1 Korinti 16
16
Sabu tiŋim taane
1Ko daare á na wó ta‑á lae sabu tei á ma á zeini Wɛ nɔɔna to mo tento. Ta‑á ke-na nenɛɛne amo na tage a bere Yezu kɔgɔ kolo maama na wo Galatia te-nia yam ne se ba taa ke tei to.#Rom 15:25-26 2Wɛ siu dɛ maama ne se nɔɔno maama twori nyɔɔre delo o na nɛ to wone o tiŋi, se ko pa amo ná tua, se ko daa yé taa jege se á la sabu. 3Amo ná tu abam tei, a laam wó toŋe á na kuri nɔɔna balo to de twanno, se ba ja á sabu kom ba ja vo Jerusalem. 4Ko nam daa ná maŋe se amo tete mo vo, dé wó tɔge daane dé vo.
Pɔɔl lage se o na Korinti tiina
5A lage se a da Makedonia mo se a laam daare a ba abam tei. 6Amo ná tua, a lage se a dáane fee abam tei ne. Dɛ dedwoŋi ne a wó ti yadɛ dem. Abam laam wó wane á woli-ne se a vo a daa na wó vo mɛ to. 7Amo ba lage se a wuuri a ba a na abam, se ko bá pa-ne chwoŋa se a dáane ye a daa vo jeiga kadwoŋi. Wɛ ná sɛ, a ya lage se a dáane abam tei ne mo. 8Konto ŋwaane, a lage a maŋe Efesia ywo-seeni mo se ko vo ko yi Pɛntekɔse kuri dem maŋa. 9Chwoŋa pore lanyerane ka pa-ne se a taa toŋe ywo-seeni de dam, ye nɔɔna dedɛ nam wora ba kwaana se ba che a yiga.#Kikia 19:8-10
10Timoti nam ná tu abam tei, se á ta‑á nii o baŋa ne se o bochare taa tiga. Kokuri o de toŋe dé Teiru wom totoŋa yam mo, ne amo de na ke tei.#1 Korinti 4:17 11Yé pa-na se nɔɔn-nɔɔno gwooni‑o.#1 Tim 4:12 Kwaane-na se á woli‑o o chwoŋa baŋa ne, se o wane o vo de yazura o jwoori o ba amo tei. Amo nam nii‑o mo chwoŋa ne se o ba de dé nu-bia bam.
12Ko nam ná ye dé nu-bu Apolo, amo tiini a kwoori‑o mo se o tɔge de dé nu-bia bam o ba abam tei.#Kikia 18:24 De ko de, o ta wo boŋe o ja se o ba leile. O nam ná nɛ chwoŋa maŋa de maŋa, o wó ba.
13Ta‑á cho-na á tete se á fɔge á zege lanyerane de á na tɔge Wɛ chega kam tei to. Ta‑á jege-na baare de dam. 14Ta‑á pa-na á kikia maama tɔge de swono.
15A nu-bia bam, á maŋe á yei Stefana de o sɔŋɔ tiina na yɔɔre ba tɔge Wɛ tei to. Banto mo dɛ yiga ba sɛ Yezu Akaya ne, ye ba kwei ba tete maama ba toŋe ba zeini Wɛ nɔɔna. 16Konto to, a lwoori abam se á kwei á tete á ta‑á tɔge nɔɔna bam konto dwonna ni, dedaane balo na tɔge ba toŋe Wɛ totoŋa ne banto tei.
17Amo jege wopwolo de Stefana, de Fɔtunata, de Achaku na tu amo tei to. Banto mo pɛ a wo lɔre we abam tera. 18Banto mo pɛ a wo tiga, ne ba na ke abam de tei to. Ko ná ye nɔɔna bam konto dwoŋi, ko maŋe se á ta‑á jege ba chega.
19Yezu kɔgɔ kom maama na wo Asia te-nia yam wone to jɔɔne abam. Akwila de Pirisila, de Yezu kɔgɔ kolo na jeeri ba sɔŋɔ ne to de jɔɔne abam lanyerane dé Teiru wom yere ŋwaane.#Kikia 18:2 20Dé nu-bia bam maama de jɔɔne abam.
Á ná jeeri daane, se á ta‑á kukwori daane Wɛ ŋwaane.
21Amo Pɔɔl tete mo mɛ a jeŋa a popone jɔɔnem dento a ma jɔɔne abam.
22Nɔɔno wolo maama ná ba jege dé Teiru wom swono, Wɛ wó yaale kotu o yiga ne.
Dé Teiru wom wó ba.
23Dé Teiru Yezu zaane dem taa wo á tei ne.
24Amo swono taa wo á tei ne Yezu Krista ŋwaane.
Currently Selected:
1 Korinti 16: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
