Popular Bible Verses from 1 Korinti 12

Share

Wɛ mo pae nɔɔno maama o Sin-laao kom se o wane o taa tɔge ko zeinim baŋa ne o woli o dwonna.

Abam maama ye Yezu Krista yera yam mo, ye á dedoa dedoa ye ya pɔɔrem dem dwi dwi mo.

Ko ná chana yera yam daa kalo yera ne, yera yam maama wó tɔge ya na cham dem konto dwoŋi mo. Daa kalo ná nɛ zula, yera yam maama de wó tɔge ya na wopwolo mo.

Wɛ wae o tɔge o Sin-laao kom baŋa o pa nɔɔna badwonna ŋɔɔne swa taane ba bere ba dwonna. Nɔɔna badwonna de maa wae ba ŋɔɔne yeino taane o Sin-laao kom ŋwaane. Konto nam ta mo pae nɔɔna badwonna yɔɔre ba ke ba wo-dedoa de Wɛ, ye ko ta pae badwonna dam se ba taa maa yɔɔre jaweena. Ko ta pae badwonna dam se ba taa maa ke wo-kenkagela, ko daare se badwonna taa wae ba tɔɔle Wɛ kwora kam. Ko ta pae nɔɔna badwonna wae ba pɔɔre Wɛ Sin-laao kom totoŋa de chichiri totoŋa daane. Ko ta pae badwonna wae ba ŋɔɔne ta-gɛ dwi dwi, ye badwonna de ta maa wae ba tɛ ta-gɛ sem konto kuri ba bere ba dwonna.

Wɛ pɛɛra yanto maama ye Wɛ Sin-laao kom dedoa yerane mo jege-ya ko pae nɔɔna. Ko nam jege-ya konto dwi dwi mo ko pɔɔre ko pae nɔɔno de nɔɔno, se ko maŋe de ko boboŋa na jaane tei to.

Konto ŋwaane popɔra tera yera yam wone. Ya maama nii da-baŋa ne mo.

Wɛ pɛɛra ye teiri teiri mo, ye o Sin-laao kom dedoa yerane mo jege-ya ko pae nɔɔna. Wɛ totoŋa ye teiri teiri mo, ye dé Teiru wolo dé na toŋe dé pa‑o to ye dedoa yerane mo. Wɛ na zeini nɔɔna de yu-punnu telo maama to ye teiri teiri mo. Wɛ nam ye dedoa yerane mo, ye wonto nam mo pae nɔɔno maama o yu-punnu tem se o taa maa toŋa.

Kɔgɔ kolo na tɔge Yezu to wone, Wɛ ke nɔɔno maama o jeiga ne mo. Da-yiga to ye Yezu totoŋa nakwa mo. Balo na ye Wɛ ni-jwoŋina to maa saŋe. Balo na ke betɔ to maa ye Wɛ chwo-berena bam. Ko woli de balo na ke wo-kenkagela to, de balo na jege Wɛ Sin-laao kom dam se ba taa maa yɔɔre jaweena to. Ko ta woli de balo na zeini nɔɔna to, de balo na nii Wɛ totoŋa yam baŋa ne to, de balo na wae ba ŋɔɔne Sin-laao kom ta-gɛ dwi dwi to.

Ko nam ye chega mo we nabiinu yera pɔɔrem daga, se ko dae we ya ba jege pɔɔrem.

Chega ŋwaane to, dé bá wane dé dole dé yage dé yera yam daa kalo maama dé na pae ka bwona to.

Yera yam maama nam ya ná ye yi yerane, ya wó ke tɛ mo ya taa ni taane? Ya nam ya ná ye zwɛ yerane, ya wó ke tɛ mo ya taa ni lwom? Ko nam na ye tei to, Wɛ mo ke-ya teiri teiri konto, ko maŋe de o boboŋa na lage tei to. Ya maama nam ya ná ye pɔɔrem bedwe, ya wó ke tɛ mo ya ji yera?