1 Korinti 11
11
1Ta‑á lwoni-na amo kikia, ne amo na lwoni Yezu Krista tei to.
Baaro de kaane yuu tu na ye wolo to
2Abam ke chega lanyerane dedaane á na yeini á guli amo gula, ye á kwori á tɔge chega kalo a na bere abam to. 3Amo nam lage se abam lɔre we, Yezu Krista mo ye baaro maama yuu tu, ye baaro de maa ye o kaane yuu tu. Baŋa Wɛ nam mo ye Yezu Krista de yuu tu. 4Konto to, á ná tigisi daane se á ware Wɛ, ye baaro ná zaŋe o lwoori Wɛ, naa o tɔɔle Wɛ kwora kam, ye o ná mɛ woŋo o kwoli o yuu, konto tu yaale o yuu tu wom mo. 5Kaane de nam ná zaŋe o lwoori Wɛ, naa o tɔɔle Wɛ kwora kam, ye o ná wo mɛ woŋo o kwoli o yuu, o de yaale o yuu tu wom mo. O ná ke konto, o de wolo na cheeri o yuu to ye bedwe mo. 6Kaane ná wo sɛ se o kwoli o yuu, ko ya maŋe se o chɔ-ko mo, naa o cheeri-ko. Ko nam na jege chaveera se kaane ke konto to, ko maŋe se o taa kwoli-ko mo. 7Baara nam ba jege se ba kwoli ba yuni, kolo ŋwaane banto mo bere Wɛ seina de o dam na ye tei. Ko nam ná ye kaana, banto mo bere baara dam na ye tei. 8Kokuri, Wɛ mɛ baaro yera mo o ke kaane, se ko dae kaane yera mo o mɛ o ke baaro. 9Ko woli da, Wɛ wo ke baaro kaane zeinim ŋwaane, o ke kaane mo baaro zeinim ŋwaane. 10Konto ŋwaane mo kaana jege se ba taa kwoli ba yuni, se ko bere dam delo na tei-ba to. Konto wó pa Wɛ malese sem na zula.
11Ko nam ná ye debam balo na me de dé Teiru Yezu to, kaana bá wane ba taa tei ba tete baara tei ne, ye baara de nam bá wane ba taa tei ba tete kaana tei ne. 12Wɛ déem seene o ma baaro yera mo o ke kaane, ye kaana de nam mo lore baara. Woŋo maama nam nwoŋi Wɛ tei mo.
13Abam tete nam boŋe-na konto wone á nii. Kaane ná zaŋe se o ware Wɛ, ye o ná wo kwei woŋo o ma kwoli o yuu, ko ye ko chwoŋa ne na? 14Ko ba jege bobwea nabiina tei ne we, baaro yu-ywei ná tiini se dɔra, ko pa o tete chaveera mo. A fɔ vwa na? 15Ko nam ná ye kaane, o yu-ywei ná tiini se nwoŋi se daga, ko pa‑o lam mo. Ko ye o de Wɛ pɛɛre mo se se taa daga ye se kwoli o yuu. 16Nɔɔno wolo nam ná wo sɛ amo berem dem konto ye o mage ni-kantɔgɔ de baŋa ne, konto tu taa yei we, debam maama tɔge kanto chwoŋa kam mo. Wɛ nɔn-kɔgɔ kom jei maama ne to de tɔge-ka mo. Chwoŋa kadwoŋi daa tera ka woli da.
Yezu Krista gula wodiu kom dim
Matiyu 26:26-29; Maake 14:22-25; Luka 22:14-20
17Kolo maama amo na lage a ta de abam to, a bá wane a ta we á ke lanyerane. Abam ná yeini á tigisi daane Wɛ ŋwaane, á chɔgem mo dwoi á fɔgem. 18Yiga to, amo nigi we, á ná tigisi daane se á zuli Wɛ, á yeini á jege da-popɔra mo. Amo boŋe we ko seene ko ye chega mo. 19Dɛ delo, popɔra wó taa wo abam tei ne se ko pa balo na tɔge chega to taa nae jaja. 20Á na yeini á tigisi daane tei to, á yé ta‑á boŋe we, á jeeri se á di dé Teiru Yezu gula wodiu kom mo. 21Kolo ŋwaane nɔɔno maama yeini o gare o di o tete wodiu mo o ti lela. Ko maa pae se kana jege abam badwonna, ye á badwonna nyɔ á su. 22Abam nam ba jege sam se á di dim konto dwoŋi de wone na? Á nam boŋe se á chɔge Wɛ nɔn-kɔgɔ kom yuu mo na? Á lage se á pa chaveera ja yiniga tiina balo na wo á kɔgɔ kom wone to mo na? Bɛ mo amo nam wó ta de abam? Á ke lanyerane na? A bá wane a ta we, á ke lanyerane.
23Amo lɔre dé Teiru Yezu gula wodiu kom dim chega kam o tete tei ne mo, ye a daare a bere abam chega kam konto, nenɛɛne Yezu na ke kolo dɛ dem ba na boŋe se ba ja‑o to. Tete dem konto ne o ma kwei bworobworo,#Maake 14:22-24 24ye o ke Wɛ lei ko ŋwaane o daare o ja-ko o fɔ fɔ. O ma ta de o tontoŋena bam o we, “Amo yera yam mo tento, ya na ye abam nyem. Ta‑á ke-na konto dwoŋi se á ta‑á ma á guli amo gula.” 25Ba na di ba ti to, o daa ma kwei zoŋa, ye o ta ke konto dwoŋi. O maa we, “Zoŋa kam bere we, Wɛ tɔge amo jana bam ŋwaane o gwoni ni-doore dedaane nabiina mo.#Nwoŋim 24:6-8 Maŋa maama á ná lage á nyɔ konto dwoŋi, se á ke amo na ke tei to, se á ma á guli amo gula.” 26Kokuri to, maŋa maama á ná di bworobworo konto dwoŋi ye á nyɔ zoŋa kam wone, á ke á bere nɔɔna mo dé Teiru wom toone dem na ye tei. Ta‑á ke-na konto se ko taa vei maŋa kam o na wó jwoori o ba to.
27Ko na ye konto to, nɔɔno wolo ná di dé Teiru wom gula bworobworo kom naa o nyɔge zoŋa kam wone, ye o ke ne o yiga tera ko wone mo tei, konto tu ke keim-balɔrɔ mo o ma yaale dé Teiru wom yera yam de o jana bam. 28Konto ŋwaane to, nɔɔno maama jege se o taa yei o tete mo yiga, se o laam di bworobworo kom o daare o nyɔ zoŋa kam wone. 29Nɔɔno wolo nam ná di ye o kwori o nyɔ, ye o ná wo lɔre dé Teiru Yezu yera yam kuri chekke, konto tu vaŋe taane mo o pa o tete, de o na di ye o kwori o nyɔ tei to. 30Konto nam mo pae se á dedɛ weela ye á bwona, ye á badwonna de toa. 31Debam nam ya ná yeini dé bwɛ de tete, Wɛ ya daa bá bwɛ debam kolokolo baŋa ne. 32Ko nam na ye tei to, dé Teiru wom yeini o korese debam mo se o pa dé jwoori dé to chwoŋa ne, se dé yé ba dé ga bora o tei ne, nenɛɛne balo na yeiri‑o to na wó ga bora o borem dɛ dem ne tei to.
33Konto ŋwaane, a nu-bia bam, á ná tigisi á ti se á di wodiu kom konto dwoŋi, se á zuri á yera á cheigi da-tei ne. 34Wolo kana ná wɔe, se kotu di sɔŋɔ ne se o daare o ba, se ko yé wane ko pa Wɛ bwɛ abam á tigisim dem baŋa ne.
Ko daare ko ná ye taana yalo na daare to, amo ná tua, a wó pɔɔre ya laŋa a bere abam.
Currently Selected:
1 Korinti 11: KBG
Highlight
Copy
Compare
Share
Want to have your highlights saved across all your devices? Sign up or sign in
© 2020, Ghana Institute of Linguistics, Literacy and Bible Translation (GILLBT)
