1 Jɔn 3

Wɛ na pɛ se de ji o bia tei to

1Boŋe-na á nii dé Kwo Wɛ na tiini o swoi debam tei to. Ba ma debam ba bwoi we Wɛ bia. Dé nam seene dé ye konto mo.#Jɔn 1:12 Nɔɔna balo na ye logo baŋa nyem to yiga nam tera de debam, ba na yeiri Wɛ to ŋwaane.

2A badwoŋ-swonnu bam, debam laam ye Wɛ bia mo, ye dé ta wo lɔre jaja dé na wó taa ye tei to. Dé nam yei we, Yezu na wó jwoori o nwoŋi nabiina yiga ne maŋa kalo to,#3:2 naa maŋa kam ko na wó ba ko lɔre jaja to ná yia, dé wó ba dé taa nye ded‑o mo, dé na wó yɔɔre dé na o yibia to ŋwaane. 3Wolo maama na daŋe o teena Wɛ baŋa ne tento dwoŋi to jege se o che o tete de wo-digiru maama mo, nenɛɛne Yezu na ye tei ye o ba jege digiru to.

4Wolo maama na yeini o ke wɛleera to paale o chɔge Wɛ ni dem mo. Wɛleera keim de Wɛ ni chɔgem ye bedwe mo. 5Abam yei we, Yezu déem na jigi nabiinu o ba logo baŋa to, ko ye se o saare nabiina wɛleera mo o yage. Wonto nam ba jege wɛleere kɔtaa.#1 Piita 2:22 6Konto to, wolo maama na me ded‑o to ba tɔge wɛleera keim. Wolo maama nam na yeini o ke wɛleera to maŋe o wo lɔre‑o, ye o wo me ded‑o.

7A bia bam, yé pa-na se nɔɔn-nɔɔno na chwoŋa o gane abam. Wolo maama kikia na tɔge chega to mo jege chega Wɛ tei ne, ne Yezu de na jege chega tei to. 8Ko daare wolo maama nam na tɔge wɛleera keim to bere we o ye setaane nyem mo, kolo ŋwaane setaana pɛ wom maŋe o yɔɔre o tɔge wɛleera chwoŋa mo ko zege boboa ne. Wɛ Bu wom nam tu logo baŋa se o chɔge setaana pɛ wom kikia yam mo. 9Wolo maama na seene o ye Wɛ bu to ba tɔge wɛleera keim, kolo ŋwaane Wɛ ŋwea mo wo o bochare ne. Konto to, o daa bá wane o tɔge wɛleera keim, o na ye Wɛ bu to ŋwaane. 10Konto mo dé wó wane dé pɔɔre balo na ye Wɛ bia to de balo na ye setaane bia to daane. Wolo maama kikia na ba tɔge chega to dae Wɛ nyem, ko woli de wolo de na ba jege o dwonna swono to.

11Ko ye chega, dé jege se dé taa swoi daane mo. Konto ye Wɛ kwora kalo abam na maŋe á ni boboa ne to. 12Dé nam ba jege se dé ke nenɛɛne Kain déem na ke kolo faŋa faŋa to. Wonto déem ye wo-lwanno tu setaane jeŋa nɔɔno mo. O ma mage o nyaane o go. O déem ke konto kolo ŋwaane o tete kikia mo ye wo-lwanno, ye o nyaane wom kikia yɔɔre ya tɔge chega.#Pulim 4:8

Wɛ swono kom taane

13A nu-bia bam, balo na jege kugu jei logo baŋa ne to ná chuli abam, yé pa-na ko kagele abam. 14Ko ná ye debam, dé yei we dé maŋe dé yage toone chwoŋa kam, ye dé daare dé tɔge Wɛ ŋwe-doŋa chwoŋa kam mo.#Jɔn 5:24 Dé na swoi dé dwonna tei to mo pae dé lɔre konto. Wolo maama nam na ba swoi o dwonna to ta wo toone jeŋa ne mo. 15Wolo maama na chuli o dwonna to nye de nɔn-goro mo. Abam yei we nɔn-goro tera o na wó wane o taa jege Wɛ ŋwe-doŋa kam o bochare ne.

16Yezu na tiini o swoi debam tei to mo tei o sɛ se o te debam ŋwaane. Konto ma pa dé lɔre swono chekke na ye tei to. Mo kokuri ko maŋe se debam de sɛ se dé te, se dé wane dé jwoŋi dé dwonna ŋwea. 17Nɔɔno wolo maama na ye jejegero tu to ná lɔre we o dwoŋi ba gara, ye kotu ná wo pɛ se o ŋwaŋa zo‑o, ko bere we Wɛ swono kom tera o bochare ne.

18A bia bam, dé kikia mo jege se ya bere we, dé swono kom dé na jege to dae ni taane yerane, se ko ye swono kolo na seene ko tɔge chega to mo.

19-20Dé ná jege swono kom konto dwoŋi, ko wó pa se dé lɔre we, dé seene dé tɔge chega chwoŋa kam. Konto to, dé bochara ná pɛ dé lɔre we dé ke woŋo dé tusi, dé nam bá taa kɔre foone Wɛ yiga ne, kolo ŋwaane dé yei we Wɛ daga o dwoi dé bochara yam na ye tei to, de o na yei wonnu maama to.

21A badwoŋ-swonnu bam, debam bochara na bá wane ya chɔge debam to, dé wó taa jege baare se dé taa ye de Wɛ. 22Ko woli da, dé wó seene dé na woŋo kolo maama dé na wó lwoori o tei ne to, dé na tɔge o nia ye dé ke kolo na pwoli o wo to ŋwaane. 23Wɛ ni dem mo tento: dé jege se dé ke dé wo-dedoa de o Bu Yezu Krista, se dé kwori dé taa swoi daane, nenɛɛne wonto na pɛ debam ni se dé taa ke tei to.#Jɔn 13:34 24Wolo maama na tɔge Wɛ nia yam to me ded‑o mo, ye Wɛ wo o tei ne. Wɛ Sin-laao kom o na pɛ debam to mo pae se dé lɔre we, Wɛ seene o wo debam tei ne.

Currently Selected:

1 Jɔn 3: KBG

Highlight

Copy

Compare