2 Pwa 7

1Elisa ma leiri o we, “Nam cheigi Baŋa Wɛ kwora. Baŋa Wɛ na tage kolo to mo tento: Jwa kanto maŋa ne ba wó taa jege mun-bwei bɔŋa ba yeigi mɔle mɔle sabu-dale dedoa mo Samaria yaga ne. Chaara#7:1 Chaara = barley bwɛ selei de wó yeigi sabu-dale dedoa.” 2Dedɛɛro wolo na tiini o bwola de pɛ wom to ma ta de Wɛ tontoŋeno Elisa o we, “Baŋa Wɛ tete ná maŋe o pore wɛyuu kom se doa tiini ka ne mo de, konto bá wane ko ke.” Elisa ma leiri‑o o we, “Nmo tete yi wó na ko na wó seene ko ke tei to. Nmo nam bá da n laŋe wodiu kom.”

Siria jar-keira bam na viiri ye ko daare ko ke tei to

3Baara bana déem mo jei Samaria teo manchwoŋo kom ni ne ba na ye naywanno. Ba ma ta ba bere daane ba we, “Debam wó taa jei ywo-seeni se toone ja debam wo bɛ mo? 4Dé ná we, ‘Pa-na se dé zo teo kom wo,’ kana wó go debam dáane. Dé nam ná maŋe ywo, de ta wó te mo. Nam pa-na se dé zaŋe dé vo Siria tiina jar-keira bam tei dé sɛ dé pa-ba. Ba wae ba yage debam se dé taa ŋwe. Ko nam ná dae konto, ba wó go debam ye ko ti.”

5Tega déem na lage ka yi to, ba ma zaŋe ba vo Siria tiina bam ya na tigisi daane mɛ to. Ba na vei ba yi jeiga kam to, ba ma nii ba na we nɔɔn-nɔɔno tera. 6Kokuri to Baŋa Wɛ ya pɛ se Siria tiina bam ni sɔɔ nenɛɛne torokooro de sisei na wuura ye jar-keira kɔgɔ kɔgɔ gwɛ tei to mo. Ba ma ta ba bere daane ba we, “Ko wó taa ye Isarele teo pɛ mo ware Hiti tiina de Ejipti tiina pwa se ba ba ba ke chichuŋu de debam.” 7Ko déem ma pa se foone zo-ba pa se ba duri tete dem konto ne ba jage da-yiga ne ba yage ba vwoa, de ba sisei, ko woli de ba bonɛ, de ba wonnu maama. Ba déem yage te maama puna mo se ba wane ba duri ba lu ye ba ta ŋwe.

8Naywanno tena tem na fɔɔre ba yi jei sem to, ba ma zo vwoa yam dedoa wone ba na wodiu ba di ba daare ba nyɔ na. Ba déem ta kwei Siria tiina bam lu-nyenno, de ba sabu-seŋa, ko woli de ba gwaaro ba ja ba vo ba seigi. Ba ta ma jwoori ba zo vwei dedwoŋi ba kwei wonnu tedwonna ba ja ba vo ba seigi. 9Ba ma ta ba bere daane ba we, “Kolo dé na jege dé ke to ba lana. Zem dɛ dem mo dé jege kwor-ywoŋa se dé tɔɔle dé pa nɔɔna maama, ye dé jege dé jei kafɛ yerane. Dé nam ná chem se tega poore, de wó ná waarem ko ŋwaane. Pa-na se dé ke lela dé vo pɛ sɔŋɔ dé ta kolo na ke to.”

10Ba ma jwoori ba vo ba yi teo kom manchwoŋo ni. Ba ma tɔɔle ba bere teo kom ni-yerena bam ba we, “Debam vei Siria jar-keira bam jei sem dé nii, ye nɔɔn-nɔɔno tera. Kolokolo sɔɔ de nam ba dɔna. Ba sisei sem, de ba bonɛ sem na leigi se zege tei to mo se na zega. Ba vwoa yam de maa na zege tei mo ya na zega.” 11Teo kom ni-yerena bam ma ja kwora kam ba vo ba ta ba bere pɛ sɔŋɔ ne. 12Pɛ wom ma zaŋe tete dem konto o ta de o tontoŋena bam o we, “Amo wó ta a bere abam Siria tiina bam na boŋe se ba ke kolo to. Ba na yei we kana lage ka go debam to mo ba yage ba vwoa yam ba daare ba vo ba seigi gaao wone. Ba maa boŋe ba we, debam wó nwoŋi dé beeri wodiu dé di. Debam maa ná ke konto, ba laam wó na chwoŋa ba ja debam ŋweene ba daare ba taa tei dé teo kom.” 13O dedɛɛra bam dedoa ma leiri o we, “Pa nɔɔna kwei sisei sem ta na daare to senu ba vo ba nii keim dento baŋa ne. Banto ná maŋe ba te ko ŋwaane, ko ta ye bedwe mo de balo maama na maŋe teo kom wone ye ba lage ba te to.”

14Ba ma le nɔɔna de torokooro telei de te sisei. Pɛ wom ma toŋe-ba se ba vo ba nii kolo na ke Siria tiina jar-keira bam to. 15Nɔɔna bam ma tɔge Siria tiina bam nɛ taa ba vo ba yi Jɔdan buga kam. Ba ma na Siria tiina bam na duri se ba lu ye ba kwei ba gwaaro de ba zela dedɛ ba de ba yage chwoŋa kam yuu ne tei to. Ba laam ma jwoori ba vo pɛ wom tei ba ta ba bere‑o ko na ke tei to.

16Teo kom nɔɔna bam ma ke lela ba nwoŋi ba vo Siria tiina vwoa yam jei ba pɛ ba zela de ba wodiiru maama. Ba déem ma seene ba jege mun-bwei bɔŋa ba yeigi sabu-dale dedoa dedoa. Chaara bwɛ selei de yeigi sabu-dale dedoa mo. Ko déem yɔɔre ko ke ne Baŋa Wɛ na maŋe o ta tei to mo.

17Ko nam ná ye dedɛɛro wolo na tiini o bwola de pɛ wom to, pɛ wom ya tiŋi‑o se o taa nii teo kom ni-yerena bam baŋa ne mo. Teo kom nɔɔna bam na duri ba maa nwoŋa to, ba ma nɔne dedɛɛro wom konto pa se o te manchwoŋo kom ni ne. Konto ma pa se Elisa na wuuri o ta kolo to ji chega. 18Kokuri to, Wɛ tontoŋeno Elisa ya maŋe o ta o bere pɛ wom o we, “Jwa kanto maŋa ne ba wó taa jege chaara bwɛ selei ba yeigi sabu-dale dedoa mo Samaria yaga ne. Mun-bwei bɔŋa de wó yeigi sabu-dale dedoa.” 19Pɛ dedɛɛro wom ya wo sɛ ye o we, “Baŋa Wɛ tete ná maŋe o pore wɛyuu kom se doa tiini ka ne mo de, konto bá wane ko ke.” Elisa de ya kaane‑o mo o we, “Nmo tete yi wó na ko na wó seene ko ke tei to. Nmo nam bá da n laŋe wodiu kom.” 20Konto nam mo yɔɔre ko ke‑o. Nɔɔna mo nɔne‑o manchwoŋo kom ni ne pa se o te.

Currently Selected:

2 Pwa 7: KBG

Highlight

Copy

Compare