1 Samuwel 31

Sɔɔl na gɛ o ŋwea tei to

1 Tigisim 10:1-14

1Konto maama na jege ko ke to, dedaane Filisi tiina bam kwaare jara mo dedaane Isarele tiina bam. Isarele jar-keira bam ma jage sae ye Filisi tiina bam pare-ba. Ba ma go Isarele tiina bam dedɛ Giliboa peo kom yuu ne. 2Sɔɔl de o bia bam ma duri, ye Filisi tiina bam pɛ ba kwaga ba pu. Ba ma go Sɔɔl bia Jonatan, de Abinadaba, de Maliki-Sua. 3Jara yam ma tiini ya peene Sɔɔl dedɛ. O dona bam ma na‑o ye ba ta ba chena ba tɔ‑o pa ko tiini ko ke‑o zonne.

4Sɔɔl ma ta de nɔn-doŋo wolo na zei o jara zela yam to o we, “Le n se-zɔɔ kom n ma n zɔ-ne n go. Amo ba lage se Filisi nɔn-yɔɔro tento yi amo yera ba de zɔ-ne se ba mɔne-ne ba ke chaveera” Nɔn-doŋo kom maa wo sɛ se o go‑o, foone na tiini de jege‑o to ŋwaane. Konto baŋa ne to, Sɔɔl ma vaŋe o tete se-zɔɔ o le. O ma kwei-ko o moore o puga ne, ye o daare o to ko baŋa ne o te. 5Nɔn-doŋo kom na maane we Sɔɔl tege to, o de ma le o se-zɔɔ kom o to ko baŋa ne ye o de te o tigi o tu wom takeiri ne. 6Ko déem ke konto mo ye Sɔɔl de o bia batɔ bam maama tɔge daane ba te, ko woli de nɔn-doŋo wolo na zei o jara zela yam to, de o kwaga nɔɔna bam maama. Ba maama déem tega dɛ dem konto ne mo.#1 Tigisim 10:13-14

7Isarele tiina balo déem na zoore Jezerele bwolo kom seeni to, de balo na wo Jɔdan buga kam wɛ-puli seeni to ma lɔre we Sɔɔl de o bia bam tege mo, ye Isarele jar-keira bam maama duri ba jage. Ba na nigi konto to mo ba duri ba lage jei ba daare ba teene dem. Filisi tiina bam ma vo ba zoore de wone.

8Tega na poore to, Filisi tiina bam ma jwoori jara kapworo kom ne se ba zane ba le jejegero twa bam yera ne. Ba ma na we Sɔɔl de o bia batɔ bam tege mo ba tigi Giliboa peo kom yuu ne. 9Ba na nɛ to, ba ma gwoni Sɔɔl yuu ba le. Ba ma daare ba lɔɔre o jara zela yam na wo o yera ne to. Ba laam ma toŋe kwora se ka yi Filisi tiina teene dem maama we ba di Sɔɔl. Ba ma tɔɔle taane dem ba jwona di sem wone, de ba dwi tiina bam na wo mɛ to. 10Ko ná ye Sɔɔl jara zela yam, ba kwei-ya ba ja zo ba tiŋi ba jwoni Asetare diga kam ne mo. Ba ma daare ba kwei o yera yam ba vo ba pale Bɛte-San teo kabira kam yera ne.

11Nɔɔna balo déem na zoore Jabese Gilead ne to ma ni Filisi tiina bam na ke Sɔɔl tei maama to. 12Balo na tiini ba ye bembɛ ba wone to ma zaŋe tete ne ba vo ba yi Bɛte-San se tega laam poore. Ba ma pare Sɔɔl de o bia bam yera yam teo kom kabira yera ne. Ba laam ma ja-ya ba jwoori Jabese, ye ba daare ba zwɛ-ya. 13Ko kwaga ne mo ba lage ba kwi sem ba ke daane, ye ba kwei-se ba suli sana kadwoŋi kuri ne, Jabese teo wone. Ba ta ma di ba lwi ye ba vɔ ba nia da yarepɛ.#2 Samuwel 2:5-6

Currently Selected:

1 Samuwel 31: KBG

Highlight

Copy

Compare