1 Samuwel 30

David chɔge Amaleki tiina bam

1David de o nɔɔna bam na zege jara kapworo ne to, da yatɔ dɛ ne mo ba vei ba yi Zikalag. Ba ma maane we Amaleki tiina bam mo tu ba di Judah tega-kuri seeni kagoa kam maama. Ba ya tu ba ja jara dedaane Zikalag teo kom, ye ba daare ba zwɛ-ko. 2Ko ná ye teo kom kaana bam de bia bam maama, Amaleki tiina bam wo go-ba. Ba pɛ-ba mo ba ja viiri, ko woli dedaane balo maama na zoore teo kom wone to.

3David de o nɔɔna bam na jwoori to, ba ma na we ba teo kom maama zwɛ ko daare di-dwonnu mo ko zege. Ba ta ma na we dona mo tu ba pɛ ba kaana bam de ba bia, bakeiri sem de busankane sem, ba ja ba kɛ. 4David de o kwaga kɔgɔ kom ma tiini ba kaase ŋɔɔ! Ba ma keeri taa ye dam daa tere ba tei ne se ba keeri. 5Ba dona bam nam ya jaane David kaana balei bam de mo ba woli da ba ja ba kɛ. Banto ye Jezerele tiina bukɔ Ahinoam, dedaane Nabale kadeim Abigali mo. 6David boboŋa maama ma jei. Kokuri to, nɔɔna bam maama wo déem pɛ mo de ba na gɛ ba bia bam to. Ba ma ke bana se ba dole David de kandwa ba go. David ma sale Baŋa Wɛ yera ne pa se o na baare.#Lei 21:7

7David laam ma ta dedaane Wɛ kaanem tu Abiatara o we, “Kwei kaanem gare-wogo kom n ja n ba, se dé ma dé bwei Wɛ dé nii dé wó ke tetɛ mo.” Abiatara ma ja gare-wogo kom o ba o pa‑o. 8David ma bwei Baŋa Wɛ o we, “A zaŋe a pare dé dona banto na? A ná pɛ ba kwaga a pu, a wó yi-ba a ja na?” Wɛ ma leiri o we, “Ɛɛ, véi-na á zeili-ba, se á wó yi-ba. Abam nam ta wó jwoŋi á nɔɔna bam á yage.”#1 Samuwel 23:6

9David ma ja o nɔɔna bia yaredo yam se ba vo ba ja ba dona bam. Ba ma vo ba yi Besora nabara kam, ye o nɔɔna bam badwonna maŋe dáane. 10Nɔɔna bia yalei mo ware se ba bɛ ba daa vo yiga, ba na tiini ba bugi to ŋwaane. Ko daare David dedaane nɔɔna bia yana yam na daare to ma bɛ nabara kam ba maa kɛa.

11Ba na maa vei to, David nɔɔna bam badwonna ma vo ba na Ejipti tu wodwoŋi na beeri gaao kom wone. Ba ma ja‑o ba vo David tei, ye ba daare ba pa‑o wodiu se o di dedaane na se o nyɔ. 12Kapere-kora dedaane kekan-wogila bwɛ selei mo ba pɛ‑o ye o di. O na di o ti to mo o dam jwoori, kokuri to, da yatɔ maama mo o wo di wodiu ye o wo nyɔge na, wea dedaane tete maama.

13David ma bwei‑o o we, “Nmo ye wɔ nɔɔno mo? N nam nwoŋi yei mo?” Nɔn-doŋo kom ma leiri‑o o we, “Amo nwoŋi Ejipti mo, ye a laam ye Amaleki tu kabaa. Da yatɔ na kɛ to, mo a tu wom dole-ne o yage, a na weele to ŋwaane. 14Dé ya vei dé ja jara de teene delo na wo kagoa kam seeni ye Cherete tiina bam zoore da to mo, de Judah laŋa kam tega-kuri seeni, ye dé ta yi kagoa kalo Kaleb dwi tiina na wora to. Dé ma zwɛ Zikalag teo kom dé woli da.” 15David ma ta ded‑o o we, “Nmo wó wane n ja-ne n yi mɛ venverena banto na wora to na?” O ma leiri o we, “Ɛɛ, a wó sɛ a ja‑m se dé vo ba na wo mɛ to. Nam du de Wɛ yere we, n bá‑n go-ne, n nam bá‑n jwoori n kwei-ne n ke a tu wom jeŋa ne.”

16Ejipti tu wom ma ja-ba o ja o vo o yi Amaleki tiina bam na wo mɛ to. Ba déem laam jage jei sem maama ne mo. Ba maa di ba boboŋa ba daare ba nyɔ sana ye ba kwɛɛre yɔɔ. Kokuri to, wonnu telo ba na vere Filisi tiina bam de Judah tiina bam tei ne to tiini te gaale. 17Tega na lage ka yi to, David ma zaŋe ba baŋa ne. O ma lɛɛre o jeeri-ba de jara taa se ko vo ko yi tega na poore to wɛ-zoore maŋa ne. Nɔɔn-nɔɔno wo lugi, ko ná dae nɔn-donno bia yana yerane. Banto déem kwei kona mo ba di ye ba duri ba viiri. 18David ma jwoori o jwoŋi nɔɔna balo maama Amaleki tiina bam na jaane ba vere to, de ba jejegero tem maama. O ma jwoŋi o kaana balei bam de o woli da. 19Kolokolo déem wo jei. Nɔn-donno tem, de nɔn-kwe sem, de bakeiri de busankane sem maama, ko ta woli de ba jejegero tem maama, kolokolo wo daare ko maŋe ba dona bam tei ne. David déem jwoori o jwoŋi te maama. 20David ma ja vara bam maama pa se o nɔɔna bam kale-ba ba ke ba kɔgɔ kom yiga ne. Ba maa via ye ba we, “Wonnu tento maama ye David nyem mo jara yam ŋwaane.”

21David ma jwoori o vo o yi nɔɔna bia balei balo ya na bwona ye ba maŋe Besora nabara kam ni ne to tei. Banto ya ba jege dam se ba tɔge ba vo ba ja jara yam. Ba ma nwoŋi se ba jeeri David de o kwaga kam. David de ma tutwoni o yi-ba ye o daare o ware-ba dedaane wopwolo. 22Puseŋ-nyena de nɔn-yɔɔro déem maa wo David kwaga nɔɔna bam wone. Ba ma ta ba we, “Nɔɔna banto wo wane ba tɔge de debam ba vo ba ke jara yam. Konto ŋwaane, dé bá sɛ se dé pɔɔre wonnu telo dé na vere dé dona bam tei ne to dé pa-ba. Dé wó pa nɔɔno maama kwei o kaane de o bia bam yerane mo o ja o viiri!”

23David ma ta o we, “Amo nɔɔna bam, yé ke-na wo-loŋo dedaane woŋo kolo maama Baŋa Wɛ na pɛ debam to. Wonto mo kwoli debam, ye o daare o pa dé di dé dona balo ya na tu ba vere debam to. 24Abam taane dem tera. Nɔɔna bam maama wó chɛ kolo Wɛ na pɛ debam to, se ko taa mae daane. Balo na vei jara jei to, de balo na maŋe kwaga ne ba nii zela yam baŋa ne to maama wó jwoŋi ko mae daane mo.” 25Ko na zege dɛ dem konto ne to se ko ba ko yi zem, David lɛɛre o pa Isarele tiina bam tɔge ni dem konto mo.

26David ma ja kolo maama o na vere Amaleki tiina bam tei ne to, o ja o jwoori Zikalag. O ma pa ba le wonnu tem tedwonna ba ja ba vo ba pa Judah nakwa bam na ye o yuudwonna to, ye ba ta-ba ba we, “Nii-na, dé vere wonnu tento Baŋa Wɛ dona bam jeŋa ne mo. Abam de jwoŋi-na pɛɛre á ta‑á jega.” 27O déem le pɛɛra yam konto dwoŋi mo o toŋe o pa Bɛtel tiina bam, de tega-kuri kagoa kam teo Ramofa tiina bam, de Jatira tiina bam, 28ko ta woli de Arowa tiina bam, de Sifimofa tiina bam, dedaane Esetemoa tiina bam, 29de Rakali tiina bam. O ta ma toŋe pɛɛra o pa balo na zoore Jerameeli teene dem de Keni teene dem wone to, 30dedaane Horama tiina bam, de Borasan tiina bam, de Atachi tiina bam, 31ko ta woli de Heboron tiina bam. David déem toŋe pɛɛra yam se ya yi teene delo maama o de o nɔɔna bam na kare da ba kɛa ba beira kam wone to mo.

Currently Selected:

1 Samuwel 30: KBG

Highlight

Copy

Compare