2 Pwa 6

Dwooru na puki na baŋa ne tei to

1Dɛ dedwe mo Wɛ sampwori kɔgɔ kom taga de Elisa ba we, “Dé tu, jeiga kalo debam na zoore ye n nii dé baŋa ne to daa ba daga ka pae debam. 2Konto to, pa debam chwoŋa se dé vo Jɔdan buga kam ni dé beeri jeiga kadwoŋi se dé taa zoore da. Dáane debam maama wó wane dé gwoni dɛ dé ma dé che jei se ko taa daga.” Elisa ma leiri-ba o we, “Véi-na á ke konto.”

3Sampwori sem wone dedoa ma ta de Elisa o we, “Jan ja, tɔge dé kwaga se dé vo.” Elisa ma leiri o we, “Tɔ. Amo wó tɔge a vo.”

4Ba ma vo ba yi Jɔdan buga kam ni, ye Elisa de tɔge o wora. Ba ma bobo se ba gwoni teeni dem. 5Ba dedoa na wora o gwoni tio naga to mo o dwooru wom le o to buga kam wone. O ma laare de kwor-dɛa o we, “Woo! Amo tu Elisa, dwooru wom ye a jene‑o mo.” 6Wɛ tontoŋeno Elisa ma bwei‑o o we, “Ko le ko to yei ne mo?” O ma bere‑o ko na to mɛ to. Elisa ma gwoni tio naga o de buga kam wone. O keim dem konto ma pa se dwooru wom puki na bam baŋa ne. 7Elisa ma ta de nɔɔno wom o we, “Laare n kwei-ko.” Nɔɔno wom ma tei o jeŋa o le-ko.

Elisa chege Siria jar-keira bam

8Maŋa de maŋa Siria teo pɛ déem yeini o kwaare jara de Isarele tiina bam mo. O ma yeini o bane de o nakwa ye o we, “A laga se dé jeeri-ba ywo naa ywo mo.”

9Wɛ tontoŋeno Elisa de déem ma yeini o toŋe ni o pa Isarele pɛ wom we, “Yé zaŋe n twɛ jeiga kam konto, se Siria jar-keira bam mo vei ba gilimi da.” 10Konto baŋa ne Isarele teo pɛ ma yeini o toŋe ni mɛ seeni Wɛ tontoŋeno wom na tage to se ko jeiga kam nɔɔna bam taa fɔge ba cho ba tete. Ko déem ke konto mo kuni dedɛ.

11Siria tiina pɛ wom boboŋa déem vugimi de keim dem konto. O ma bwoŋi o dedɛɛra bam ye o bwei-ba o we, “Abam wone wɔ tete mo nwoŋi a kwaga ne se o woli Isarele tiina pɛ wom?” 12Dedɛɛra bam wone dedoa ma leiri o we, “Dé tu, ko dae debam wolowolo mo ke konto. Ko ye Isarele tu Elisa wolo na ye Wɛ sampwora to mo tɛ woŋo maama o bere Isarele tiina pɛ wom. O bere o yei nmo na tɛ kolo maama n diga ne to de.” 13Pɛ wom ma ta o we, “Véi-na á beeri Elisa jei se a pa nɔɔna vo ba ja‑o.” Ba ma nii ba na‑o ye ba daare ba ta de pɛ wom we, “Elisa wo Dotan ne mo.” 14Pɛ wom ma toŋe o jar-keira dedɛ, de ba sisei, de ba torokooro se ba vo jeiga kam konto. Tete ne ba ma vo ba yi Dotan, ye ba kaare teo kom ba pu.

15Tega na poore tetete to mo Elisa tontoŋeno wom zaŋe o nwoŋi pwooni o na we jar-keira, de ba sisei, de ba torokooro mo kaare teo kom maama ba pu. O ma vo o ta de Elisa o we, “Woo, amo tu, lɛɛro yi debam! Dé nam wó ke tɛ mo?” 16Elisa ma leiri‑o o we, “Yé ta‑n kɔre foone, se balo na wo debam tei ne to daga ba dwoi balo na wo banto tei ne to.”#2 Tigisim 32:7-8; Rom 8:31 17Elisa ma lwoori Wɛ o we, “Baŋa Wɛ, puri a tontoŋeno wom yia se o wane o na amo na tɛ kolo to.” Baŋa Wɛ ma seene o puri nɔn-doŋo wom yia pa o nii o na we, sisei kɔgɔ kɔgɔ de torokooro dedɛ na jege min-vogo to mo faare peo kom maama te gilimi Elisa.

18Siria jar-keira bam ma fɔɔre ba yi se ba ja Elisa. Elisa ma lwoori Baŋa Wɛ o we, “A lwoori‑m se n pa nɔɔna banto maama yia dwei.” Baŋa Wɛ ma seene o pa se ba yia dwei, ne Elisa na lwoori‑o tei to. 19Elisa ma vo ba tei ye o ta-ba o we, “Abam tusi chwoŋa mo á ba teo konto wone. Tɔge-na amo kwaga se a ja abam a vo a bere wolo á na beeri to.” O ma ja-ba o vo Samaria.

20Ba na yɔɔre ba yi Samaria#6:20 Samaria déem ye Isarele tiina te-fɔrɔ kom. ba zo teo kom wo to mo Elisa lwoori Wɛ o we, “Baŋa Wɛ, puri nɔɔna banto yia se ba jwoori ba taa nae.” Baŋa Wɛ ma seene o ke konto pa se ba nae. Ba ma na we ba tu ba wo Samaria teo wone mo.

21Isarele tiina pɛ wom na nɛ-ba to, o ma bwei Elisa o we, “Amo tu, chwoŋa wora se a go-ba na?” 22Elisa ma leiri o we, “Aawo! Yé go-ba. Ko ná maŋe ko ye nɔɔna balo nmo na wane jara wone n ja to, n dae se n go-ba. Nam pa-ba wodiu se ba di se ba daare ba nyɔ na. Ba ná ti, se n pa-ba chwoŋa se ba jwoori ba tu wom tei.”#2 Tigisim 28:15 23Pɛ wom ma ke wodi-fɔrɔ kuri o pa-ba. Siria jar-keira bam na di ba ti to, o ma pa ba viiri. Ba ma jwoori ba vo ba tete pɛ wom tei. Keim dem konto kwaga ne, Siria tiina bam daa maa wo jwoori ba zo Isarele tiina laŋa kam se ba vere ba wonnu ba ja ba viiri.

Siria tiina kwaare jara de Samaria teo

24Konto kwaga ne mo Siria teo pɛ Ben-Hadadi ke o jar-keira kɔgɔ kom maama o ke daane pa se ba vo Samaria ba kwaare jara de Isarele tiina bam. 25Ba ma vo ba kaare Samaria teo kom taa ba pu. Ko ma pa se kana tiini ka zo teo kom. Bonaga yuu kwora déem ye lu-nyenno sabu-dala funɔnɔ mo. Kunkwon-puura beinnu#6:25 Kunkwon-puura beinnu naa swoona bɔŋa balaŋa maa ye lu-nyenno sabu-dala yanu.

26Isarele tiina pɛ wom déem na tɔge teo kom kabira baŋa o maa kɛ to, mo kaane wodwoŋi laare de kwor-dɛa o we, “Jan ja, amo tu, zeini-ne!” 27Pɛ wom ma leiri‑o o we, “Baŋa Wɛ yerane ná wo zeini‑m, amo laam ke titigiro mo. A jege mena mo naa a jege sana mo?” 28O ta ma bwei kaane wom o we, “Bɛ mo daane‑m?” Kaane wom ma leiri o we, “Kaane wodwoŋi ya mo taga de amo se a ja a bu a go se dé maama di, se dɛ dedwoŋi ne o de daa ja o bu o go se dé maama di. 29A ma seene a go a bu wom a daare a saŋe‑o pa se dé maama di. Tega na poore to, a ma ta ded‑o se o de ja o bu wom o go se dé di. Kaane wom ma ve ye kwei o bu wom o seigi.”

30Pɛ wom na nigi kaane wom taane dem to, o ma vaŋe o gwaaro o kaare wo-chechɔgɔ ŋwaane. O ta na dɔge kabira kam yuu ne o vei to, nɔɔna ma kwoni ba nii ba na o gwaaro tem na kaare mɛ seeni ye o zo gare-nyenyaaro te kuri ne to. 31Pɛ wom ma du duuri o we, “Amo ná wo gwoni Safate bu Elisa yuu zem dɛ dem ne, se Wɛ ti a momwɛ.”

32Elisa déem maa jei o sɔŋɔ ne de Isarele teo nakwa ye ba lara. Pɛ wom ma toŋe o tontoŋeno se o vo o bwoŋi‑o. Tontoŋeno wom ta na wo yi to, Elisa ya maŋe o ta de nakwa bam o we, “Á wo nɛ na? Nɔn-goro wonto mo toŋe nɔɔno se o ba o gwoni a yuu. Nii-na, o tontoŋeno wom ná yia, se á ja bworru tem á pe‑o á yage pwooni yiga ne. Ko nam bá dáane ye pɛ wom tete saŋe o kwaga o ba.”

33Elisa ni wo to tega ne de tontoŋeno wom na yi o tei. Pɛ wom de ma yi ye o we, “Lɛɛro tento maama na tu de baŋa to ye Baŋa Wɛ yiga mo. Amo nam wó cheigi tento a vo a maŋe yein-seeni mo se Baŋa Wɛ laam ba o zeini debam?”

Currently Selected:

2 Pwa 6: KBG

Highlight

Copy

Compare