Nia Gulim 2

Ba kare kagoa kam ne ba beera

1“Dé déem ma ke tei Baŋa Wɛ na tage de amo to. Dé ma zaŋe dé pipiri de kwei chwoŋa kalo na maa vei Nane-soŋo kom seeni to, se dé vo dé zo kagoa kam wone. Dé ma tiini dé beeri taa dé jijira ye dé kekare dé kaare Edom peero tem laŋa kam ne.

2 Baŋa Wɛ déem ma ta de amo o we:

3‘Abam tiini á kekare peero tento laŋa kam ne á dáane dedɛ. Ko laam maŋe mo se á pipiri á ta‑á vei baŋa seeni. 4Nam pa nɔɔna bam amo nia yanto: Abam laam lage á tɔge Esawu dwi tiina bam tega kam ne mo á kɛ. Banto ye á chorro ye ba zoore Edom laŋa kam ne. Ba wó taa kɔre foone de abam. Nam zuri-na á yera de-ba. 5Yé zaŋe á gwe ba jara. Kokuri to, amo ba lage a kwei ba tega kam a pa abam, de ka na-baare yi dedoa de. Amo maŋe a kwei Edom peero laŋa kam mo a pa Esawu dwi dem se ba taa tei. 6Á ná maa tɔge ba tega kam wone á kɛa, á wó wane á ma sabu-seŋa á yeigi wodiiru dedaane na ba tei ne.’

7Abam Tu Baŋa Wɛ wom maŋe o ke zaane abam yuu ne pa se kolo maama á na jege á toŋe to ke lanyerane. Á déem na beeri kagoa kanto jei sem maama wone to, o jege abam mo o nia. Bena finna yanto maama wone o wo abam tei ne, ye á nae woŋo kolo maama á na gɛ to.

8Konto ŋwaane mo, dé tɔge Edom laŋa kam wone mɛ dé chorro Esawu dwi tiina bam na zoore to dé kɛ. Dé ma lɔŋe chwoŋa kalo na tɔge Araba te-kampare ka kɛ to. Chwoŋa kam konto zege tega-kuri seeni mo Elafa de Ezion-Gebera ne. Dé laam ma pipiri dé kwei kagoa chwoŋa kalo na maa vei Moaba to.

9 Baŋa Wɛ daa ma ta de amo o we, ‘Yé daane-na Moaba tiina bam, se ba ye Lot dwi dem mo. Yé kwaare-na jara de-ba, se amo mo maŋe a kwei Ara jei sem a pa-ba. A ba lage a pa abam ba tega kam.’

10Emi tiina déem ya mo zoore laŋa kam konto ne. Banto déem jege dam ye ba kɔgɔ kom gaale. Ba maa ye nɔn-sawaara se ko maŋe de Anaki tiina bam na ye tei to. 11Nɔɔna déem yeini ba pa se Emi dwi dem de Anaki dwi dem ye Refayi tiina mo. Moaba tiina bam de maa bwoi-ba we Emi tiina. 12Ko nam ná ye Edom laŋa kam, Hori tiina mo ya zoore jei sem konto ne. Esawu dwi tiina bam laam ma zaŋe ba baŋa ne ye ba daare ba zeili-ba. Ba na chɔge ba teo kom konto to, ba ma jwoŋi ba tega kam ba tei, se ko maŋe de Isarele tiina bam de na lage ba ke tei ba zeili ba dona ba daare ba jwoŋi tega kalo Baŋa Wɛ na kwei o pa-ba to.

13 Baŋa Wɛ laam ma pa debam ni se dé zaŋe dé bɛ Zereda nabara kam. Debam déem ma seene dé ke konto. 14Bena fintɔ-nana tetare ne mo dé kwei dé ma dé zege Kadese-Baranea ne dé vo dé yi Zereda nabara kam dé bɛ. Ko déem ke konto ye balo maama ya na maŋe ba yi jara-keim boboa ne to laam tu ba te, nenɛɛne Baŋa Wɛ déem na dugi duuri we ba lage ba te kagoa kam ne tei to mo. 15Ko déem ye Baŋa Wɛ tete jeŋa mo o mɛ o chɔge-ba, se ko pa ba maama te dedoa dedoa ba vo ba ti.

16Jar-keira bam konto dwi dem na tega maama ye ba wolowolo daa tera Isarele tiina kɔgɔ kom wone to, 17mo Baŋa Wɛ tage o bere amo o we, 18‘Zem dɛ dem ne mo abam wó tɔge Moaba tiina teo Ara seeni á kɛ. 19Á laam maa wó zo Amon tiina laŋa kam. Ta‑á yei-na se á yé daane-ba. Yé kwaare-na jara de-ba, se amo ba lage a pa abam Amon tiina tega kam. Amo maŋe a kwei tega kam konto mo a pa Lot dwi tiina bam se ba taa tei-ka.’

20Jei sem konto maama de déem ye Refayi tiina tega mo. Banto badwonna maa zoore ka wone. Amon tiina bam déem jege-ba ba bwoi we Zamzummi tiina mo. 21Banto déem jege dam ye ba kɔgɔ kom gaale. Ba maa ye nɔn-sawaara se ko maŋe de Anaki tiina bam na ye tei to. De konto maama, Baŋa Wɛ mo chɔge-ba pa se Amon tiina bam wane ba zeili-ba ye ba daare ba jwoŋi ba tega kam ba tei. 22Baŋa Wɛ déem ya maŋe o ke konto dwoŋi mo o woli Esawu dwi tiina bam na zoore Edom ne to. O déem ya chɔge Hori tiina bam mo pa se Edom tiina bam wane ba zeili-ba ye ba daare ba jwoŋi ba tega kam. Ba ta zoore da de zem maama. 23Ko daa ta ná ye Awa tiina bam, banto déem zoore te-balwa balo na wo Mediterania naneo kom ni ne to, se ko taa vei Gaza teo kom seeni. Filisi tiina bam na nwoŋi Kiriti ne to ma go-ba, ye ba daare ba jwoŋi Awa tiina tega kam ba zoore da.

24 Baŋa Wɛ ta ma ta debam o we, ‘Zaŋe-na á kwaleme á zela yam se á vo á bɛ Aranon nabara kam. Nii-na ywo! Amo mo lage a kwei Hesebon teo Pɛ Sihon a ke abam jeŋa ne se á wane‑o á di. A maa wó kwei o tega kam de a pa abam. Véi-na á kwaare jara ded‑o, se á daare á jwoŋi o jei sem á ta‑á tei. 25Ko zege zem dɛ dem ne se ko taa via, amo lage a pa se logo baŋa teene dem maama taa kɔre abam foone mo. Ba ná maŋe ba ni abam ŋwa, ko ye se ba yera mo taa sae vare-vare ye ba bochara di abam ŋwaane.’ ”

Ba di Pɛ Sihon jara baŋa ne

Jeelim 21:21-30

26“Debam déem ta na wo Kedemofa kagoa kam ne to, mo amo toŋe kwora a pa Hesebon teo Pɛ Sihon. A déem tage ded‑o mo se o pa dé ke ni-sɛɛm daane se jara yé taa wora dé tetare ne. 27A ma ta a we, ‘Debam ná maa tɔge nmo teo kom ne dé kɛa, dé wó kwei chwoŋa mo yɔrɔ-tɔtɔ dé taa via. Dé ba lage dé ywori jazem naa jagwia seeni. 28Wodiu kolo maama dé na wó di, dedaane na balo dé na wó nyɔ to, de wó yeigi abam tei ne. Nam pa debam pwola se dé tɔge á jei sem ne dé kɛ. 29Debam nam jege se dé vo dé yi Jɔdan buga kam mo se dé bɛ-ka dé kɛ. Nam ta‑á yei-na we, Esawu dwi tiina balo na zoore Edom ne to dedaane Moaba tiina bam na zoore Ara ne to maŋe ba pa debam pwola pa dé tɔge ba laŋa kam ne dé kɛ.’

30Pɛ Sihon déem ma ve amo kwora kam konto. O wo sɛ se o pa debam pwola se dé tɔge o tega kam baŋa ne dé kɛ. Kokuri, debam Tu Baŋa Wɛ déem mo pɛ se Sihon wo kom ke dam, se o na pwola o ke‑o á dam kuri ne, nenɛɛne ko laam na ye tei leile tento to.

31 Baŋa Wɛ laam ma ta de amo o we, ‘Nii-na! Amo lage a kwei Pɛ Sihon de o teo kom mo a ke abam jeŋa ne. Nam véi-na yiga se á mage jara de-ba á jwoŋi ba tega kam á ta‑á tei.’

32Jayaza ne mo Pɛ Sihon de o nɔɔna bam déem nwoŋi se ba kwaare jara dedaane debam. 33Debam Tu Baŋa Wɛ ma kwei‑o o ke debam jeŋa ne. Dé ma mage‑o dé go, ye dé daare dé go o bia dedaane o nɔɔna bam maama dé woli da. 34Dé ma yɔɔre dé chɔge Pɛ Sihon teene dem maama dé ke-de Wɛ dam kuri ne. Dé ta ma chɔge de nɔn-bia bam maama: baara, de kaana dedaane bia. Nɔɔn-nɔɔno déem wo daare. 35Se ko ná ye ba vara bam dedaane ba jejegero tem, dé vere-te pa se te ji dé nyem mo. 36Debam Tu Baŋa Wɛ wom mo woli debam ye dé di teene dem maama. Ko na zege Arowa teo na wo Aranon bwolo kom ni ne to, dedaane teo kolo na wo bwolo kom tetare ne to, se ko taa vei Gilead laŋa kam to mo dé wane maama. Teo déem tera ko na dana ko dwoi debam wanem. 37Konto maama baŋa ne, dé ta sɛ mo se dé ke tetei dé Tu Baŋa Wɛ wom na bere debam to. Dé déem wo zo Amon tiina bam jei sem. Ko ná ye tega kalo na wo Jaboke nabara kam ni seeni to, de teene delo na wo zwonnu tem laŋa kam ne to, dé wo kwaare jara jei sem konto ne.”

Currently Selected:

Nia Gulim 2: KBG

Highlight

Copy

Compare