1 Korinti 15
15
Yezu Krista biim taane
1A nu-bia bam, a lage se a pa á guli Wɛ kwor-ywoŋa kam a na maŋe a tɔɔle a bere abam to mo. Abam maŋe á jwoŋi-ka ye á zege ka chega kam kwaga ne. 2Amo na pɛ á lɔre Wɛ kwor-ywoŋa kam konto to, Wɛ tɔge ka baŋa ne mo o vere abam o yage, nenɛɛne á ná wo jwoori ka kwaga ne. Naa á sɛ Yezu kafɛ ŋwaane mo na?
3Wɛ chega kalo na dwoi maama to ye kalo amo na jwoŋi ye a laam daare a lwoni a bere abam to mo. Kanto nam mo tento:
Yezu Krista tege debam wɛleera ŋwaane mo, ne Wɛ tɔnɔ kom na maŋe ko ta tei to.#Izaya 53:4-12 4Ba ma suli‑o. Da yatɔ dɛ ne o ma jwoori o bi toone wone, ye konto de ta ye Wɛ tɔnɔ kom na wuuri ko ta kolo to mo.#Kikia 2:24 5O na bi to, Piita ma na‑o, ye o tontoŋena fuga-balei bam de na‑o.#Jɔn 20:19 6Konto kwaga ne, o tɔgena dedɛ ma na‑o bedwe baŋa ne, ba na dwoi nenɛɛne nɔɔna bia yanu (500). Nɔɔna bam konto dedɛ ta mo ŋwe ye ba fenfee te. 7Jemsi de daa ma na‑o, ye ko daare pa o totoŋa nakwa bam maama na‑o.
8Ko na kweeli to, o laam ma veere o tete de amo, de amo na maŋe a nye de wolo ba na loga ye o lora maŋa ta wo yi to de mo.#Kikia 9:3-6 9Ko na ye tei to, amo tiini a muri Yezu totoŋa nakwa bam maama wone. A muri se ba taa bwoi-ne we Yezu tontoŋeno, kolo ŋwaane a déem bɛɛse o nɔn-kɔgɔ kom mo.#Kikia 8:3 10Wɛ tete zaane dem nam mo pɛ se a ji a na ye wolo zem to. O na ke-ne zaane tei to dae kafɛ. Amo tiini a toŋe a pa‑o, se ko dwoni o tontoŋena bam maama. Ko nam dae a tete dam ŋwaane mo a wae a toŋa. Ko ye Wɛ zaane dem o na ke a yuu ne to ŋwaane mo.
11Debam balo na ye Yezu tontoŋena to maama yeini de bere chega dedoa mo. Ko ná ye amo na bere kolo to, naa banto de na bere kolo to, ko ye chega kalo abam na sɛ to mo.
Twa biim taane
12Debam maama na tɔɔle Wɛ chega kam we, Yezu Krista bi toone wone to, bɛ nam mo ye abam badwonna tɛ á we, twa biim tera? 13Ko ya ná ye chega we twa biim tera, ko bere we Yezu Krista tete de wo bi mo. 14Wonto nam ya ná wo bi toone wone, kokuri mo debam na bere Wɛ chega kam tei to ye kafɛ mo, ye abam na ke á wo-dedoa de Wɛ tei to de ye kafɛ. 15Ko ta bere we, dé na bere Wɛ chega kam tei to, ko ye vwa mo dé fɔge dé pa‑o, kolo ŋwaane dé yeini dé bere nɔɔna we, Wɛ mo bi Yezu Krista toone wone. Twa biim nam ya ná seene de tera, kokuri mo Wɛ wo bi Yezu. 16Twa biim ná tera, ko bere we Yezu Krista de maŋe o wo bi mo. 17Wonto ya ná wo bi toone wone, ko bere we abam na ke á wo-dedoa ded‑o tei to ye kafɛ mo, ye á wɛleera yam ta wo á yuu ne. 18Ko ta bere we, balo na sɛ Yezu Krista ye ba laam te to gɛ ba ŋwea mo Wɛ tei ne. 19Ko ná ye logo baŋa ŋwea kanto yerane ŋwaane mo dé jege teena Yezu Krista wone, ko bere we dé tiini dé ye zora mo nɔɔna maama tei ne.
20Ko nam seene ko ye chega mo we, Yezu Krista bi toone wone. Wonto mo ye wolo na dɛ yiga o bi o vo Wɛ tei, se ko bere we balo de na me ded‑o ye ba te to de wó bi toone wone. 21Toone zege nabiinu dedoa yera ne mo de wora. Ko ta ye bedwe mo de twa biim de na zege nabiinu dedoa yera ne tei to. 22Nabiina ŋwea de Adam ŋwea na ye bedwe to ŋwaane mo pae se ba maama toa. Ko ta ye konto dwoŋi mo de balo maama ŋwea de Yezu Krista ŋwea na ye bedwe to wó bi ba na ŋwea Wɛ tei ne.#Jɔn 11:25 23Nɔɔno maama de o na tu tei to mo. Yezu Krista nam mo dɛ yiga o bi o vo Wɛ tei. Ko daare balo de na ye o nɔɔna to wó bi maŋa kam o na wó jwoori o ba to. 24Ko laam daare se logo baŋa wonnu maama mo ti. Maŋa kam konto ne mo Yezu Krista wó wane wonnu telo maama na jege dam nabiina baŋa ne to o pa te dam dem ti, ko ná ye wɛyuu dedɛɛra, naa tega baŋa dedɛɛra maama. O maa wó daare o kwei woŋo kolo maama o na tu o di paare ko baŋa ne to o ke o Kwo Wɛ jeŋa ne. 25Ko nam fe mo se Yezu di paare taa, se ko taa vei maŋa kam Wɛ na wó wane o dona maama o ke o dam kuri ne to. 26Toone nam mo ye o dono wolo o na wó wane o ma kweeli to. 27Wɛ tɔnɔ kom bere we, “Wɛ kwei wonnu maama o ke wonto dam kuri ne se o taa tei-te.”#Lei 8:6 Ko nam na we, o taa tei wonnu maama to ba lage ko bere we, o tei Wɛ tete mo o woli da. Ko ye Wɛ mo kwei wonnu tem maama o ke Yezu dam kuri ne. 28Maŋa kalo Yezu na wó ba o taa tei wonnu maama to mo o laam wó kwei o tete o ke Wɛ jeŋa ne se o taa tei‑o, o na ye Wɛ Bu wom to ŋwaane. Kolo ŋwaane Wɛ ye wolo na maŋe o ke wonnu maama o Bu wom dam kuri ne to mo. Konto to, Wɛ mo tei wonnu maama de o dam maama.
29Abam nɔɔna badwonna yeini ba jwoŋi sɛɛm ba pa twa. Twa biim nam ná tera, bɛ nyɔɔre mo wó taa wora ba sɛɛm dem baŋa ne? Bɛ mo ye ba yeini ba jwoŋi sɛɛm twa bam ŋwaane konto? 30Twa biim nam ná tera, bɛ ŋwaane mo ye debam ba kɔre se dé yaare dé te Wɛ ŋwaane? 31A nu-bia bam, dɛ maama amo yeini a tɔge toone tei mo a kɛa. Ko ye chega mo. Amo tiini a jege teera abam baŋa ne dé Teiru Yezu Krista ŋwaane. Konto mo pɛ a ta konto dwoŋi. 32Efesia ywo-seeni ba ke amo, nenɛɛne kago-vara mo chiŋi jara se ba ja nɔɔna tei. Amo na sɛ se a yaare konto to, ko ná ye logo baŋa ŋwea kanto yerane ŋwaane, bɛ nyɔɔre mo a wó na? Twa biim nam ná tera, dé ya wó ta we, “Pa-na se dé taa di dé ni ne, kokuri to dé yeiri dé jwa wó te na.”#Izaya 22:13
33Yé pa-na ba gane abam se á tusi. Ko ye chega mo we, “Nmo ná me de nɔn-balwaaro, ba keim-balwaaro tem wó tɔge te lɔgese‑m.” 34Pa-na á boboŋa jwoori ya taa tɔge chwoŋa, se á daare á yage keim-lwanno tem. Abam badaara ta yeiri Wɛ. A tage konto se ko pa chaveera mo zo abam.
Nɔɔna na wó bi de yera yalo to
35Abam dedoa wó bwei we, “Ko wó ke tɛ mo se twa bi? Ba yera yam wó taa ye tetɛ mo?”
36N gɛ boboŋa mo na? N ná kwei woŋo n du tega ne, ko nye de ba na suli too tei to mo. Nmo ná wo dugi-ko, ko bá puli ko nwoŋi. 37Nmo na dugi woŋo kolo to de woŋo kolo na wó puli ko nwoŋi to ba nye daane. Nmo na kwei kolo n du to nye de wo-gaa mo, ne ko ná ye men-dwa naa woŋo kolo maama. 38Wo-dwi dem ná nwoŋi, Wɛ mo wó pa-de yera, ne o boboŋa na lage tei to. Wɛ nam ta mo pae wo-dwi maama de tete nyenyego.
39Ko dae we woŋo maama ya-nɔna mo ye bedwe. Nabiina, de vara, de zuna, de ywona maama jege ba ya-nɔna yera yera mo. 40Wɛyuu wonnu de wora mo, ye tega baŋa wonnu de wora. Wɛyuu wonnu tem jege te lam mo, ye tega baŋa wonnu tem de jege te lam. 41Wea kam jege ka lam mo, ye chana kam de jege ka lam. Chalechwe sem de maa jege se lam, ye se lam dem nam dwoi daane.
42Tento maama bere twa biim na ye tei to mo. Nɔɔno ná tega, o yera yalo ba na suli to ye yera yalo na wó pɔ to mo. O yera yalo nam na bi toone wone to daa bá pɔ maŋa de maŋa. 43Ba na suli yera yalo to jege gɛɛre, ye yalo na bi to jege nenɔŋa dedɛ. Yera yalo ba na suli to bwona, ye yalo na bi to dana. 44Yera yalo ba na suli to ye logo baŋa ŋwea nyem mo, ko daare yalo na bi to ye ŋwe-doŋa kam nyem mo. Ne logo baŋa yera yam na wora tei to, ŋwe-doŋa kam yera de jege se ya taa wora mo. 45Ko popone Wɛ tɔnɔ kom ne we, “Boboa ne to Adam mo jwoŋi siu kolo na pae ŋwea to.”#Pulim 2:7 Ko daare Adam wolo na kweeli to jege jworo kolo na pae ŋwea to mo. 46Ko nam ye logo baŋa ŋwea mo yeini ka tui yiga, ye Wɛ telaao ŋwe-doŋa kam laam saŋe ka tui. 47Wɛ mɛ teero mo o ke nabiinu wolo na tu yiga to. Konto ŋwaane, wonto ye tega baŋa nyem mo. Nabiinu wolo nam na saŋe to nwoŋi Wɛ telaao mo. 48Nabiina maama ye tega baŋa nyem mo, ye ba nye de Wɛ na mɛ teero o ke nɔɔno wolo to mo. Nɔɔna balo maama nam na ye Wɛ telaao nyem to nye de wolo na nwoŋi Wɛ telaao to mo. 49Debam na maŋe dé jege tega baŋa nɔɔno wom nyenyego to, dɛ wora dé wó ba dé taa jege Wɛ telaao nɔɔno wom nyenyego.
50A nu-bia bam, a lage a ta a bere abam we, dé logo baŋa yera yam bá wane ya na jeiŋa jei Wɛ woro kom ne. Ya na bá dáane ye ya pɔ to, ya bá wane ya maŋe de ŋwea kalo na ba jege kweelim to. 51Fɔge-na á cheigi, se a lage a ta Wɛ chega kalo ya na seigi to a bere abam. Debam maama bá te. Dé nam ná tega naa dé ta wo tege, dé yera yam maama jege se ya leiri mo.#1 Tɛsaloni 4:15-17 52Ko wó pɔpɔ ko ke ne yi na bogese tei to mo, maŋa kam ba na wó wu Wɛ nabɔnɔ kolo na kweeli to. Nabɔnɔ kom ná wuga, twa wó bi ba zaŋe de yera yalo na ba jege pɔm to, ye debam yera yam maama wó leiri. 53Kokuri, dé yera yalo na wó pɔ to jege se ya ji yalo na bá pɔ to mo. Dé yera yalo toone na wae to jege se ya ji yalo toone na ware to mo. 54Konto maama ná seene ko leiri, ko laam wó pa kolo na popone Wɛ tɔn-dwoŋo kom wone to ji chega we, “Wɛ wane toone de de dam maama o di.”#Izaya 25:8
55“Toone, n dam dem daa bɛ?
N daa‑n wó wane a nɔɔna bam n chɔge na?”#Hosea 13:14
56Ko ye nɔɔna wɛleera ŋwaane mo toone jege dam se de chɔge-ba. Wɛleera de nam jwoŋi ya dam Wɛ nia yam baŋa ne mo. 57Dé ke Wɛ lei de o na pae se dé jwoŋi zeinim dé Teiru Yezu Krista tei ne se dé wane toone dam maama to.
58Konto to, a nu-bi-swonnu bam, fɔge á zege-na lanyerane de pu-dɛa. Chɛ-na dé Teiru wom totoŋa yam baŋa ne maŋa maama, kolo ŋwaane á yei we totoŋa yalo maama á na toŋe á pa dé Teiru wom to dae kafɛ.
Currently Selected:
1 Korinti 15: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
