2 Tɛsaloni 3
3
Wɛ-lworo taane
1Dé nu-bia bam, ko ta daare fee se dé popone dé woli da. Ta‑á lwoori-na Wɛ á pa debam, se dé Teiru wom kwor-ywoŋa kam jage ka yi jei maama, se nɔɔna daare ba sɛ-ka lanyerane, ne abam de na sɛ-ka tei to.#Matiyu 9:38 2Lwoori-na Wɛ se o jwoŋi debam nɔn-balwaaro jeŋa ne, kokuri ko dae nɔɔna bam maama mo sɛ Wɛ chega kam.
3Dé Teiru wom nam zege o chega wone de o na wó zeini debam tei to. Mo kokuri, o wó woli abam de dam, ye o che abam setaana pɛ dam wone. 4Á na ye dé Teiru wom nyem to mo dé jege abam chega we, á wora á tɔge dé na maŋe de bere abam kolo to, ye á ta wó ta‑á ke konto mo taa.
5Dé Teiru wom wó zeini abam, ye o pa á boboŋa tiini ya tɔge Wɛ swono kom, ye o daare o pa á zege lanyerane de pu-dɛa, ne Yezu Krista de na ye tei to.
Jawɔre-nyena taane
6Dé nu-bia bam, ko ná ye á nu-bu wolo maama na ye jawɔre-nyem ye o ba tɔge berem delo dé na pɛ abam to, se á lɔŋe konto tu. Ko ye dé Teiru Yezu Krista dam ŋwaane mo dé kaane abam konto. 7Abam nam yei lanyerane we, á jege se á ta‑á lwoni debam kikia na maŋe ya ye tei to mo. Dé déem na wo á tei ne to, dé ba jege jawɔrɔ. 8Dé wo jwoŋi dé ni-wodiu nɔɔn-nɔɔno tei ne zɛɛra ŋwaane. Dé nam tiini dé toŋe mo se ko chɛ dé yera wea de tete, se dé yé daane abam wolowolo wodiu ŋwaane.#Nehemia 5:18 9Ko nam dae we dé ya ba jege chwoŋa se dé daane abam konto. Dé déem nam lage se dé ke abam lanyerane se á wane á ta‑á lwoni dé kikia na ye tei to mo. 10Dé na wo abam tei ne to, dé yeini dé pa abam ni we, nɔɔno wolo ná ba lage totoŋa, konto tu ba jege chwoŋa se o jwoŋi o ni-wodiu nɔɔn-nɔɔno tei ne.#Memaŋa 10:4
11Dé wora dé tɛ taane dem konto, kolo ŋwaane dé lɔre we abam badwonna ye jawɔre-nyena mo. Konto dwoŋi nɔɔna bam yeini ba ba toŋa, ye ba kare jei maama ba gigili ba dwonna yia. 12Dé nam tiini dé kwoori nɔɔna bam konto dé Teiru Yezu Krista dam ŋwaane, se ba taa toŋe chemm se ba wane ba nii ba tete baŋa ne de ba ni-wodiu.
13Dé nu-bia bam, abam tete nam yé yage totoŋ-laaro keim, ko ná maŋe ko chana ko pa abam tei to de.#Galatia 6:9
14Abam wolo ná wora ye o wo sɛ debam na popone tɔnɔ konto wone dé bere kolo to, se á maane konto tu, se á wane á ja á tete ded‑o, se ko pa chaveera ja‑o. 15Á nam yé pa se o ji á dono. Ko nam maŋe se á kaane‑o, ne o ye á nu-bu mo tei.
16Dé Teiru wom mo ye bochare-zuru tu. O maa wó zeini abam se á ta‑á jege bochare-zuru maŋa maama wone, de kolo maama na ke abam to.
Dé Teiru wom taa wo á maama tei ne.
17Amo Pɔɔl mo jɔɔne abam. Amo tete laam mo popone konto de a jeŋa. A yeini a ke konto a twanno tem maama wone, se á lɔre we ko seene ko ye amo mo. A yeini a popone tento dwoŋi mo.
18Dé Teiru Yezu Krista zaane dem taa wo abam maama tei ne.
Currently Selected:
2 Tɛsaloni 3: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
