1 Korinti 14
14
Wɛ pɛɛra yadwonna taane
1Konto ŋwaane, kwaane-na se á ta‑á jege swono, se á daare á seene á yia se á jwoŋi Wɛ pɛɛra yalo o Sin-laao kom na pae nɔɔna to á woli da, ye ko fɔge ko dae Wɛ kwora kam tɔɔlem. 2Nɔɔno wolo ná jwoŋi Wɛ Sin-laao kom dam se o taa maa pɔpɔe o ŋɔɔne ta-gɛ, kotu ŋɔɔne de Wɛ mo. Ko dae we o ŋɔɔne o bere nabiina, ba na ba ni o taane dem kuri to ŋwaane. Wɛ Sin-laao kom mo pae o ŋɔɔne wo-siseigiru. 3Ko daare nɔɔno wolo na wae o tɔɔle Wɛ kwora kam to ŋɔɔne o bere nabiina mo. O ni taane dem maa zeini-ba se ba taa fɔge ba zege lanyerane de pu-dɛa. 4Wolo na ŋɔɔne Sin-laao kom ta-gɛ sem to fɔge o tete mo. Wolo nam na tɔɔle Wɛ kwora kam to fɔge Yezu kɔgɔ kom maama mo.
5Amo ya wó taa lage se á maama taa wae á ŋɔɔne Wɛ Sin-laao kom ta-gɛ mo, ye a nam tiini a lage se á ta‑á wae á tɔɔle Wɛ kwora kam mo ko ja gaale. Wolo na tɔɔle Wɛ kwora kam to tiini o jege zeina o dwoi wolo na ŋɔɔne Sin-laao kom ta-gɛ sem to, se ko ná dae nɔɔno ná wora ye o wae o taane dem kuri o tɛa, se ko wane ko zeini Yezu kɔgɔ kom maama. 6Mo kokuri, a nu-bia bam, amo ná tu abam tei, ye a ná ŋɔɔne Sin-laao kom ta-gɛ yerane, á wó na bɛ nyɔɔre mo amo tei ne? Kolo na wó woli abam to mo ye se a ŋɔɔne taane delo Wɛ na le o bere-ne to, naa de pa abam yuu-yeino, naa de bere abam Wɛ kwora, naa de pa á lɔre o chega kam. 7Ko ná maŋe ko ye wo-korro telo na jege sɔɔ to, ko de ta ye bedwe mo de nɔɔno ná jege wua o wui yɔɔ yɔɔ, naa o jege kɔnɔ o tae yɔɔ yɔɔ. O ná ke konto, nɔɔna wó ke tɛ mo ba ni ko ywoni? 8Nɔɔno ná jege jara nabɔnɔ o wui yɔɔ yɔɔ, nɔɔn-nɔɔno bá wane o lɔre ko na ye tei, se o chichei o zege jara ŋwaane. 9Ko nam ta ye bedwe mo de n ni taane ná dae jaja, nɔɔna wó ke tɛ mo ba lɔre n na tɛ kolo to kuri chekke? Konto nam bere we n ŋɔɔne n yage gaao wone mo. 10Taana dwi dwi mo wora logo baŋa ne, ye taan-taane tera de na ba jege kuri de pa de tiina. 11Nɔɔno nam ná ŋɔɔne taane de amo ye a ba ni de kuri, konto bere we debam maama balei ye veira mo da-tei ne. 12Ko ye konto mo de abam de. Abam ná seene á yia se á jwoŋi Wɛ pɛɛra yalo Sin-laao kom na pae to, kwaane-na se á tiini á ta‑á lage yalo na wó wane ya zeini se Yezu kɔgɔ kom wane ko zege lanyerane to. 13Konto ŋwaane, abam wolo ná wae o ŋɔɔne Sin-laao kom ta-gɛ, kotu nam lwoori Wɛ se o taa wae se kuri de o tɛa.
14Nmo ná mɛ Wɛ Sin-laao kom ta-gaa n ma n ware Wɛ, ko ye n jworo mo ŋɔɔna, se nmo tete boboŋa tɔge ya tere ko wone. 15Kolo na maŋe se n ke to mo ye se n yeini n ware Wɛ de n jworo de n boboŋa maama, se n daare n ta‑n leeni de n jworo de n boboŋa maama n seini Wɛ. 16Ko nam ná dae konto, ye n ná mɛ Sin-laao kom ta-gaa n ma n zuli Wɛ n jworo wone, nɔɔna balo na jei ba cheigi to bá wane ba ni ko kuri. Konto ŋwaane, ba wó ke tɛ mo ba tɔge ba sɛ nmo na ke Wɛ lei tei to se ba de ta we, “Ameena”? 17Nmo na ke Wɛ lei tei to ná maŋe ko lamma tei, ko bá zeini balo na jei ba cheigi to.
18Ko ná ye amo, a ke Wɛ lei de o na pɛ-ne dam se a taa ŋɔɔne Sin-laao kom ta-gɛ a dwoi abam maama to. 19Ko daare Yezu kɔgɔ kom ná tigisi daane ye a wo ba wone, a tiini a lage se a taa mae a tete boboŋa mo a ŋɔɔne a bere-ba. A ná ŋɔɔne botare senu fenfee konto dwoŋi, ko gare a ná ŋɔɔne Wɛ Sin-laao kom ta-gaa botare-bia morro dedɛ ye nɔɔn-nɔɔno yeiri se kuri.
20A nu-bia bam, pa-na á boboŋa kweere, se á daa yé ta‑á jege bu-balwa boboŋa. Ko nam ná ye keim-lwanno seeni, ta ta‑á nye de bu-sese na yeiri te ni ne to. 21Ko popone Wɛ tɔn-dwoŋo kom wone we:
“Amo Baŋa Wɛ wó toŋe sa-teena mo
se ba ba ba ŋɔɔne amo kwora de abam.
Dwi-gɛ tiina wó ŋɔɔne ta-veiri de abam.
De konto de, á ta bá sɛ a ni.”#Izaya 28:11-12
22Konto mo Wɛ mae ta-gɛ o maa bere o dam balo na wo sɛ‑o to tei ne, ye ko dae balo na sɛ‑o to tei ne. Ko daare Wɛ kwora kam tɔɔlem dem mo bere o dam balo na sɛ‑o to tei ne, ye ko dae balo na wo sɛ‑o to tei ne. 23Konto ŋwaane, abam kɔgɔ kom maama ná tigisi daane Wɛ zula ŋwaane, ye á maama ná wora á ŋɔɔne ta-gɛ, ye veira badwonna naa balo na wo sɛ Wɛ to laam ná tu ba zo á wo, nɔɔna bam konto bá ta we, abam yirisi mo na? 24Abam maama nam ná tɔɔle Wɛ kwora kam á bere daane, ye veira naa balo na wo sɛ Wɛ to ná tu ba zo á wo, banto wó lɔre we Wɛ dam mo wo á tei ne. Ba dedoa na nigi kolo abam maama tei ne to wó pa o lɔre we, o tusi mo ye o bá na bora Wɛ tei ne. 25Boboŋ-lilirru telo maama ya na seigi o wone to laam wó ba ya jare pwooni yiga ne mo ja. O maa wó vwi o yibia tega ne o zuli Wɛ, ye o sɛ we, Wɛ seene o wo á tei ne.
Yezu kɔgɔ kom tigisim dem na wó da chwoŋa tei to
26A nu-bia bam, dé daa ta wó ta bɛ mo de abam? Á ná tigisi daane se á zuli Wɛ, ko ya maŋe se ko taa ye kolo na wó zeini á kɔgɔ kom maama to mo. Abam dedoa mo wó zaŋe wɛɛne o mɔ leiŋa. Dedoa de maa wó zaŋe o bere Wɛ taane. Wodwoŋi de maa wó zaŋe o ta chega kalo Wɛ na le o bere‑o to. Wodwoŋi de maa wó zaŋe o ŋɔɔne Wɛ Sin-laao kom ta-gaa. Wodwoŋi de maa wó zaŋe o ta ta-gaa kam kuri o bere á kɔgɔ kom. 27Abam badaara ná lage á pɔpɔ á ŋɔɔne ta-gɛ, ko maŋe se á ta‑á ye balei naa batɔ yerane mo. Ko maŋe se á ta‑á zaŋe á ŋɔɔne á daare á pa daane mo, se á dedoa zaŋe o ta ŋwɛ sem kuri. 28Nɔɔn-nɔɔno nam ná tere á wone se o wane o ta ta-gɛ sem kuri, wolo ya na lage o ŋɔɔne-se to maŋe se o yage mo, se o ná wo o yerane, se o taa ŋɔɔne-se de Wɛ. 29Ko nam ná ye Wɛ ni-jwoŋina balo na wae ba tɔɔle o kwora kam to, ko maŋe se balei naa batɔ mo zaŋe ba ŋɔɔne dedoa dedoa, se badaara bam taa cheiga se ba laam bwɛ ba nii. 30Wɛ chega kam ná tu balo na jei ba cheigi to dedoa yuu ne se o ta o bere, ko maŋe se wolo na zege o ŋɔɔne to mo pu o ni se o dwoŋi wom ta-ka. 31Konto to, abam maama wae á tɔɔle Wɛ kwora kam dedoa dedoa, se ko pa á zamese Wɛ chega kam da-tei ne, ye á bochara ke dam. 32Wɛ ni-jwoŋina balo na jwoŋi dam se ba taa tɔɔle o kwora kam to wae ba tete ba jaana ka tɔɔlem dem baŋa ne. 33Wɛ lage se woŋo maama taa jege ywoni mo, se o ba lage boremaa boremaa keim.
34Abam ná tigisi daane wɛ-di sem wone, ko maŋe se kaana taa jei chemm mo se ba taa cheiga. Mo ko na ye tei Yezu kɔgɔ kom jeiga maama ne. Ba ba jege chwoŋa se ba da ba ŋɔɔne. Ko maŋe se ba taa tu ba tete tega ne, ne Wɛ tɔn-dwoŋo kom na maŋe ko bere tei to mo. 35Ba ná lage se ba lɔre kolo kuri, ba jege se ba bwei ba banna mo sɔŋɔ ne. Ko tiini ko ye chaveera mo se kaane zaŋe o ŋɔɔne á tigisim dem ne.
36Wɛ kwora kam ga zege abam tei ne mo ka jage jei maama na? Abam yerane mo ka yi ka kweeli na? 37Abam wolo ná boŋe we o Wɛ ni-jwoŋinu, naa o boboŋa kweere Wɛ Sin-laao kom pɛɛra seeni, kotu jege se o taa yei we, amo na popone kolo a pa abam to ye dé Teiru wom kwora mo. 38Nɔɔno wolo maama ná ve amo ni dem konto, se á yé pa á yiga taa wo konto tu wone.
39A nu-bia bam, kwaane-na á seene á yia Wɛ kwora kam tɔɔlem baŋa ne. Yé ta‑á chuli-na Sin-laao kom ta-gɛ sem ŋɔŋa. 40Nam ta‑á ke-na woŋo maama se ko taa tɔge chwoŋa, ne ko na maŋe se ko taa ye tei to.
Currently Selected:
1 Korinti 14: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
