2 Korinti 12

Wɛ na bere Pɔɔl wonnu telo to

1Ko fe-ne mo se a taa bere a tete. Ko nam ba jege nyɔɔre, ye a ta wó ta dé Teiru wom na veere wo-kenkagela yalo o bere-ne se a na to. 2Amo nam yei nɔɔno wodwoŋi déem na ye Yezu Krista nyem to. Bena fuga-yana mo tento, Wɛ na pɛ ba chaale‑o ba ja di wɛyuu kolo na daŋe da kuni betɔ to. Amo maa yeiri ko ye o yera tete mo naa o jworo mo. Wɛ nam mo yei ko na ye tei to. 3-4Amo nam yei we wonto seene o vo o yi Wɛ ywoni jei sem. Ko nam ná ye o yera tete mo naa o jworo mo, Wɛ mo yei. Ko nam ye dáane mo o nigi botare selo na ware se ŋɔɔne to, ye se wo maŋe se nabiinu ta de o ni to. 5Amo wó taa jege teera nɔɔno wom konto ŋwaane mo. A nam bá sɛ se a bere a tete, ko ná dae wonnu telo na bere we a bwona to yerane ŋwaane. 6Amo ya ná boŋe se a bere a tete, ko ya bá taa ye jworim mo ko pa-ne, a na wó yɔɔre a ta chega to ŋwaane. Amo nam bá sɛ a bere a tete konto. Amo ba lage se nɔɔn-nɔɔno boŋe kolo na dwoi amo ŋɔŋa de a totoŋa to o pa-ne.

7Wɛ le wo-kenkagela dedɛ o bere-ne se ko gaale, ye o nam ba lage se a tɔge te baŋa a bere a tete kamunim. Mo kokuri o pɛ se cham jege-ne ko daana, ne sabare na zɔge-ne tei to. Ko maa ye kolo setaana pɛ wom na tɔge ko ŋwaane o yaare-ne to. 8Kuni betɔ mo a lwoori dé Teiru wom se o le cham dem konto a tei ne o yage. 9O nam wo sɛ, ye o ta o we, “Amo zaane dem nam wó yi se ko maŋe de nmo. Nmo ná bwona, ko wó pa se amo dam dem tiini de taa jege kuri nmo tei ne.”

Mo kokuri amo wó taa jege teera de wonnu telo na bere we a bwona to. A maa wó taa jege wopwolo te ŋwaane, se ko pa Yezu Krista dam dem taa kwoli-ne. 10Konto ŋwaane mo, amo ná yeini a bwona, naa nɔɔna ná jege-ne ba twea, naa cham de bɛɛsem de lwia ná jege-ne, amo ta jege wopwolo konto baŋa ne Yezu Krista ŋwaane. Kokuri to, amo ná yeini a bwona maŋa kalo to, a nae dam lanyerane.

Pɔɔl na jege lwia o pa-ba tei to

11Amo na bere a tete tei to ye jworim mo, ye ko ye abam na chuchugi-ne to ŋwaane mo a ke konto. Abam ya mo jege se á bere amo chega kam. Ko ye chega mo we, amo dae kolokolo. Ko nam ná ye balo na pae ba ye Yezu totoŋa nakwa ye ba pa ba dwoi maama to, a wo muri banto yiga ne de fenfee de. 12Amo déem na wo abam tei ne to, á nɛ wo-kenkagela yalo na bere we, amo seene a ye Yezu totoŋa nakwe to. Amo na ke tei to, a vɔge a wo mo ye a ke wo-kamunnu telo na bere Wɛ dam to. 13Abam nam boŋe we a wo ke abam lanyerane se ko yi amo na ke tei de wɛ-di sem nɔɔna badwonna to na? Ko nam ye chega mo we, a wo daane abam se á pa-ne wolim. Konto ŋwaane mo amo wó ja á naga se á duri a ŋwaŋa na?

14Leile konto amo ti a yiga se a ba abam tei, se ko ke kuni betɔ mo. Amo nam daa ta bá daane abam se á pa-ne wolim. Ko nam dae á wonnu naa á sabu mo a laga, se ko ye á tete mo. Ko nam maŋe ko ye kwoa mo lage wonnu se ba tiŋi ba bia ŋwaane, se ko dae bia mo wó ke konto ba pa ba kwoa. Abam nam nye de a bia mo. 15Konto ŋwaane mo amo wó taa jege wopwolo se a kwei a wonnu maama a chɔge, ko woli de a tete yera, se ko pa Wɛ jwoŋi abam. Amo na tiini a swoi abam konto to, ko wó pa se abam na jege amo swono tei to ji fenfee na?

16Abam laam lɔre we, amo déem ba daane abam wolim ŋwaane. Nɔɔna badaara nam tɛ we, amo ke swa mo abam baŋa ne. 17Ko nam ná ye amo na toŋe nɔɔna balo maama abam tei ne to, a tɔge ba wolowolo ŋwaane a pini abam wonnu na? 18Ko ná ye Titusi, a déem kwoori‑o mo se o ba abam tei, ye a toŋe dé nu-bu wodwoŋi se o tɔge ded‑o. Titusi nam wo maŋe o pini abam kolokolo. Abam pae se Titusi de amo boboŋa dae bedwe mo na? Debam na tɔge chwoŋa tei to dae bedwe mo na?

19Abam boŋe we, ko ye abam yiga ne mo dé ŋɔɔne se dé jwoŋi dé tete na? Dé nam na me de Yezu Krista to, ko ye Wɛ yiga ne mo dé ŋɔɔna.

A badwoŋ-swonnu bam, dé na ke kolo maama to seene ko ye abam fɔgem ŋwaane mo. 20Amo nam jege lwia a pa abam mo we, a ná tu abam tei, abam bá ta‑á ke kolo amo na lage se á ta‑á tɔge á toŋe to. Ko maa wó pa se amo de ke kolo abam na bá ta‑á lage se a ke de abam to. Amo ta maa pae se a ga wó na we, á mage ni-kantɔgɔ mo daane, ye á jege puseŋa, de ban-zɔŋɔ, de fia. Á ga wó ta‑á done daane, ye á twe daane, ye á bae bebara á pa daane, ye á kwori á jege boremaa boremaa keim. 21Amo daa ta jege lwia a pa abam we, amo ná tua, amo Tu Wɛ wó pa se a daa na chaveera abam ŋwaane, abam dedɛ na wo leiri á wo de wo-zɔɔna yalo á na maŋe á ke to ŋwaane. Amo ná nɛ konto, ko wó pa se a wo chɔge dedɛ de á ta na ke wo-digiru kikia yalo maama na tɔge ka-laga seeni, ye á wo yage to.

Currently Selected:

2 Korinti 12: KBG

Highlight

Copy

Compare