2 Tɛsaloni 2
2
Keim-lwanno tu taane
1Dé nu-bia bam, á yei we dé Teiru Yezu Krista wó jwoori o ba, ye Wɛ wó la debam o ke daane se dé taa wo Yezu tei ne.#1 Tɛsaloni 4:15-17 Dé nam lage dé kwoori abam 2se á yé pa á bochara taa di konto baŋa ne. Á yé zaŋe á pa á boboŋa vugimi de nɔɔna na tɛ ba we, dé Teiru Yezu dɛ dem maŋe de yi. Nɔɔna ná tɛ abam ba we, Wɛ Sin-laao kom pɛ-ba o kwora, naa ba ná we ko ye Wɛ chega mo ba bere abam, naa ba ná we ba jwoŋi tɔnɔ debam tei ne, 3se á yé pa nɔɔn-nɔɔno gane abam de wonnu tento dwoŋi. Kokuri, maŋa kalo nɔɔna dedɛ na wó ywori Wɛ kwaga ne to wó ke yiga ye dé Teiru wom dɛ-kamunu kom laam ba ko yi. Ko woli da, wolo wom na ye keim-lwanno tu to jege se o ba yiga. Wonto kweelim maama maa ye se Wɛ chɔge‑o. 4O wó pa se o tete taa dwoi wonnu telo maama nɔɔna na zuli to, de kolo maama ba na bwoi we, ba wɛ to. O ta wó kwori o done wonnu tem konto maama. O maa wó paale o zo o jeini Wɛ diga kam ne ye o bere o tete we, omo mo ye Wɛ.#Izaya 14:12-15 5Amo ta na wo abam tei ne maŋa kalo to, a yeini a bere abam wonnu tento. Á nam wo guli-te na?
6Woŋo kodwoŋi ta wora ko na chege wonnu tento chwoŋa se te yé ke leile, ye á yei ko ni ne. Ko daare maŋa kam ná seene ka yi, keim-lwanno tu wom laam wó ba se nabiina lɔre‑o jaja. 7Keim-lwanno dam delo na seigi nɔɔna yia ne to maŋe de wora de chɔge nabiina. Ko nam ná ye wolo wom na wora o cho keim-lwanno tem chwoŋa leile se te yé tiini te ke to, konto tu wó taa wora se ko taa vei maŋa kam o na wó lage jeiga to. 8Maŋa kam konto ne mo keim-lwanno tu wom wó ba o taa wora pa se nabiina lɔre‑o jaja. Dé Teiru Yezu na wó jwoori o ba maŋa kalo to, o laam wó ma o ni-vio o wane wonto o di. Yezu na wó pɔpɔ o ba de nenɔŋa to mo wó pa se keim-lwanno tu wom yɔɔre o na chɔgem.#Izaya 11:4
9Maŋa kam keim-lwanno tu wom na wó ba o taa wora to, o wó jwoŋi dam setaana pɛ wom tei ne se o ma ke wo-kenkagela de totoŋ-kamuna dwi dwi yalo na dae chega to.#Matiyu 24:24 10O ta maa wó ke keim-lwanno dwi maama o ma gane balo na lage ba ga ba ŋwea Wɛ tei ne to. Ko wó ke-ba konto, ba na ba sɛ se ba jwoŋi Wɛ chega kam de swono se ko pa o jwoŋi-ba to ŋwaane. 11Ba na lage ba ve Wɛ chega kam konto to, o laam wó pa se ba boboŋa daa yeiri chega, ye ba sɛ ba tɔge kolo na ye vwa to. 12Wɛ nam wó ke konto se balo maama na wo sɛ o chega kam ye ba daare ba swoi puseŋa kikia to mo to de ba bora.
Pu-dɛa taane
13Dé nu-bia bam, dé jege se dé ke Wɛ lei maŋa maama abam ŋwaane, á na ye balo dé Teiru wom na swoi to. Ko zege boboa ne mo Wɛ kuri abam se o jwoŋi abam o yage. O dɛ o Sin-laao kom dam ŋwaane mo o pa á ji o tete nɔɔna, á na sɛ o chega kam de á wo-dedoa to ŋwaane. O tɔge tento baŋa ne mo o jwoŋi abam o yage. 14Wɛ na bwoŋi abam se á ta‑á ye konto to, o mɛ debam na tɔɔle o kwor-ywoŋa kam dé bere abam tei to mo se o pa á tɔge de dé Teiru Yezu Krista á na zula.
15Konto ŋwaane, dé nu-bia bam, fɔge-na á ja á boboŋa se á yé yage chega kalo dé na maŋe dé bere abam to, ko ná ye dé na maŋe dé wo abam tei ne ye dé ŋɔɔne kolo to, ko woli de dé na maŋe dé popone tɔnɔ kolo dé pa abam to de.
16-17Dé Teiru Yezu Krista, dedaane dé Kwo Wɛ wó zeini abam de boboŋ-dɛɛra se á ta‑á jege dam, se á wane á ta‑á tɔge chwo-laao de á kikia, de á ni taane maama. Wonto maŋe o jege debam swono ye o ke debam zaane, de o na pɛ dé jege baare delo na bá fɔge de ti to, dedaane teena yalo na ye chekke to.
Currently Selected:
2 Tɛsaloni 2: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
