2 Korinti 6
6
1Debam na sale Wɛ dé toŋe o totoŋa yam to, dé lwoori abam se á yé zaŋe á pa Wɛ zaane dem o na pɛ abam to ji kafɛ. 2Baŋa Wɛ maŋe o ta we:
“Maŋa kalo na maŋe se a ke zaane á yuu ne to,
amo cheigi á wɛ-lworo kom.
Dɛ dem na yi se a vere abam a yage to,
a seene a zeini abam.”#Izaya 49:8
Nii-na! Maŋa kam yia se Wɛ ke zaane o ke abam yuu ne. Ko ye zem mo o lage o vere abam o yage.
Pɔɔl yaara yam taane
3Dé ba lage se nɔɔn-nɔɔno na chwoŋa o yaale dé totoŋa yam. Konto ŋwaane dé ba ke kolo na wó chɔge nɔɔno yiga to. 4Dé nam na ke tei to, dé kwaane dé bere dé chega mo se ko pa nɔɔna lɔre we, dé ye Wɛ tontoŋena. Kolo maama ná yeini ko ke debam, dé yeini dé vɔ dé wo dedaane yaara, de cham, de lwia yalo na daane debam to. 5Ba fere debam de kaasa. Ba ma ja debam ba ke peena diga ne kuni dedɛ. Ba ta maa yeeri debam. Dé maa yeini dé toŋe totoŋ-chɛɛra. Dé maa ba dɔ dé sui. Kana maa tiini ka ni debam.#Kikia 16:23 6Dé mae boboŋ-laaro, de yeino, de ban-peno dé maa toŋa, ye dé kwori dé nege nɔɔna lanyerane. Dé maa tɔge Wɛ Sin-laao kom dam baŋa dé toŋa, ye dé jege nɔɔna swono chekke. 7Dé maa bere nɔɔna wonnu telo na ye chega to Wɛ dam ŋwaane. Dé na yɔɔre dé tɔge chega chwoŋa tei to pae dé cho de tete, nenɛɛne dé na zei jara wonnu jagwia ne de jazem ne to. 8Nɔɔna badwonna pae debam zula, ye badaara yaale debam. Badwonna maa twe debam, ye badaara pae debam chega. Badaara maa pae dé ye balo na gane nɔɔna to, ye dé nam yɔɔre dé tɔge chega mo. 9Badaara pae dé ye nɔn-yɔɔro mo, ye dé nam jege yere nɔɔna dedɛ tei ne. Badwonna pae dé lage dé te mo, ye dé nam ta ŋwe. Ba mage debam yera, ye ba nam wo wane ba go debam. 10Nɔɔna maa ke ba pa dé yiga nyɔne, ye dé ta di ywoni maŋa maama. Nɔɔna pae se yiniga jege debam, ye dé nam woli nɔɔna dedɛ de wo-laaro. Nɔɔna pae se dé ba jege kolokolo, ye wonnu maama nam wo debam jeŋa ne mo Wɛ ŋwaane.
11Amo badwonna Korinti tiina bam, a kwei a bochare maama a ma ŋɔɔne de abam jaja. Amo maa tiini a swoi abam de a bochare. 12Ko dae amo mo chege debam swono kom daane, se ko nam ye abam mo. 13Amo nam lwoori abam, ne á ye amo bia mo tei, se á ta‑á jege amo swono kom dwoŋi á bochara ne.
Jwona de Baŋa Wɛ ware ya toŋe daane
14Abam nam yé zaŋe á kwei á tete á gwaane de balo na ve se ba tɔge Yezu to. Ko nye de nabea de bonaga na bá wane se tɔge daane se va tei to. Lam de lwarem ware ya tɔge daane. Pwooni de lim ware ya taa wo jeiga dedoa. 15Yezu Krista de setaana pɛ nam bá wane ba taa jege boboŋe dedwe. Wolo na sɛ Yezu to de wolo na wo sɛ‑o to bá wane ba me daane. 16Ko ná ye jwona, yanto bá na chwoŋa se ya taa wo Wɛ diga kam ne. Debam nam mo nye de Wɛ tete diga kam, de o na zoore debam tei ne to. Kokuri, Baŋa Wɛ déem tage o we:
“Amo wó taa zoore a nɔɔna bam tei ne,
ye a tɔge de-ba a via.
A maa wó taa ye ba Tu Wɛ wom,
ye ba de wó taa ye amo tete nɔɔna.#Chullu 26:12; Jeremia 32:38; Ezekeli 37:27
17Konto ŋwaane, nwoŋi-na da banto tei ne,
ye á daare á pɔɔre á tete de-ba.”
Wɛ daa ta we:
“Yé digiri-na á tete de wonnu telo maama na ye wo-zɔɔna to.
Konto mo amo wó sɛ a jwoŋi abam.#Izaya 52:11
18Amo wó taa ye abam Kwo,
ye abam de wó ta‑á ye amo bu-baara de a bukwa.”#2 Samuwel 7:14
Mo Paŋwa Tu Baŋa Wɛ wom na tage tei.
Currently Selected:
2 Korinti 6: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
