1 Korinti 10

Jwona kaanem taane

1A nu-bia bam, ta‑á guli-na kolo na ke dé kwoa nakwa balo déem na dɛ Moses kwaga ba nwoŋi Ejipti ne to. Wɛ déem mo wo ba maama tei ne, ye o pa kunkwoŋo kom kwoli-ba. O ta ma pɔɔre naneo kom kuni belei o daare chwoŋa pa ba maama tɔge da ba kɛ.#Nwoŋim 13:21-22; 14:22-29 2Konto maama déem na ke to, ko nye de banto maama jwoŋi sɛɛm se ba taa ye Moses tɔgena. 3-4Wɛ déem ke wo-kenkagela o woli ba maama bedwe mo. O ma pa ba di wodiu dedoo mo, ye ba nyɔ na bedwe. Na balo ba maama déem na nyɔge to nwoŋi peo kodwoŋi yera mo, ye peo kom konto mo ye wo-kenkagele Wɛ na kea se ko bere we, Yezu Krista tete mo tɔge o wo ba tei ne.#Nwoŋim 17:6; Jeelim 20:11 5De konto de, ba dedɛ kikia déem wo su Wɛ yi. O ma pa ba te ba maŋe kagoa kam ne.#Jeelim 14:16

6Wonnu tento maama na ke to, te ke se te bere debam mo se dé yé pa dé fera taa zoore wo-zɔɔna, nenɛɛne banto na ke tei to. 7Yé ta‑á ye jwo-kaana ne banto badaara déem na ye tei to. Ko popone Wɛ tɔnɔ kom ne we, “Nɔɔna bam déem lɛɛre ba di wodi-fɔrɔ mo ye ba nyɔa, ba daare ba zaŋe ba kwɛɛre yɔɔ yɔɔ.”#Nwoŋim 32:6 8Yé zaŋe-na á pa dé taa tɔge dé ke kabwoŋa, ne banto badaara déem na ke tei ye ba morro finlei-tetɔ (23,000) te dɛ dedwe wone to.#Jeelim 25:7-9 9Yé pa-na dé faŋe Baŋa Wɛ dam dé nii, ne banto badaara déem na ke tei ye basankwe done-ba se go to. 10Yé ta‑á poona-na de Wɛ, ne banto badaara na ke tei ye toone maleka kam go-ba to.

11Wonnu tento maama déem ke dé kwoa nakwa bam se te taa ye maana mo te pa debam. Te nam popone Wɛ tɔnɔ kom ne se ko wane ko kaane debam balo ta na ŋwe ye logo baŋa kweelim da yam bwola to mo. 12Wolo na boŋe we o zege lanyerane to taa yei, se o wó to. 13Woŋo kolo maama na ke abam ye ko soge á boboŋa se á tusi to tui nɔɔna maama baŋa mo. Wɛ na ye chega tu to, o bá sɛ se woŋo kolo na soge á boboŋa to taa dana ko dwoi á jaanem. O nam wó pa abam dam se á wane á zege ye á daare á na chwoŋa á nwoŋi ko wone.

14Konto ŋwaane, a badwoŋ-swonnu bam, le-na á tete jwona kaanem wone. 15A ŋɔɔne tento dwoŋi de abam, á yi na poore to ŋwaane. Nam boŋe-na á nii, a taane dem ye chega na. 16Dé ná yeini de di Yezu Krista gula wodiu kom, dé yeini dé kwei zoŋa mo dé ke Wɛ lei, ye dé daare dé nyɔ ka wone. Dé na ke konto to, ko bere we debam maama tɔge dé sɛ we, Yezu Krista jana bam nwoŋi debam ŋwaane mo. Dé daa ta na yeini dé kwei bworobworo kom dé fɔ fɔ dé di to, ko bere we debam maama tɔge de sɛ we, o yera yam chɔge debam ŋwaane mo. Ko dae konto na?#Matiyu 26:26-28 17Debam maama na fɔge fɔge bworobworo dedoo kom dé di to bere we debam maama ye nɔɔno dedoa mo, dé ya ze maŋe dé daga tei maama de.

18Boŋe-na Isarele tiina bam déem na kaane wonnu ba pa Wɛ ye ba daare ba di te wone to, se á ma á lɔre lɔra. Balo maama na dɛ ba di to wo tɔge ba sɛ kaanem dem mo na?

19Amo na tage tei to bere bɛ mo? Ko bere we wodiu kolo ba na mɛ ba kaane jwona to jege kuri mo na? Ko bere we jwona yam tete jege kuri mo na? 20Aawo, ko dae konto. A na tage tei to mo ye a lage a bere we, jwo-kaana na kwei wonnu telo ba ma ba ke kaanem to, ba kwei ba pae chichiri mo se ko dae Wɛ. Amo nam ba lage se abam tɔge á me de chichiri. 21Ko wo maŋe se á nyɔ dé Teiru Yezu Krista zoŋa kam wone, se á daare á vo á nyɔ chichiri zoŋa wone. Abam nam bá wane á jeini á di dé Teiru wom gula wodiu kom, ye á daare á vo á da á di wodiu kolo na wó pa á me de chichiri to. 22Yé pa-na dé ke kolo na wó zaŋe dé Teiru wom wo to. Debam wó taa dana dé dwoi‑o na?

Wodiu dim taane

23Abam na we, kolokolo tera ko na chula debam tei ne to, ko ye chega. Ko nam dae we, woŋo maama mo jege nyɔɔre ko pa debam. Ko ta dae we, woŋo maama mo pae zeinim. 24Á wolowolo yé taa lage lanyerane o pa o tete. O nam jege se o taa lage lanyerane mo o pa o dwonna de.

25Á jege chwoŋa se á yeigi nɔna yalo maama ba na jege ba yeigi yaga ne to á di. Nam yé bwei-na ya bwia á nii, ya ye jwoni nɔna mo na, se lwia wó zo á boboŋa ya ŋwaane. 26Ko popone Wɛ tɔnɔ kom ne we, “Logo baŋa de ko wonnu maama ye Baŋa Wɛ nyem mo.”#Lei 24:1 27Nɔɔno wolo na ba tɔge Yezu Krista to ná bwoŋi nmo se n vo o sɔŋɔ n di wodiu ded‑o, ye n ná sɛ n vo, o ná kwei wodiu kolo de kolo maama o zege n yiga ne, se n di. Yé zaŋe n bwei ko bwia, se lwia wó zo n boboŋa ko ŋwaane. 28Nɔɔno nam ná tage de nmo o we, wodiu konto ye ba mɛ ba kaane jwoni mo, se n daa yé di, kolo ŋwaane lwia wó zo nɔɔno wom boboŋa. 29Ko dae se n yage ko dim lwia na wó zo nmo tete boboŋa to ŋwaane, se ko ye lwia na wó ja nɔɔno wodwoŋi wom to ŋwaane mo.

Abam wó wane á bwei amo we, bɛŋwaane mo dé wó yage dé na jege chwoŋa se dé ke kolo to, lwia na wó zo nɔɔno wodwoŋi boboŋa to ŋwaane? 30Abam ta wó bwei amo we, dé na ke Wɛ lei wodiu kom ŋwaane ye dé daare dé di to, bɛ mo ye nɔɔno wodwoŋi daa wó yaale debam ko ŋwaane?

31Ko nam na ye tei to, woŋo kolo maama á na ke to, ko ná ye dim naa nyɔɔm naa kikia yalo maama, ko maŋe se á ta‑á ke kolo maama na wó pa Wɛ yere zaŋe wɛɛne ko ŋwaane to mo. 32Yé ta‑á ke-na kolo na wó chɔge nɔɔna boboŋa to, ko ya ze ye Juu tiina, naa dwi-gɛ tiina, naa Wɛ nɔn-kɔgɔ kom nɔɔna de. 33Ta‑á ke-na ne amo na ke tei to. Woŋo kolo maama amo na ke to, a kwaane se ko taa pwoli nɔɔna maama wo mo. Amo ba lage lanyerane a pa a tete. A lage lanyerane a pa nɔɔna maama mo, se ko wane ko pa Wɛ jwoŋi-ba o yage.

Currently Selected:

1 Korinti 10: KBG

Highlight

Copy

Compare