2 Korinti 4

Debam bwona ye Wɛ zeini debam

1Debam na woli nɔɔna se ba lɔre Wɛ chega kam tei to ye o zaane dem mo pɛ dé toŋe konto. Konto mo pɛ dé vɔna bá pare. 2Dé nam chuli wonnu telo nɔɔna na seigi ba ke ye te pa chaveera to. Dé ba tɔge swa baŋa dé gane nɔɔna, ye dé ba lage se dé pipiri Wɛ taane dem. Wɛ na nii dé kikia to, dé nam bere o chega kam mo jaja, se ko pa nɔɔna maama lɔre we, dé na ke tei to tɔge chwoŋa. 3Dé na tɔɔle Wɛ kwor-ywoŋa kam tei to kuri ná seigi nɔɔna tei ne, ko ye balo na lage ba ga ba ŋwea Wɛ tei ne to yerane mo ka seigi ba tei ne. 4Banto ve Wɛ chega kam, kolo ŋwaane setaana pɛ wolo na di dam logo konto baŋa ne to mo pɛ se ba boboŋa kwaale. O ke konto se ba yé wane ba na swa yalo Wɛ kwor-ywoŋa kam na lage ka pa-ba to. Kwora kam konto bere Yezu Krista de o dam dem na ye tei to mo. Wonto mo jege Baŋa Wɛ nyenyego chekke. 5Debam na yeini dé tɔɔle Wɛ kwora kam tei to dae dé tete mo dé jege dé bere nɔɔna. Dé nam bere nɔɔna we, Yezu Krista mo ye nabiina Teiru, ye debam ye balo na toŋe dé pa abam o ŋwaane to mo. 6Baŋa Wɛ mo ye wolo na maŋe o ta o we, “Pwooni ba de taa nyeene lim wone”.#Pulim 1:3 Wonto nam ta mo ye wolo na pɛ se pwooni ba de wora de nye dé bochara ne to. Konto mo o pɛ dé yi poore se dé lɔre o nenɔŋ-fɔrɔ kom na ye tei, ye konto mo nae Yezu Krista yibia ne.

7Wɛ na tiini o zeini debam konto to, ko nye de o kwei wonnu telo na ye lonne nyem to mo o ke kɔɔra wone. Dé na nye de kɔɔra konto to, ko bere we debam dae kolokolo, se ko ye Wɛ dam-fɔrɔ kom ŋwaane mo dé toŋa. 8Yaara yeini ya peene debam, ye ya ware dé yiga ya che. Dé boboŋa maa tiini ya vugimi, ye ya ware se ya pa dé vɔna pare. 9Nɔɔna yeini ba bɛɛse debam, ye dé ba fɔge dé gɛ fara. Dé dona maa pae se dé toe tega ne, ye dé ba fɔge dé gɛ dé ŋwea. 10Dé na jege dé ŋwea logo baŋa ne tei to, toone yeini de tɔge debam yera yam, nenɛɛne toone na jaane Yezu de yera yam tei to. Konto maa bere jaja we, dé ŋwea kam jege kuri, Yezu na jege ŋwea Wɛ tei ne to ŋwaane. 11Dé ŋwea wone toone maa yeini de kwaana se de go debam maŋa maama, dé na sɛ Yezu to ŋwaane. Konto to, dé yera yalo na wó ba ya te to wae ya bere we, Yezu pɛ dé na ŋwea kalo na ba jege kweelim Wɛ tei ne to. 12Dé na yaare abam ŋwaane tei to bere we, toone wora de chɔge debam, se ko pa abam wane á na ŋwea Wɛ tei ne.

13Ko maŋe ko popone Wɛ tɔnɔ kom ne we, “Amo na ke a wo-dedoa de Wɛ to mo pɛ a ŋɔɔna.”#Lei 116:10 Debam de na jege wo-dedoa de Wɛ konto dwoŋi to mo pae dé ŋɔɔne o chega kam. 14Dé yei we, Wɛ mo bi dé Teiru Yezu toone wone, ye o ta wó bi debam de se dé na ŋwea o tei ne, dé na me de Yezu to ŋwaane. Konto mo Wɛ wó pa se debam de abam maama tɔge daane dé vo dé zege o yiga ne. 15Dé na ke tei to maama ye abam zeinim ŋwaane mo. Konto ŋwaane, Wɛ na pae se o zaane dem zaŋe de yi nɔɔna dedɛ tei to mo pae se ba ke o lei dedɛ, se ko pa o jwoŋi zula lanyerane.

16Wɛ zeinim dem na gaale debam tei ne to, dé vɔna bá pare. Ko ná ye debam nabiina yera yalo dé na jege to, ya wora ya kwe mo dɛ maama wone se ya ba ya bugi. Ko nam ná ye dé jworru, Wɛ wora o fɔge-te mo dɛ maama. 17Leile konto dé wora dé nae yaara fenfee, ye ya bá dáane. Ya nam wó pa se dé ba dé di ywoni dedɛ Wɛ yiga ne se ko taa vei wuu, ye ko gaale dé logo baŋa yaara yam na mae tei to.#Rom 8:18 18Mo kokuri dé ba pae se dé boboŋa tɔge logo baŋa wonnu telo na wae te nae de yia to. Dé boboŋa nam tɔge wonnu telo na ware te nae de yia to. Kokuri dé yia na nae wonnu telo to yeini te ba dáana. Ko daare telo na ba nae de yia to wó taa wora taa taa se ko taa vei wuu.

Currently Selected:

2 Korinti 4: KBG

Highlight

Copy

Compare