia yam maama wone, dwi maama nɔɔno dedoa. 24Nɔɔna bam konto de déem ma zaŋe ba vo ba tole zwonnu laŋa kam ba vo ba yi Esekola nabara kam. Ba ma fɔge ba nii jei sem maama. 25Ba ma ja tega kam wodiiru tedwonna ba ba debam tei ye ba we, ‘Tega kalo debam Tu Baŋa Wɛ na lage o pa debam to tiini ka lamma dedɛ.’ ”

Nɔɔna bam ya lɔge Baŋa Wɛ kwaga ne

26“Ko nam na ke tei to, abam déem ma lɔ á Tu Baŋa Wɛ ni dem kwaga ne ye á ve se á zo logo kom wone. 27Abam maa wo á vwoa yam ne ye á nyenyɔna da-tei ne á we, ‘Ko ye Baŋa Wɛ na chuli debam to ŋwaane mo o jaane debam o ja o ba o ke Amori tiina bam jeŋa ne se ba go debam. 28Dé daa bá wane dé vo jei sem konto ne. Dé na toŋe dé chorro telo to jwoori mo ye ba ke foone debam kuri ne. Ba maa we, tega kam konto tiina bam damma mo ye ba daa ta dɔra ba dwoi debam. Ba maa zoore teene delo na lɔge de dam ye de kabiri sem diini vili vili se yi wɛyuu to mo. Nɔn-sawaara de maa wo ba wone.’

29Amo déem ma ta de abam a we, ‘Yé ta‑á kɔre-na foone de nɔɔna bam konto. 30Se abam Tu Baŋa Wɛ wom wó tɔge abam yiga se á vo. Wonto mo lage o jaŋe o pa abam, nenɛɛne á déem na nɛ o na toŋe tetei maama o pa abam Ejipti ne to.#Nwoŋim 14:13 31Kagoa kam yuu ne de, abam daa ta nɛ Baŋa Wɛ na nii á baŋa ne tetei maama to. O maa jege abam konto mo ga taa, o ba o yi ywo-seeni, nenɛɛne kwo na jege o bu ye ba via chwoŋa yuu ne tei to.’

32Amo déem tage konto maama de abam ye á ta wo sɛ se á ke á wo-dedoa de á Tu Baŋa Wɛ. 33Baŋa Wɛ ya yeini o da abam yiga mo o kwɛ á chwoŋa kam, ye o beeri jei selo á na wó pu á vwoa to. Tete maama ne o wo mini wone o tɔge á yiga, se ko daare wea ne o yeini o wo kunkwoŋo wone mo o ma o bere abam chwoŋa se á ta‑á tɔge ka wone á via.

34 Baŋa Wɛ déem na nigi á nyenyɔna kam to, o bane ma zaŋe. O ma du duuri o we, 35‘Amo bá sɛ se nɔɔna banto dedoa zo te-ŋoŋa kalo a na pwooli de ba nabaara bam se a pa-ba to, ba na ye nɔn-lwanno to ŋwaane, 36ko ná dae Jefunɛ bu Kaleb yerane. Nɔɔna balo zem na wora to wone wonto yerane mo wó de o naga tega kam konto ne. Amo nam wó kwei-ka a pa o de o dwi dem, kokuri to wonto mo kwei o bochare maama o ma o tɔge-ne.’

37Ko déem ye abam ŋwaane mo Baŋa Wɛ bane zaŋe dedaane amo. O ma ta de amo o we, ‘Nmo tete de bá zo tega kam wone. 38Ko daare nmo zeinnu Josua na ye Nun bu to nam mo wó zo ka wone. Pa se wonto taa jege baare, se ko ye wonto mo wó tɔge Isarele tiina bam yiga se ba zo ba jeini tega kam ne ba taa tei-ka.’

39 Baŋa Wɛ déem ma daare o ta de nɔɔna bam maama o we, ‘Se ko ná ye abam bia balo ta na muri ye á ya kɔre we á dona wó go-ba to, de balo ta na wo yi se ba taa yei lam de lwarem daane to, banto mo wó wane ba zo tega kam wone. Amo wó pa-ba chwoŋa se ba taa tei tega kam. 40Ko daare ko ná ye abam, jwoori-na á pipiri á kwei chwoŋa kalo na maa vei Nane-soŋo kom seeni to se á zo kagoa kam wone á ta‑á via.’

41Á na nigi konto to, á ma leiri-ne á we, ‘Debam seene dé ve dé Tu Baŋa Wɛ ni dem. De laam nam wó vo se dé ke jara yam, nenɛɛne o na pɛ debam ni se dé ke tetei to.’

Abam déem tage konto dwoŋi ye á daare á kwei á jara zela yam se á vo jara-keim ne, kokuri to á ya boŋe we ko bá taa chana se á vo á jwoŋi zwonnu laŋa kam. 42Baŋa Wɛ ma ta de amo o we, ‘Nam kaane nɔɔna bam se ba yé zaŋe ba vo ba ke jara yam, bɛŋwaane amo bá taa wo ba tei ne. Ba dona maa wó da ko ŋwaane ba di-ba.’

43Amo ma ta konto a bere abam, ye á wo sɛ a taane dem. Abam na zeiŋi á tete to ŋwaane mo á nwoŋi Baŋa Wɛ ni dem kwaga ne ye á vo zwonnu laŋa kam ne se á kwaare jara yam. 44Amori tiina bam na zoore jei sem konto ne to déem ma nwoŋi ba jeeri abam. Ba ma zeili abam nenɛɛne twe mo ba chiŋi ba yage tei to. Ba ma pare abam konto taa ba vo ba yi Edom laŋa kam. Ba na yi Horama teo kom to dedaane ba di abam maama. 45Abam déem ma jwoori ye á daare á vo Baŋa Wɛ yiga ne á keeri á lwoori wolim o tei ne. O nam wo sɛ se o cheigi á wɛ-lworo kom. 46Abam déem ma jeini Kadese ne á dáane.”

Currently Selected:

Nia Gulim 1: KBG

Highlight

Copy

Compare