2 Korinti 11

Pɔɔl tiini o toŋe ba ŋwaane

1Abam nam kwaane se á ja á bochara de amo na lage a ta jworim taane fenfee tei to. Abam nam maŋe á ja á bochara de amo konto mo. 2Amo di ka-zwe mo abam ŋwaane, ne Wɛ de na di ka-zwe o nɔɔna ŋwaane tei to. Amo lage se a ke abam Yezu Krista jeŋa ne mo ye kolokolo ta wo chɔge abam. Ko maa nye de abam ye bukɔ wolo amo na gwoni a ni se a kwei a pa nɔɔno wodwoŋi, ye nɔɔn-nɔɔno wo chɔge‑o to mo. 3Amo nam jege lwia mo de abam we, nɔɔna badaara wó soge á boboŋa se á daa yé ta‑á tɔge Yezu Krista de á bochara maama, nenɛɛne setaana pɛ wom déem na jigi basankwea ye ka ke swa ka gane Awa tei to.#Pulim 3:1-6 4Kokuri, nɔɔno wodwoŋi ná tu abam tei, ye o bere abam Yezu wonnu telo na ba tɔge debam berem dem to, á yeini á sɛ mo mɔle mɔle. Á ma‑á yeini á sɛ á tɔge jworo kodwoŋi, ye ko dae kolo á na maŋe á jwoŋi debam tei ne to. Á daa ta sɛ kwora kadwoŋi, ka na dae kwor-ywoŋa kalo debam na bere abam to.

5Ko ná ye balo na pae ba ye Yezu totoŋa nakwa ye ba pa ba dwoi maama to, amo boŋe we, a wo muri banto yiga ne de fenfee de. 6Amo mo ware a ŋɔɔne pore-pore ne banto tei, ye yeino nam wo a tei ne. Maŋa maama dé maŋe dé pa á lɔre konto jaja woŋo maama baŋa ne.

7Amo na tu abam tei a tɔɔle Wɛ kwor-ywoŋa kam to, ko ye zɛɛra mo a toŋe a pa abam. Ko ye a ke a tusi mo na? Amo gwooni a tete se ko pa abam mo na yere. 8Amo déem na wora abam tei ne a toŋe konto to, a jwoŋi a ŋweero jei-gɛ mo Yezu nɔɔna bam tei ne, nenɛɛne a vere banto mo se a ma toŋe a pa abam tei. 9Amo ná yeini a ga woŋo maŋa kam a na wo á tei ne to, a ba yaare abam wolowolo. Ko nam ye dé nu-bia balo na nwoŋi Makedonia ba ba to mo jaane kolo maama a na lage to ba ba ba pa-ne. Amo déem na maŋe a ba yaare abam to, a daa ta bá yaare abam.#Filipi 4:15-16 10Amo na seene a jege Yezu Krista chega tei to, a ná beeri a vo jei de jei Akaya ne, amo ta wó bere a tete we a toŋe zɛɛra mo, ye nɔɔn-nɔɔno bá wane o che amo teera yam konto. 11Amo nam na ke tei to, ko bere we a ba jege abam swono mo na? Wɛ nam yei ko na ye tei to.

12Amo ta wó taa toŋe zɛɛra, ne a na maŋe a ke tei to, se ko pa balo na lage ba bere we ba toŋe ne debam tei to daa yé na chwoŋa se ba bere ba tete konto. 13Banto nam na toŋe tei to ye ba gane nɔɔna mo. Ba maa pae se ba tete ye Yezu Krista totoŋa nakwa, ye ko maama ye vwa mo. 14Konto nam dae wo-kenkagele. Setaana pɛ tete wae o leiri o tete o bere we, o ye maleka kalo na nwoŋi Wɛ tei to. 15Konto ŋwaane, ko bá taa chana se setaana pɛ tontoŋena bam bere ba tete we, ba ye tontoŋena balo na tɔge Wɛ chega kam to. Ko kweelim jei ne mo banto wó na waarem se ko maŋe de ba kikia na ye tei to.

16Amo daa ta lwoori abam se á yé ta‑á boŋe we amo ye nɔn-jworo mo. Abam nam ná maŋe á boŋe we amo ye konto mo, se á kwaane á ja á bochara se a wane a na chwoŋa a bere a tete fenfee ne banto tei. 17Amo na lage a ŋɔɔne tei a bere a tete kamunim to, ko ba tɔge dé Teiru wom boboŋa, se ko nye de jworim mo. 18Nɔɔna dedɛ nam na yeini ba tɔge nabiina boboŋa ba ma bere ba tete to, amo de wó bere a tete konto dwoŋi mo. 19Abam yeini á sɛ balo na ye nɔn-jworru to de wopwolo, ye á nam pae ko ye swa mo á jega. 20Á yeini á ja á bochara de wolo maama na tu abam tei ye o jege fefeo to. Ko ta ná ye wolo na di nyɔɔre á baŋa ne to, naa wolo jeŋa na zo abam to, naa wolo na gwooni abam to, naa wolo na lɔge abam popɔŋɔ to, á yeini á sɛ kotu. 21Ko nam ná ye debam, dé kɔre foone se dé bɛɛse abam konto dwoŋi. Konto nam wó pa-ne chaveera na?

Nɔɔno nam ná wora ye o ba kɔre chaveera se o bere o tete de kolo maama to, amo de bá kɔre chaveera se a ke konto dwoŋi. (Ko nam ye a ŋɔɔne jworim mo.) 22Banto nam ná bere we ba ye Juu tiina mo, amo de nam ye konto mo. Banto ná bere we ba ye Isarele dwi tiina mo, amo de nam ye konto mo. Ba ná we ba kuri nwoŋi Abaraham dwi tiina wone mo, amo de nam ye konto mo. 23Banto ná bere we ba toŋe Yezu Krista totoŋa mo, amo nam tiini a dwoi-ba. (Amo na ŋɔɔne tei to nam nye de a yuu tera mo.) Amo na toŋe a pa Yezu tei to tiini ko chɛ a yera ne se ko dwoni banto. Ba jaane amo ba ke peena diga ne kuni dedɛ se ko dwoni banto. Ba daa ta ma fere amo dedɛ se ko dwoni banto. Amo dɛ toone tei kuni dedɛ se ko gaale. 24Kuni benu mo Juu tiina bam jaane amo ba fere fintɔ-nogo (39) de kaasa.#Nia Gulim 25:3 25Nɔɔna badaara de ma ja-ne kuni betɔ ba mage de da-lɔŋɔ. Maŋa kadwoŋi ne ba ma dole-ne de kandwa se ba go.#Kikia 14:19 Kuni betɔ mo a zo nabworo a tɔge naneo kom wo, ye ko ba ko chɔge ko maŋe na bam wone. Dɛ dedwe amo ma yɛ na bam baŋa ne tete de wea maama. 26Amo yeini a beeri mo maŋa maama. Amo na beeri konto to, wonnu dedɛ mo daane-ne, ko maa ye bwi na su se wɛɛle, de venverena mo daane-ne, ko woli de amo tete nɔɔna Juu tiina bam de dwi-gɛ tiina de daane-ne. Ko woli da, amo nɛ cham teene dem wone, de kagoa wone, de naneo kom wone, ko ta woli de nɔɔna balo na pae ba ye dé nu-bia ye ba dae to tei ne. 27Amo maa yeini a toŋa pa se ko chɛ a yera ne. Ko ma pae se a ba dɔ a sui. Kana de na-nyɔm maa jege-ne ye a peena. Waaro maa yeini te zoore-ne ye a ba jege gwaaro. 28Kolo nam na woli da to, amo na jege lwia a pae wɛ-di sem maama nɔɔna to mo tiini ko daane a boboŋa dɛ maama. 29Nɔɔno bochare ná bwona Wɛ chwoŋa tɔgem seeni, ko pae amo de tɔge a ye konto mo. Nɔɔno ná dɛ o dwoŋi ŋwaane o to tusim wone, ko pae a bane fuli mo.

30Ko nam ná ye fefeo se a bere a tete, amo jege se a taa jege teera de wonnu telo na bere we a bwona to. 31Baŋa Wɛ yei we amo ba fɔ vwa. Wonto maa ye dé Teiru Yezu Kwo, ye o maŋe se o taa jwoŋi teem taa wuu.

32Amo déem na wo Damasika teo kom wone to, gɔmena tu wolo na nii teo kom o pa Pɛ Areta to ma tiŋi nɔɔna teo kom ni dem ne, se ba yere amo ba ja ba pa‑o. 33Amo ma na chwoŋa a nwoŋi teo kom wone. Ko maa ye ba kwei-ne ba ke tetɔ-kamunu wone mo, ye ba lei ŋwana ko ni ne ba pa a tɔge takworo a nwoŋi a chu tega ne pa se a lu.#Kikia 9:23-25

Currently Selected:

2 Korinti 11: KBG

Highlight

Copy

Compare