1 Korinti 12
12
Wɛ Sin-laao kom na pae zeinim tei to
1A nu-bia bam, a lage a ta a bere abam Wɛ Sin-laao kom na toŋe tei de tei to mo chekke. 2Guli-na maŋa kalo á ta na yeiri Wɛ ye á déem tɔge jwo-yɔɔro to, nenɛɛne á boboŋa na yeini ya gane abam se á sa chwoŋa tei to. 3Konto ŋwaane mo a lage a pa á lɔre we, Wɛ Sin-laao kom bá wane ko gane abam. Konto to, nɔɔno ná sɔɔle o chɔge Yezu yuu, ko dae Wɛ Sin-laao kom mo pɛ o ta konto. Nɔɔn-nɔɔno nam bá wane o ta we, Yezu mo ye o Teiru, ye Wɛ Sin-laao kom tere o tei ne.
4Wɛ pɛɛra ye teiri teiri mo, ye o Sin-laao kom dedoa yerane mo jege-ya ko pae nɔɔna.#Rom 12:6-8 5Wɛ totoŋa ye teiri teiri mo, ye dé Teiru wolo dé na toŋe dé pa‑o to ye dedoa yerane mo. 6Wɛ na zeini nɔɔna de yu-punnu telo maama to ye teiri teiri mo. Wɛ nam ye dedoa yerane mo, ye wonto nam mo pae nɔɔno maama o yu-punnu tem se o taa maa toŋa. 7Wɛ mo pae nɔɔno maama o Sin-laao kom se o wane o taa tɔge ko zeinim baŋa ne o woli o dwonna. 8Wɛ wae o tɔge o Sin-laao kom baŋa o pa nɔɔna badwonna ŋɔɔne swa taane ba bere ba dwonna. Nɔɔna badwonna de maa wae ba ŋɔɔne yeino taane o Sin-laao kom ŋwaane. 9Konto nam ta mo pae nɔɔna badwonna yɔɔre ba ke ba wo-dedoa de Wɛ, ye ko ta pae badwonna dam se ba taa maa yɔɔre jaweena. 10Ko ta pae badwonna dam se ba taa maa ke wo-kenkagela, ko daare se badwonna taa wae ba tɔɔle Wɛ kwora kam. Ko ta pae nɔɔna badwonna wae ba pɔɔre Wɛ Sin-laao kom totoŋa de chichiri totoŋa daane. Ko ta pae badwonna wae ba ŋɔɔne ta-gɛ dwi dwi, ye badwonna de ta maa wae ba tɛ ta-gɛ sem konto kuri ba bere ba dwonna. 11Wɛ pɛɛra yanto maama ye Wɛ Sin-laao kom dedoa yerane mo jege-ya ko pae nɔɔna. Ko nam jege-ya konto dwi dwi mo ko pɔɔre ko pae nɔɔno de nɔɔno, se ko maŋe de ko boboŋa na jaane tei to.
Yezu nɔɔna bam maŋe se ba nii da-baŋa ne
12Boŋe-na á nii nabiinu yera na ye tei to. Ya ye woŋo dedoo mo ye ya laam pɔɔre teiri teiri. Yera yam pɔɔrem dem daga dedɛ ye ya maama laam ye yera bedwe. Yezu Krista de o kɔgɔ kom maama de ye konto mo. 13Debam balo maama na sɛ Yezu to jwoŋi sɛɛm pa dé ji kɔgɔ dedoo mo. Dé ya ze maŋe dé ye Juu tiina naa dwi-gɛ tiina, naa dé ye kabɛ naa balo na tei ba tete to, ko ye Wɛ Sin-laao kom tete mo zeini debam maama. Wɛ Sin-laao kom ye dedoa yerane, ye wonto mo Wɛ lwogi o ke debam maama bochara ne.#Efesia 2:18; Galatia 3:28
14Ko nam ye chega mo we nabiinu yera pɔɔrem daga, se ko dae we ya ba jege pɔɔrem. 15Naga ná tage ka we, ka dae jeŋa, se konto ŋwaane yera yam ba tei-ka, konto bá seene ko pa ka ta dae yera yam nyem. 16Zwɛ de nam ná we, de dae yi, se yera yam ba tei-de, konto bá seene ko pa de ta dae yera yam nyem. 17Yera yam maama nam ya ná ye yi yerane, ya wó ke tɛ mo ya taa ni taane? Ya nam ya ná ye zwɛ yerane, ya wó ke tɛ mo ya taa ni lwom? 18Ko nam na ye tei to, Wɛ mo ke-ya teiri teiri konto, ko maŋe de o boboŋa na lage tei to. 19Ya maama nam ya ná ye pɔɔrem bedwe, ya wó ke tɛ mo ya ji yera? 20Ko nam na ye konto to mo pae pɔɔrem dem daga ye ya maama laam ye yera bedwe.
21Konto ŋwaane, yi bá wane de ta de jeŋa we, “A ba lage‑m”. Yuu de ba jege chwoŋa se ko ta de naga we, ko ba lage-ka. 22Chega ŋwaane to, dé bá wane dé dole dé yage dé yera yam daa kalo maama dé na pae ka bwona to. 23Ko nam ná ye dé yera yam daa kalo maama dé na boŋe we ka ba tiini ka jege kuri to mo, dé yeini dé zuli-ka lanyerane. Daa kalo maama na ba lana ye ka jege chaveera to, dé yeini dé fɔge dé kwoli-ka mo. 24Ko daare dé yera yam daa kalo maama na lana to, dé daa ba fɔge dé nii ka baŋa ne. Wɛ mo ke nabiinu yera yam maama o ke daane, ye o pae daa kalo ya na gɛ zula to na zula lanyerane. 25Konto ŋwaane popɔra tera yera yam wone. Ya maama nii da-baŋa ne mo. 26Ko ná chana yera yam daa kalo yera ne, yera yam maama wó tɔge ya na cham dem konto dwoŋi mo. Daa kalo ná nɛ zula, yera yam maama de wó tɔge ya na wopwolo mo.
27Abam maama ye Yezu Krista yera yam mo, ye á dedoa dedoa ye ya pɔɔrem dem dwi dwi mo. 28Kɔgɔ kolo na tɔge Yezu to wone, Wɛ ke nɔɔno maama o jeiga ne mo. Da-yiga to ye Yezu totoŋa nakwa mo. Balo na ye Wɛ ni-jwoŋina to maa saŋe. Balo na ke betɔ to maa ye Wɛ chwo-berena bam. Ko woli de balo na ke wo-kenkagela to, de balo na jege Wɛ Sin-laao kom dam se ba taa maa yɔɔre jaweena to. Ko ta woli de balo na zeini nɔɔna to, de balo na nii Wɛ totoŋa yam baŋa ne to, de balo na wae ba ŋɔɔne Sin-laao kom ta-gɛ dwi dwi to.#Efesia 4:11-12 29Ko nam dae we abam maama ye Yezu totoŋa nakwa, naa Wɛ ni-jwoŋina, naa balo na bere o chega kam to. Ko ta dae we abam maama mo wae á ke wo-kenkagela, 30naa á ta‑á yɔɔre jaweena, naa á wae á ŋɔɔne Wɛ Sin-laao kom ta-gɛ sem, naa á wae á tɛ se kuri. 31Nam kwaane-na á seene á yia se á na Wɛ pɛɛra yalo na tiini ya jege kuri lanyerane to.
Ko daare a nam lage a bere abam chwoŋa kalo na tiini ka lana ka dwoi maama to mo.
Currently Selected:
1 Korinti 12: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
