2 Pwa 5

Naaman jaweo kom na jei tei to

1Nɔɔno wodwoŋi déem mo wora, o yere mo Naaman. O maa ye Siria#5:1 Siria = Aram tiina pɛ wom jar-keira yiga tu. O ye dedɛɛro mo ye o kikia su pɛ wom yi lanyerane, Baŋa Wɛ na dɛ o baŋa o woli Siria tiina pa se ba di ba dona jara wone to ŋwaane. Konto to, o ye babea na yei jara keim chekke to mo. De ko de, o déem ye nayɔŋɔ mo.

2Siria teo kom jar-keira déem yeini ba zo Isarele laŋa kam ba ke jara ba vere wonnu ye ba jwoori sɔŋɔ. Ba déem ma vo ba ja Isarele tiina busankana kadwoŋi. Ba ma ja‑o ba vo ba pa Naaman kaane se o taa ye o ka-nyaane. 3Dɛ dedwe, busankana kam ma ta de Naaman kaane o we, “A nu, nmo baro wom ya ná wae o vei Wɛ sampwora kalo na zoore Samaria ne to tei, wonto ya wó pa o na yazura de naywaane jaweo kom.” 4Naaman na nigi konto to, o ma vo o ta kolo Isarele tiina busankana kam na tage to o bere o tu wom. 5Siria tiina pɛ wom ma leiri o we, “Tɔ. Véi se n na nɔɔno wom konto. Amo wó popone tɔnɔ nmo ŋwaane se n ja n vo n pa Isarele teo pɛ wom.”

Naaman ma la lu-nyenno kilo bia yatɔ de finna (340), de sabu-seŋa kilo fuserepɛ (70), ko woli de gare-bia fuga. O laam ma zaŋe o ja-te o kɛ. 6O ma kwei tɔnɔ kom o vo o pa Isarele teo pɛ wom. Kolo na popone ko wone to mo tento: “Tɔnɔ konto ye se ko bere we amo mo toŋe a tontoŋeno Naaman se o ba nmo tei, se n yɔɔre o naywaane jaweo kom n pa‑o.”

7Isarele teo pɛ wom na gage tɔnɔ kom o ti to, mo o jaane o gɔrɔ o kaare ye o we, “Amo ye Wɛ mo se a wane a pa nɔɔno momwɛ ti, ye a daare a pa wodwoŋi na ŋwea na? Bɛ mo ye Siria teo pɛ toŋe nɔɔno wonto se o ba amo tei se a yɔɔre‑o? Nii-na o na beeri woŋo se o da ko baŋa o ja jara de amo tei!”

8Wɛ tontoŋeno Elisa na nigi kolo na ke ye Isarele tiina pɛ wom kaare o gɔrɔ to, o ma toŋe ni dento o pa‑o ye o we, “Bɛ mo pɛ se n ja n gwaaro n kaare? Toŋe nɔɔno wom se o ba amo tei se a pa o lɔre we, Wɛ sampwora seene o wo Isarele teo ne.” 9Naaman laam ma ja o sisei sem de se torokooro tem o vo o zege Elisa diga ni ne. 10Elisa ma toŋe o tontoŋeno se o vo ta de Naaman we, “Nam véi n swɛ n yera kuni berepɛ Jɔdan buga kam wone, se n ya-nɔna yam laam wó kwɛ ye n jaweo kom jei.”

11Naaman na nigi konto to, o bane ma zaŋe dedɛ. O ma varege ye o we, “Nii mo! A ya boŋe we Elisa tete mo wó nwoŋi o ba o zege amo yiga ne o bwoŋi o Tu Baŋa Wɛ wom yere, se o daare o yeese o jea a ŋɔna yam baŋa ne o yɔɔre amo. 12Abana de Farepa bwi sem na wo Damasika ne to ba gare Isarele bwi sem maama na? A ya wae a swɛ a yera bwi sento wone ye a ya-nɔna kwɛ.” 13Naaman tontoŋena ma fɔɔre ba yi o tei. Ba dedoa ma ta ded‑o o we, “A kwo, sampwora kam ya ná we n toŋe totoŋ-chɛɛre, nmo bá‑n ke na? O nam na tage kolo to dae mɔle ko pa‑m na? O we n swɛ n yera se ya kwɛ. Ko dae konto mo na?” 14Naaman laam ma seene o tu o misi o tete Jɔdan buga kam wone kuni berepɛ, ne Wɛ tontoŋeno wom na taga tei to. O ya-nɔna yam ma jwoori ya kwɛ lanyerane nenɛɛne bakeiri-pwola yera na ye tei to, ye o jaweo kom jei.#Luka 4:27

15Naaman de o nɔɔna bam maama ma jwoori ba vo Wɛ tontoŋeno Elisa tei ba zege o yiga ne. Naaman ma ta de Elisa o we, “Amo zem laam tu a lɔre we Isarele tiina Wɛ wom yerane mo ye wɛ chekke logo baŋa maama wone. Jan ja, amo tu! Sɛ se n jwoŋi a pɛɛra yam.” 16Elisa ma leiri o we, “Ŋwea Tu Baŋa Wɛ na seene o wora ye a toŋe a pa‑o to, amo dugi wonto yere ŋwaane we, amo bá jwoŋi kolokolo nmo tei ne.” Naaman ta ma lwoori Elisa o ga se o jwoŋi pɛɛra yam o tei ne. 17Naaman ma ta o we, “Amo tu, nmo na tage we n bá‑n sɛ se n jwoŋi kolokolo a jeŋa ne to, nam pa-ne chwoŋa se a pɛ teero ywo-seeni se te yi bona-sisei selei na wó wane se zeŋe tei to, se a ja a viiri. Kokuri to, ko zege zem se ko taa via, amo daa bá ke kaanem naa zwɛɛm pɛɛra a pa wɛ dedwoŋi, ko ná dae Baŋa Wɛ yerane. 18Amo nam lwoori Baŋa Wɛ se o duri a yibwona keim dento ŋwaane: amo ná dɛ de a tu Siria teo pɛ a zo Rimon jwoni diga kam se o zuli-de, ye pɛ wom ná sale a yera ne, ye amo de da a tiiri tega ne ded‑o, se Baŋa Wɛ yage o chɛ-ne.” 19Elisa ma leiri o we, “Nam véi, se Wɛ wó pa‑m yazura.” Naaman ma viiri.

Naaman na vei o yi yiga fee to, 20mo Elisa tontoŋeno Gehazi taga o tete ne we, “Ta‑n nii tei. Amo tu Elisa yage Siria tu wom mo se o viiri konto mɔle mɔle, ye o wo jwoŋi pɛɛra yam o jeŋa ne de fenfee de. Ŋwea Tu Baŋa Wɛ na seene o wora to, a dugi wonto yere ŋwaane we amo tete mo wó pare Naaman a jwoŋi woŋo o tei ne.” 21Gehazi ma ke lela se o vo o yi‑o. Naaman na tole o na nɔɔno na duri o beene o tei to, o ma zege o toroko kom baŋa o faŋe o chu tega ne o vo o jeeri‑o. O ma bwei‑o o we, “Yazura mo n vei na?” 22Gehazi ma leiri Naaman o we, “Ko dae wo-lɔŋɔ. Ko ye amo tu Elisa mo toŋe-ne se a ta dede‑m we, Wɛ sampwori kɔgɔ kom nɔn-donno telei mo zege Efrayim zwonnu laŋa kam ne ba yɔɔre ba yi o sɔŋɔ leile konto. O nam lage se n kwei lu-nyenno kilo fintɔ-tenu (35), ko woli de gare-bia balei mo n pa-ba.”

23Naaman ma leiri o we, “Amo tei ne, a lage a pa‑m lu-nyenno kilo fuserepɛ (70) mo.” O ma kwoori Gehazi pa se o jwoŋi. O ma kwei lu-nyenno tem o ke ywollu telei wone o vɔ. O ta ma kwei gare-bia balei bam o woli da. O laam ma toŋe o tontoŋena balei se ba zeŋe zela yam ba tɔge Gehazi yiga ba taa via. 24Ba na yi peo kom yuu mɛ seeni Elisa na zoore to, Gehazi ma jwoŋi zela yam ba jeŋa ne o seigi o tete diga ne, o daare o bane Naaman tontoŋena balei bam pa se ba jwoori ba viiri.

25Gehazi ma zo o zege Elisa tei ne. Elisa ma bwei‑o o we, “Gehazi, nmo ya vei yei ne mo?” Gehazi ma leiri o we, “Amo tu, a wo vei jei jei.” 26Elisa ma ta ded‑o o we, “Nmo wo lɔre we maŋa kalo Naaman na zege o toroko kom baŋa ne o chu o jeeri‑m to, amo jworo ya wora mo na? Kanto dae maŋa se n jwoŋi sabu, de gwaaro, de Olivi teeni kare, de Vini teeni kadwi, de pei, de nabɛ, de tontoŋena, de ka-nyaana. 27Nmo nam na ke konto to, ta‑n yei we Naaman naywaane jaweo kom wó ba nmo tete, de n bia, de dwi delo na wó saŋe n kwaga to baŋa se ko taa vei wuu.” Gehazi na nwoŋi pwooni yiga to mo o jigi nayɔŋɔ. O yera ma peere cha ne lɔŋɔ dwoŋi to.

Currently Selected:

2 Pwa 5: KBG

Highlight

Copy

Compare