Roma 8
8
1Mania si maṉa eri e ai kesi sorea kwae lana toa eki na ni atha Christ Jesus, na kera abula sulia see imole e ai, sulia tha Spirit. 2Sulaania ṉa lo ana ṉa Spirit ana marukia atha Christ Jesus e adea kwa tonee to faisia ṉa lo ana abula taa la ma maea. 3Uria si do na ṉa lo e dora ania ili lana, uria ne feda sulia see imole, tha God, uria ne arasia mai Kaluwane nia i talaana sulia nuna see imole ne abula taa ṉado, ma ana do ni foa la uria abula taa la, e sorea kwae lana abula taa la i see imole: 4Fasi si ṉata fifi kokoto ana ṉa lo kai mamana ani kulu, na kulu abula sulia see imole e ai, sulia tha Spirit. 5Sulaania toa na kera abula sulia see imole keka onotoona si do see imole ki; ma toa na kera abula sulia tha Spirit keka onotoona si do tha Spirit ki. 6Uria na manatana see imole na ṉa maea; manatana tha Spirit na ṉa marukia ma enenoa: 7Sulaania manatana see imole e to ni firu la bia tha God; uria ne ai si roo sulia ṉa lo tha God, ka dora bana ania roo la sulia: 8Ma toa eki ana see imole kera dora ania faalea lana tha God. 9Ma ni kamulua do ana see imole e ai, do atha Spirit, mada sa Spirit tha God ni ani kamulua. Ma mada sa Spirit tha Christ ka ai faisia ta wane, wane eri do nia e ai dodoloa. 10Ma mada sa tha Christ ni ani kamulua, see do e mae uria abula taa la; ma sui tha Spirit na ṉa marukia uria kokoto la. 11Ma mada sa Spirit ni nia ne tataea tha Jesus faisia toa mae ki kai to ani kamulua, nia ne tataea tha Christ faisia toa mae ki kai faamarukia lau boo ana Spirit nia ne to ani kamulua seemulua na toto keki mae.
12Mania, doora kera, ta si do e ai si teo, fasi kuki abula sulia see imole i maana: 13Sulaania mada sa muki abula sulia see imole, muki mae e ai si ei boo; ma mada sa atha Spirit muki faamaea abula lana see imole, muki maruki boo. 14Sulaania toa eki sui boo na Spirit tha God ka talaida, kaluwane tha God ki na ni kera. 15Uria ne ai musi ṉalia lau spirit ne suuwai kamulua muka tona ra, na do ana mau la; mulu ṉalia boo tha Spirit ana thathagoni lamulua la isana muki kaluwane nia ki, tha Spirit ne adea na kuka ’ai una eri, Aba, Maka ae. 16Tha Spirit talani nia ka faamamanea bia spirit kulu si do nia thaitoomana, na kulu wela tha God ki: 17Ma mada sa kulu wela nia ki, kuki ṉalia lau boo ta si asi do nia ki; kuki ṉalia ta si asi do tha God ki, ma kuki ṉalia ofu bia tha Christ; mada sa kuki to ana taa la ofu bi nia, fasi keki faainoto kulu ofu lau boo bi nia.
18Uria manataku na taa la eki na kulu to ania asi maṉa eri na tonee do na kesi toolaṉania bia inotoa na toto keki fatai nia uri kulu. 19Sulaania manatatoo ṉado la, na si do ki sui bana na kera thauwai nia ka manatatoo ṉado faamau ania, ka maakwalia fatai lana kaluwane tha God ki. 20Sulaania kera alua si do eki sui bana na kera thauwai nia ka roo sulia si do ne ai si kwaiadomi, uria ne tala thathamia e ai, uri nia ne alua ka roo sulia, ana manatatoo ṉado la uria si do eri, 21Na keki faamarukia lau boo si do eki na kera thauwai nia faisia roo la sulia si do na toto kai fufura, kai tonee to ana inotoa wela tha God ki. 22Sulaania kulu thaitoomana si do eki sui bana na kera thauwai nia ka to ofu ana kwai baita la ma fiwela la ka fula asi maṉa eri. 23Ma talifilia si do eki e ai, ni kulu lau boo, na kulu rikia naa foee do totonao na tha Spirit, ni kulu mena kulu kwai baita i ruruukulua, si maṉa kulu maakwalia thathagoni la eri na keki thathagoni kulu mania kuki wela nia ki, si maṉa ana tae la faisia seekulua neri. 24Sulaania kera faamaruki kulu maana manatatoo ṉado la eri na kulu manatatoo ṉado ania: ma si do na kera manatatoo ṉado uria, toto rikia naa, kesi manatatoo lau uria: uria ni tei na kai manatatoo ṉado uria si do ne rikia naa? 25Ma mada sa kuki manatatoo ṉado uria si do ne ai kusi rikia u, kuki maakwalia si do eri asi lio ni susuu la.
26Ka ’uria lau boo tha Spirit kai adomia feda lakulua: sulaania e ai kusi thaitoomana foa la ne kokoto; tha Spirit ana talani nia kai lae isatha God uri kulu ana kwai baita la sulia si do na kera dora ania ṉata la sulidaki; 27Ma nia na ka rofe i la rurui imole ka thaitoomana manatana tha Spirit, sulaania e lae isana uria toa abu ki sulia si do na tha God e thathamia. 28Ma kulu thaitoomana na si do ki sui bana ka ra ofu uria lea la ifana toa na kera liothau atha God, toa eki na kera ailida mai sulia si do manatana e thathamii ilia. 29Sulaania toa ne thaitoomana totonao si do na keki ilia, toa eki manatana e sorea lau boo totonao keki ’uria nuna Kaluwane nia, fasi nia kai ulunao ana baree wai doorana oro ki: 30Ma toa na manatana e una eri totonao sulida, e ailida lau bomai: ma toa ne ailida mai, e ala lau boo fafia kokoto lada: ma toa ne ala fafia kokoto lada, e faainotoda lau boo.
31Sui si ta na kuki sorea sulia si do eki? Mada sa tha God kai adomi kulu, ni tei na kai maalimae iakulua? 32Nia ne ai si suusia taa la faisia Kaluwane nia i talaana, me alamatania uri kulu sui, e ai si tona falea bana si do ki sui bana iakulua bi nia? 33Ni tei na kai alaṉia ta si do ana toa na tha God e fili kulu? Tha God ana ka ala fafia kokoto lakulua; 34Ni tei na kai sorea kwae lakulua? Tha Christ ana e mae, iu, kera tataea boo faisia toa mae ki, ka to bana ana aba aola tha God, ma kai lae lau boo isana uri kulu. 35Ni tei na kai alu kulu kuki to eeta faisia liothau la tha Christ? to la ana taa la neri, mado fualaṉa, mado tona ilamatai la, mado thaofa, mado karaṉii talu la, mado to la karaṉia maea, mado nini ni firu?
36’Uria si do na kera keda,
Uri oe kera thauṉi kamilia ta si kadee maṉa si ei;
Manatada na kamilia aini sifi uria thauṉi lamilia la.
37E ai, si kulu e tatha faamau fafia si do eki sui boo uria Wane eri ne liothau ani kulu. 38Sulaania nau ku thaitoomana boo si do eri, ṉa maca e ai, mado ṉa marukia, mado aini angel ki, mado si do inoto ki, mado si do sukwai ki, mado si do ana to lakulua maṉa eri ki, mado si do ni u ki mai, 39Mado si do na kai fane da ia, mado si do na kai sifo ladoa, mado atona bana ta si do lau asi do na kera thauwanidaki, si talaana alu lakulua la kuki to eeta faisia liothau la tha God na ni atha Christ Jesus na Lord kulu.
Currently Selected:
Roma 8: MLU1949
Highlight
Share
Compare
Copy
Want to have your highlights saved across all your devices? Sign up or sign in
British and Foreign Bible Society 1949, 1951
