2 Korinti 5

Wɛ telaao taane

1Debam yera yam dé na jege logo baŋa ne to nye de vwei mo dé na zoore de wone. Dé nam yei we, vwei dem konto ná chɔge, Wɛ wó pa dé na sɔŋɔ telaao ne se dé taa zoore da. Ko dae nabiina mo lɔge sɔŋɔ kom konto. Ko maa wó taa wora taa se ko taa vei wuu. 2Cham na jege debam logo baŋa ne tei to, debam yeini dé kone mo ye dé fera zo Wɛ telaao, dé na tiini dé lage se Wɛ pa dé zo dé telaao sɔŋɔ kom to ŋwaane. 3O ná pɛ dé zo sɔŋɔ kom konto, nenɛɛne dé na zo gɔrɔ tei to, dé daa bá taa nye de nɔn-kalambwollu tei. 4Dé ta ná zoore dé logo baŋa vwei dem wone, dé yeini dé kone mo de cham. Ko nam dae we dé lage se dé de dé yera yam mo dé yage. Dé nam lage se dé zo kolo Wɛ na tiŋi o telaao ne se o pa debam to, se o ŋwe-doŋa kam laam pa dé yera yalo na tege to daa yé taa jege kuri. 5Baŋa Wɛ mo seene o fɔge debam se dé ba dé na ŋwea kam konto o tei ne, ye o pa debam o Sin-laao kom se ko da yiga ko tiŋi chwoŋa se ko pa dé lɔre we, dé laam wó ba dé na Wɛ wo-laaro tem maama.

6Wɛ Sin-laao kom na wo debam tei ne konto to, ko pa se dé jege pu-dɛa maŋa maama. Dé yei we, dé na jege dé logo baŋa yera yam to mo pae se dé tera dé Teiru wom sɔŋɔ ne. 7Dé nam na jege dé ŋwea tei to, ko dae we dé tɔge dé yi na nae wonnu telo to. Dé nam ke dé wo-dedoa de Wɛ we, dé wó na. 8Dé na jege pu-dɛa tei to mo pae dé yei we, ko wó taa lamma ko pa debam se dé yage dé yera yam na nye de dé sɔŋɔ logo baŋa ne to, se dé daare dé vo dé taa wora dé Teiru wom sɔŋɔ ne. 9Kolo na ye wo-chɛɔ ko pa debam to ye se dé taa pwoli o wo maŋa maama, nenɛɛne de ná tega dé daare dé yera yam, naa dé daa ta ná jege-ya dé ŋwe. 10Kokuri debam maama nam jege se dé ba dé zege Yezu Krista yiga ne, se o di debam taane. Nɔɔno maama jege se o jwoŋi kolo na maŋe de o kikia yalo maama o na ke logo baŋa ne to, ne ko ná ye o ke keim-laaro, naa o ke keim-balwaaro.#Matiyu 25:31-32

Yezu Krista fɔge nɔɔna de Baŋa Wɛ daane

11Konto ŋwaane dé yei ko kuri dé na jege se dé taa kɔre dé Teiru wom to. Mo kokuri dé kwaana se dé pa nɔɔna boboŋa tɔge chega chwoŋa. Wɛ nam yei debam wo lanyerane. Amo boŋe we abam de wó ta‑á yei dé boboŋa na lana tei to. 12Ko nam dae we debam daa kwaana se dé bere dé chega mo de abam. Dé nam lage se dé zeini abam mo, se á wane á ta‑á jege teera debam ŋwaane. Ko nam ná ye balo na jege teera ba nenɔŋa ŋwaane ye ba bochara ba lana to, ba ná tu abam tei, á wó wane á ve-ba mo.

13Á pae se dé ba jege boboŋa mo na? Ko ná seene ko ye konto, ko nam maŋe ko ye Wɛ ŋwaane mo. Dé swa nam ná wora, konto ye abam zeinim ŋwaane mo. 14Dé na ke kolo maama to tɔge Yezu Krista swono kom ŋwaane mo. Kokuri dé laam maane we, nɔɔno dedoa mo tega se o leiri nɔɔna maama yuu ne, ye konto bere we ba maama de tɔge ba te mo. 15O na tege o pa ba maama konto to, ko ye se balo na jege ŋwea o ŋwaane to mo daa yé taa ŋwe ba tete fɔgem ŋwaane. Ba nam wó taa ŋwe Yezu fɔgem ŋwaane mo, de o na tega se o leiri ba yuu ne ye o daare o bi toone wone to.

16Konto ŋwaane, dé ná yeini dé bere nɔɔna chega na ye tei to, dé daa ba tɔge nabiina boboŋa na bere tei to. Maŋa kadwoŋi ne dé déem tɔge boboŋa yanto dwoŋi mo dé maa bere Yezu Krista na ye tei to, ye dé nam daa ba tɔge-ya. 17Nɔɔno wolo ná tu o me de Yezu Krista, ko bere we, Wɛ jwoori o fɔge konto tu de o ŋwe-doŋa kam mo, ye ko pa se wonto ŋwe-dwoŋa kam kɛ, ko daare o ŋwe-doŋa kam yerane mo wora. 18Ko maama ye Wɛ kikia mo. O tɔge Yezu Krista ŋwaane mo o fɔge debam de o tete daane, ye o daare o pa se dé taa woli nɔɔna se ba na o fɔgem dem konto. 19Dé yeini dé bere nɔɔna we, Baŋa Wɛ dɛ Yezu Krista ŋwaane mo o fɔge nabiina de o tete daane, pa se o daa ba jeeli ba wɛleera o ke o boboŋa ne. O ma kuri debam se dé taa bere nɔɔna o fɔgem dem konto na ye tei to.

20Mo Wɛ na tiŋi debam se dé leiri Yezu Krista yuu ne dé taa bere nɔɔna o chega kam tei to. Ko maa nye de Wɛ tete mo wo debam tei ne o ŋɔɔna. Dé nam lwoori abam Yezu Krista yere ŋwaane se á sɛ se á de Wɛ fɔge daane. 21Yezu Krista mo ye wolo na ba jege wɛleere o yuu ne to. Wɛ nam duri dé ŋwaŋa ye o pa se debam wɛleera mo saŋe wonto yuu ne, se ko pa dé taa jege chega Wɛ tei ne, dé na me de Yezu to ŋwaane.#Izaya 53:6

Currently Selected:

2 Korinti 5: KBG

Highlight

Copy

Compare