2 Samuwel 1
1
David nigi Sɔɔl na tege tei to.
1David déem di Amaleki tiina bam mo ye o daare o jwoori Zikalag. O maa maŋe da o ke da yalei dedaane Sɔɔl maŋe o te. 2David na jwoori ye ko ke da yatɔ to nɔɔno ma nwoŋi Sɔɔl jar-keira bam wone o ba o tei. Nɔɔno wom déem ya kaare o gwaaro mo, ye o daare o kwei kasolo o ma o taare o yuu o wo-chechɔgɔ kom ŋwaane. O ma yi David tei, ye o vwi o yibia tega ne o zuli‑o.
3David ma bwei‑o o we, “Nmo nwoŋi yei ne mo?” O de ma leiri o we, “Amo ya tɔge a wo Isarele jar-keira bam wone mo, ye a duri a lu jara yam wone a ba ywo-seeni.”
4David daa ma ta‑o o we, “Ta kolo maama na ke to n bere-ne.” Nɔɔno wom ma leiri o we, “Isarele jar-keira bam duri mo ba jage se ba lu. Ba dedɛ nɛ zonne mo, ba badwonna de ma te. Sɔɔl de o bu Jonatan de ma tɔge ba te.”
5David daa ma bwei nɔɔno wom o we, “N ke tɛ mo n lɔre we Sɔɔl de Jonatan seene ba te?”
6Nɔn-doŋo kom ma leiri o we, “Amo yɔɔre a zege Giliboa peo kom yuu ne mo ye a na Sɔɔl na sale o chichwei dem yera ne o zega. Ko ma maŋe dedaane dé dona bam diini ba sisein-nɔɔna de ba torokooro tem ba duri ba ma yi o tei. 7O ma pipiri o na amo ye o bwoŋi-ne se a vo a woli‑o. A ma sɛ ye a we, ‘Pɛ, nii-ne da!’ 8O ma bwei amo o we, ‘N ye wɔ mo?’. Amo ma leiri‑o a we ‘A ye Amaleki tu mo.’ 9O laam ma lwoori amo o we, ‘Fɔge n zege konto se n go-ne, se a dam maama ti, ye a toone dem bwola mo.’ 10O na tage konto to, a ma lɛɛre a go‑o, bɛŋwaane a lɔre we ko tiini ko ni‑o ye o daa bá wori. A laam ma dɔne paare yipuga kam na wo o yuu ne to, ye a daare a le o jeŋa baŋa kam, se a ja a ba a pa‑m. Amo tu, nii-te da.”
11David na nigi konto to, o wo déem ma chɔge. O ma ja o na zo gwaaro telo to o vaŋe o kaare. O nɔɔna bam maama de ma ke konto. 12Ba ma lɛɛre ba keeri taa ye ba vɔ ni se ko vo ko yi dedaan-ni maŋa. Ba wo déem chɔge dedɛ Sɔɔl de o bu Jonatan toone dem ŋwaane, dedaane Baŋa Wɛ tete nɔɔna bam maama ŋwaane, de Isarele tiina bam dedɛ na tege jara yam wone to ŋwaane.#1 Samuwel 31:1-13
13David daa ma bwei nɔn-doŋo kolo na jaane kwora kam o ba o pa‑o to o we, “Nmo nwoŋi yei ne mo?” O de ma leiri o we, “A ye Amaleki tu mo, ye a laam zoore Isarele tega kam ne.”
14David laam ma bwei‑o o we, “Bɛ mo tu n yuu ne pa se n ma n jeŋa n go Baŋa Wɛ na kuri wolo se o taa ye Pɛ to? Foone ba jege‑m na?” 15O ma bwoŋi o nɔɔna bam dedoa o pa‑o ni o we, “Zɔ‑o n go!” O de ma seene o vo o zɔ Amaleki tu wom o go. 16David nam ya tage de Amaleki tu wom mo o we, “Nmo toone dem ye n tete yiga mo. N mɛ n ni mo n ŋɔɔne n ve n tete bora, de n na we, nmo mo go Pɛ wolo Baŋa Wɛ na kuri to.”
David keeri Sɔɔl de Jonatan toone
17David déem laam ma leeni luseim leiŋa se o ma o guli Sɔɔl de Jonatan gula. 18O ta ma pa ni se ba kwei-ka ba bere Judah tiina maama. O ma bwoŋi leiŋa kam we ‘Taŋa Baŋa Leiŋa.’ Leiŋa kam konto popone ka tiŋi Jasare tɔnɔ kom wone mo. O maa we:
19“Isarele tiina bam,
dé bembɛ sem to dé peero tem yuu ne ba te.
Nii-na dé jar-keira dedɛɛra bam na tiini ba to tei!
20Yé ta-na taane dento se Gafa tiina ni.
Yé tɔɔle-na-de Asekelon teo kom pwooni ne.
Filisi tiina kaana ná nigi-de,
ba wó taa chake mo de wopwolo.
Balo na yeiri Wɛ to wó taa mɔna.
21Giliboa peero tem,
Wɛ bá sɛ se nyɔnɔ daa to á yuu ne.
Doa de nam daa bá ne.
Abam kare sem daa bá ke wodiiru.
Kokuri to, dáane mo babɛ sem jara zela yam maŋe teero wone.
Ba daa ba lage ba lwo nuga
ba ma taare Sɔɔl jara-keim nantana kam.
22Jonatan déem ná tage o taŋa,
o dona wó siiri mo bare-bare,
ba ze ná maŋe ba ye babɛ tei de.
Sɔɔl de ná le o se-zɔɔ,
wonto wó mage o dona mo o de,
ye ko bá jwoori kafɛ.
23Sɔɔl de Jonatan,
nɔɔna déem jege ba swono dedɛ!
Ba ŋwea wone, ba ye daane mo,
ba ta ma tɔge daane ba te.
Ba tiini ba wara ba dwoi maaro,
ye ba ta dana ba dwoi nywonnu.
24Isarele tiina kaana bam,
ta‑á keeri-na Sɔɔl toone dem ŋwaane!
Se o déem pɛ se á zo gare-laaro telo na ke sabu dedɛ to mo.
O ta ma kwɛ á gwaaro tem dedaane sabu-seŋa wonnu.
25Nii-na jar-keira bembɛ sem na to jara tetare ne tei!
Jonatan ma te o tigi peero tem yuu ne.
26Amo choro Jonatan,
a wo tiini ko chɔge nmo ŋwaane.
Nmo tiini n jege lonne n pa-ne!
Swono kolo nmo na jege n pa amo to
dwoi nɔɔno de o kaane swono na ye tei to.#1 Samuwel 18:1
27Nii-na jar-keira bembɛ sem na to jara wone tei!
Ba jara zela yam daa ba jege kuri!”
Currently Selected:
2 Samuwel 1: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
