2 Tɛsaloni 1
1
1Amo Pɔɔl, dedaane Silas de Timoti mo popone tɔnɔ konto se dé pa abam Tɛsaloni tiina balo na ye Wɛ kɔgɔ kom wo nɔɔna ye á tɔge á ye dé Kwo Baŋa Wɛ de dé Teiru Yezu Krista nyem to.
2Dé Kwo Wɛ, de dé Teiru Yezu Krista wó pa abam zaane de yazura.
Lei keim dedaane wɛ-lworo
3Dé nu-bia bam, maŋa maama dé jege se dé ke Wɛ lei abam ŋwaane nenɛɛne ko na maŋe tei to, kokuri á na ke á wo-dedoa de Yezu tei to ke ko daŋe da-baŋa ne. Á maama tiini á swoi á dwonna lanyerane, ye á swono kom konto wora ko pula dedɛ. 4Á na ye konto dwoŋi to, dé yeini dé ta á taane dé bere Wɛ kɔgɔ kom na wo jeiga kalo maama ne to, ye dé jege teera abam ŋwaane. Dé tɛ-ba we, nɔɔna yeini ba bɛɛse abam ye á nae yaara dedɛ. Á nam ta zege lanyerane de pu-dɛa, ye á yɔɔre á tɔge Yezu de wo-dedoa.
5Abam na jege á tete konto dwoŋi to mo pae dé lɔre jaja we, Wɛ na wó di nɔɔna taane tei to wó yɔɔre ko tɔge chwoŋa chekke. Konto ŋwaane á wó na chega Wɛ yiga ne pa se á maŋe se á woli o paare dem wone, kokuri abam seene á nae yaara o paare dem konto ŋwaane. 6Wɛ nam zege o chega wone mo. O maa wó waare balo na jege abam ba yaare to pa se ba de jwoori ba na yaara. 7O ta maa wó woli abam balo na yaare to se á sii de á yaara yam, se ko woli de debam de. Wɛ wó ke konto maŋa kam o na lage o pa dé Teiru Yezu jwoori o ba se o veere o tete o pa nabiina to. Wonto wó nwoŋi Wɛ telaao de o malese dedɛɛra bam, 8ye min-vɔɛ zaŋe se kekare-ba. O maa wó waare balo na ve Wɛ to, ko woli de balo na wo sɛ omo kwor-ywoŋa kam to.#Izaya 66:15 9Nɔɔna bam konto dwoŋi wó na waarem, ne ko na maŋe de-ba tei to mo. Ba maa wó na lɛɛro se ko taa vei wuu. Ba ta maa wó pɔɔre ba yera dé Teiru wom tei ne, se ba daa yé na o paare dam-fɔrɔ kom.#Izaya 2:10 10Konto maama wó ke maŋa kalo dé Teiru Yezu na wó jwoori o ba to. Dɛ dem konto ne o wó na zula o tete nɔɔna bam tei ne. Balo maama na sɛ‑o to wó taa seini‑o lanyerane. Abam nam wó ta‑á wo banto wone, á na sɛ Wɛ chega kalo dé na bere abam to ŋwaane.
11Ko ye konto ŋwaane mo dé yeini dé lwoori dé Tu Wɛ wom maŋa maama dé pa abam, se o pa á maŋe de Wɛ chwoŋa tɔgem ne o na twori abam se á ta‑á ye tei to. Dé lwoori‑o se o pa abam dam, se á wane á tɔge chwo-laao nenɛɛne á boboŋa na lage tei to maama, ye á ke totoŋa yalo maama á wo-dedoa kam na wae ka pa á ke to. 12Konto mo wó pa dé Teiru Yezu taa nae zula abam ŋwaane. Abam de maa wó na zula, á na me ded‑o to ŋwaane. Dé Tu Baŋa Wɛ, de dé Teiru Yezu Krista na ke abam zaane to mo wó pa konto maama ke.
Currently Selected:
2 Tɛsaloni 1: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)