1 Jɔn 4

Dé na wó lɔre nɔɔna daane tei to

1A badwoŋ-swonnu bam, yé zaŋe-na á sɛ nɔɔno wolo maama na tɛ o we, Wɛ Sin-laao kom wo o tei ne to. Á nam jege se á faŋe á nii se á lɔre ko ye Wɛ Sin-laao kom mo, naa jworo kodwoŋi mo, kolo ŋwaane nɔɔna dedɛ balo na pae ba ye Wɛ sampwori to tu ba kare logo baŋa ne mo ba gane nɔɔna. 2A lage a bere abam á na wó ke tei se á lɔre we, ko seene ko ye Wɛ Jworo kom naa ko dae. Nɔɔno wolo maama ná sɛ o we, Yezu Krista déem jigi nabiinu o ba logo baŋa, Wɛ Jworo kom wo konto tu tei ne.#1 Korinti 12:3 3Ko daare nɔɔno wolo maama ná ve Yezu, Wɛ Jworo kom tera konto tu tei ne. Wonto jworo kom nam mo ye Yezu Krista Dono wom nyem. Abam maŋe á lɔre we, Dono wom konto lage o ba logo baŋa. Leile konto o laam maŋe o ba o wora.

4A bia bam, abam ye Wɛ nyem mo. Abam maŋe á wane vwa-nyena bam konto, kolo ŋwaane Wɛ wo abam tei ne, ye wonto dam dwoi dam delo na wo logo baŋa nyena bam tei ne to.#Rom 8:31 5Vwa-nyena bam konto kugu jei wo logo baŋa ne mo. Konto ŋwaane mo ba na yeini ba ŋɔɔne kolo to nwoŋi logo baŋa ne, ye ko nɔɔna bam yeini ba sɛ banto na tɛ kolo to. 6Ko nam ná ye debam, dé ye Wɛ nyem mo. Wolo maama na me de Wɛ to mo wó sɛ debam na tɛ kolo to. Wolo nam na dae Wɛ nyem to mo ba sɛa. Konto mo dé wó wane dé lɔre jworo kolo na tɛ chega, de kolo na gane nɔɔna to daane.

Da-swono taane

7A badwoŋ-swonnu bam, pa-na dé taa swoi daane, kolo ŋwaane swono nwoŋi Wɛ tei ne mo. Wolo maama ná jege o dwonna swono, konto tu ye Wɛ bu mo, ye o kwori o me de Wɛ. 8Wolo maama nam na ba swoi o dwonna to ta wo me de Wɛ, kolo ŋwaane Wɛ mo ye swono tu. 9Wɛ na jege debam swono tei to mo tu ko bere jaja de o na toŋe o Bu-doa se o ba logo baŋa, se dé wane dé na Wɛ ŋwe-doŋa kam omo ŋwaane to. 10Swono chekke na ye tei to mo tento: Ko dae nenɛɛne debam mo swoi Wɛ, ko ye Wɛ mo swoi debam. Wonto swono kom mo pɛ o toŋe o Bu wom se o ba o te o ma o toone jana bam o saare dé wɛleera.#Rom 5:8

11A badwoŋ-swonnu bam, Wɛ na tiini o swoi debam konto to, ko maŋe se debam de taa swoi daane mo. 12Nɔɔn-nɔɔno tera o yi na nɛ Baŋa Wɛ. De konto de, dé ná jege da-swono, Wɛ wó me de debam, ye o swono kom wó ji chega debam tei ne.

13Wɛ na pɛ debam o Sin-laao kom to mo pae se dé yei we dé me de Wɛ, ye o wo dé tei ne. 14Debam nɛ we, dé Kwo Wɛ toŋe o Bu wom se o ba logo baŋa o ji nabiina Vereno mo. Debam laam zege chega kam konto kwaga ne mo. 15Wolo maama ná seene o bere we Yezu mo ye Wɛ Bu wom, konto tu bere we Wɛ wo o tei ne, ye wonto me de Wɛ. 16Debam tete lɔre Wɛ na swoi debam tei to, ye dé sɛ o swono kom lanyerane. Wɛ ye swono tu mo. Wolo maama ná swoi swono kikia, konto tu me de Wɛ, ye Wɛ wo o tei ne.

17Wɛ swono kom na jigi chega debam tei ne to, ko ye se dé na baare dɛ dem Wɛ na wó bore nɔɔna bora to. Dé bá kɔre foone, kolo ŋwaane debam ŋwea de Yezu ŋwea maama ye bedwe mo logo baŋa ne. 18Foone bá wane de taa wora swono wone. Swono kolo na ye chekke to mo wó zeili foone pa de viiri. Zwɛ vaŋem mo pae foone wora. Konto to, nɔɔno wolo ná kɔre foone, ko bere we Wɛ swono kom ta wo jigi chega konto tu tei ne.

19Wɛ na dɛ yiga o swoi debam to mo pae dé swoi dé dwonna. 20Nɔɔno wolo ná tɛ o we, omo swoi Wɛ, ye o ta ná chuli o dwonna, konto tu ye vwa-nyem mo. Kolo ŋwaane, nɔɔno wolo yi na nae o dwoŋi ye o ba jege o swono to, konto tu nam bá wane o taa swoi Wɛ wolo o yi na ba nae to. 21Wɛ pɛ debam o ni we, wolo maama na swoi omo to jege se o taa swoi o dwonna de mo.

Currently Selected:

1 Jɔn 4: KBG

Highlight

Copy

Compare