1 Jɔn 2

Yezu zege nabiina de Wɛ laŋa ne

1A bia bam, amo popone tɔnɔ konto a pa abam se á yé ta‑á ke wɛleere mo. Debam wolo nam ná ke wɛleere, dé jege wolo na wó zege debam de dé Kwo Wɛ laŋa ne o fɔge debam to. Wonto mo ye Yezu Krista na yɔɔre o ye chega tu to.#Hiburu 7:25 2Wonto toone dem ŋwaane mo Wɛ saare debam wɛleera, ye ko nam dae debam wɛleera yerane, se ko ye de logo baŋa nɔɔna maama wɛleera mo.

3Dé na wó ke tei se dé lɔre we dé seene dé me de Wɛ to ye dé ná sɛ dé tɔge o nia mo. 4Nɔɔno nam ná tɛ o we omo yei Wɛ, ye o ná ba toŋe o tɔge Wɛ nia yam, konto tu ye vwa-nyem mo, ye chega tera o tei ne. 5Ko daare nɔɔno wolo nam ná sɛ Wɛ ni taane, konto tu ye wolo na tiini o bere Wɛ swono kom chekke to mo. Dé ná tɔge Wɛ nia tei to mo wó pa dé lɔre we, dé seene dé wo o jeŋa ne. 6Nɔɔno wolo nam ná tɛ o we, o me de Wɛ, konto tu jege se o taa tɔge Yezu nɛ-bwora na ye tei to mo.

Wɛ ni-doore dem na bere tei to

7A badwoŋ-swonnu bam, ni delo amo na popone se a pa abam to dae ni-doore. Ni dem nam maŋe de ye ni-dwoori mo, ye de maŋe de wora abam tei ne boboa ne. Ni dem konto ye taane delo abam na maŋe á ni to mo. 8Ko daare, de daa ta ye ni-doore mo, kolo ŋwaane Yezu mo pɛ de ji chega, ye de kwori de ji chega abam de tei ne. De maa nye de lim na wora de kɛa, ye pwooni delo na ye chekke to laam maa wora de nyea.#Jɔn 13:34; 15:12, 17

9Nɔɔno wolo maama ná tɛ o we, omo wo pwooni wone de o ŋwea, ye o ta ná chuli o dwonna, konto tu ta wo lim wone mo de zem maama. 10Ko daare nɔɔno wolo nam ná swoi o dwonna, konto tu mo zoore pwooni wone. Kolokolo tera ko na wó wane ko pa se o to tusim wone. 11Nɔɔno wolo nam na chuli o dwonna to wo lim wone mo. O maa kare o beera lim dem wone, ye o yeiri o na wó vo mɛ to, kokuri lim dem mo pɛ se o yia daa ba nae.

12A bia bam, amo popone tɔnɔ kom a pa abam, se á lɔre we Wɛ yage á wɛleera o ma chɛ abam Yezu yere ŋwaane.

13A kwoa bam, amo popone a pa abam, á na maŋe á yei wolo wom na maŋe o wora boboa ne to ŋwaane.

Nɔn-donno tem, amo popone a pa abam, á na wane wo-lwanno tu setaane to ŋwaane.

14A bu-swonnu tem, amo popone a pa abam, kolo ŋwaane abam maŋe á yei dé Kwo Wɛ.

A kwoa bam, amo popone a pa abam, á na maŋe á yei wolo wom na maŋe o wora boboa ne to ŋwaane.

Nɔn-donno tem, amo popone a pa abam, abam na jege pu-dɛa to ŋwaane. Á maa jege Wɛ ni taane dem á boboŋa ne, ye á wane wo-lwanno tu setaane.

15Yé zaŋe-na á ta‑á swoi logo baŋa de ko wo-yɔɔro tem. Nɔɔno wolo ná swoi logo baŋa wo-yɔɔro tem, konto tu daa ba jege dé Kwo Wɛ swono.#Jemsi 4:4 16Kolo ŋwaane logo baŋa wo-yɔɔro tem maama, ko ná ye nabiina fera na yeini ya zoore wo-zɔɔna yalo to, de nabiina yia na yeini ya su wonnu telo to, naa nabiina na mage ba nyɔɔna de ba jejegero tei to, tento maama dae dé Kwo Wɛ nyem, se te kuri nam nwoŋi logo baŋa ne mo. 17Logo baŋa de ko wo-yɔɔro telo maama nabiina fera na zoore to lage te jei mo. Ko daare wolo nam na ke kolo Wɛ boboŋa na lage to wó taa wora taa, se ko taa vei wuu.

Yezu Krista Dono wom taane

18A bia bam, logo baŋa kweelim da yam yi ya ti. Abam maŋe á ni we Yezu Krista Dono wom maa beena. Ko na ye tei to, Yezu dona dedɛ mo maŋe ba wora. Ko ma pa dé yei we da yam konto yi ya ti. 19Dona bam konto pwɛ ba tete debam kɔgɔ kom wone, ye ba maŋe ba dae debam kɔgɔ kom nyem. Ba ya ná ye debam kɔgɔ kom nyem, ba ya bá yage debam tei. Ba nam na pwɛ ba tete konto to, ko bere lanyerane we banto wolowolo tɔge o dae debam kɔgɔ kom nyem.

20Ko nam ná ye abam, á maŋe á na zeinim Wo-pwoŋo Tu wom tei ne, pa se á maama lɔre Wɛ chega kam. 21Konto to, amo na popone a pa abam to, ko dae we á na yeiri chega kam to ŋwaane. Woŋo kolo ŋwaane a na popone to ye á na maŋe á yei kolo na ye chega, ye á yei we vwa de chega ba tɔge daane to mo.

22Ko nam ná ye wolo na seene o ye vwa-nyem to, o ye wolo na tɛ we, Yezu dae Vereno wolo Wɛ na toŋe to. Konto tu maa ye Yezu Krista dono mo, ye o ve dé Kwo Wɛ de o Bu wom de. 23Wolo maama nam ná ve Wɛ Bu wom, o Kwo Wɛ de tere konto tu tei ne. Ko daare wolo maama ná bere we o sɛ Wɛ Bu wom, o Kwo Wɛ de wora konto tu tei ne.

24Ta‑á yei-na se á ta‑á tɔge berem delo á na maŋe á ni boboa ne to, se á fɔge á ta‑á jege-de á boboŋa ne. Á ta ná yɔɔre á tɔge berem dem konto, ko wó pa se abam de Wɛ Bu wom me daane, de o Kwo Wɛ de. 25Mo Wɛ Bu wom na pwooli se o pa debam kolo, ye ko ye Wɛ ŋwe-doŋa kalo na ba jege kweelim to.

26Nii-na, amo popone wonnu tem konto a pa abam, se á wane á lɔŋe balo na lage ba gane abam to mo. 27Ko nam ná ye abam, zeinim delo á na jwoŋi Wɛ Bu wom tei ne to ta wora abam tei ne. Á daa ba jege se nɔɔn-nɔɔno zaŋe o bere abam á na wó tɔge chega tei to. Wɛ Bu wom na zeini abam to, ko ye se á lɔre wonnu maama mo. O berem dem ye chega mo ye de dae vwa. Konto to, me-na ded‑o, nenɛɛne o na bere abam se á ta‑á ye tei to.

28A bia bam, pa-na dé me de Wɛ Bu Yezu Krista. Konto mo dé wó na baare o yiga ne maŋa kam o na wó jwoori o nwoŋi nabiina yiga ne to, ye chaveera bá ja debam. 29Abam yei we wonto mo ye chega tu, ye ko pa á lɔre we wolo maama kikia na tɔge chega to seene o ye Wɛ bu mo.

Currently Selected:

1 Jɔn 2: KBG

Highlight

Copy

Compare