Roma 9
9
1Nau ku ṉata mamana atha Christ, e ai kwasi lole, manataku kai faamamanea ofu bi nau si do ne thaitoomana suli nau atha Spirit Abu, 2Na nau ku liodila faamau neri, ma ruruuku e fi ta si maṉa si ei. 3Sulaania ku thathamia sa keka alua taa la kai to fafi nau i talaaku kwa eeta faisia tha Christ uria dooraku kera, ina laku kera ana see imole: 4Na kera kwalafa tha Isirela; na si do kera ki na ṉa thathagoni lada la eri keki wela tha God ki, ma ṉa inotoa, ma alaofua ba ki, ma ṉa fale la na kera falea ana ṉa lo, ma ṉa ra ifatha God, ma alaṉaia ba ki; 5Na maka ba inao ki na ṉa maka kera ki, ma Wane iada ana see imole na tha Christ, ne inoto fafia si do ki sui bana, na God na keka taṉoa toto si sui. Emeni. 6Ma si baea ba tha God do kesi faaaia. Sulaania toa eki sui boo e ai ne ita mai ana Isirela, na kera toa Isirela: 7Ma kwalafa tha Aberahamo ni sui bana na kera wela nia ki inunufana, ka ai lau boo. Tha Aisaka ana na keki alaṉia kwalafa oe ana thatana. 8Ma toolaṉai lana si do eri neri, baree wela ana see imole e ai na kera baree wela tha God ki; kera alua baree wela ana alaṉaia eri ifana ana kwalafa nia. 9Uria si baea ana alaṉaia neri, Asi maṉa una eri lau boo afa ṉali lo mai nau kwai lae mai, ma ni Sera kai tharea ta wela wane. 10Ma talitoona bana si do eri e ai; si maṉa ni Rebeka lau boo e to ana wela na ba ana tee nonii wane, na maka kamilia tha Aisaka — 11Uria si maṉa na wela eki kesi futa u mai, ma kesi ilia u si do ne lea mado si do ne taa, fasi si do eri na manatana tha God e thathamii ilia sulia fili la kai ṉado, asi ra ki e ai, ani nia na ka ailia mai. 12Kera soree isana kini eri, Ulunao kai ra ifana ai buri. 13’Uria si do na kera keda, Tha Jekofo ku liothau ania, tha Iso molo ku rikia ka taa.
14Sui si ta na kuki sorea? Si lio ne ai si kokoto ni isatha God? Si do ka ai neri. 15Uria ne soree isatha Mosesi, Nau kwai tatakomia wane eri na nau ku thathamii tatakomia, ma nau kwai takoia wane eri na nau ku thathamii takoia. 16Mania si do eri thafali mai ana wane na ka thathamia e ai, ma ana wane na ka fita ka ai lau boo, atha God na ka kwaitatakomi. 17Sulaania kekeda la abu eri ka soree isatha Fero, Uria si kula eri boo ku tafo oe oki inoto, fasi ani oe kwa fatai nia sukwaia nau, ma fasi keki faaroṉo faladoa ana thataku ana fanua nei iano ni sui bana. 18Mania nia kai tatakomia wane eri ne thathamii tatakomia, ma wane nia e thathamia ruruuna kai sadi, ruruuna wane eri nia kai faasadia.
19Sui oki soree isaku, Uria ta lau ne alaṉi kera ana abula taa la? Uria ni tei na kai suusia si do nia e thathamii ilia? 20E ai, kale ena, oe ni tei fasi oki luua tha God? Si do na kera thauwai nia kai soree isani nia ne thauwai nia, Uria ta no thauwai nau kwa unei? 21Mado wane ni thauwai lana kwadee do ki e ai si ana ana mamako, fasi ana tee kumu eri boo kai ṉalia ta si ana thauwai lana kwadee do na keki fare baita ania, ma ta si ana thauwai lana kwadee do na keki fare faekwa ania? 22Mado e ai tha God, uria ne thathamii fatai nia rakeiria nia, keki thaitoomana sukwaia nia lau boo, e doanita asi lio nia ni doanita tatha la ana kwadee do ana rakeiria ki na kera too fasi keki sui: 23Ma fasi kai adea keki thaitoomana inotoa nia ne baita asia naa ana kwadee do ana tatakomia ki, ne beta totonao maakwalia inotoa, 24Ni kulu neri, ne aili kulu lau bomai, faisia talitoona bana Ju ki e ai, faisia Jenetaele ki lau boo? 25’Uria si do ba ne sorea lau boo i la buka tha Hosea,
Toa eri na toa nau inao mai e ai, toto kwai alaṉia ana toa nau ki;
Ma kini eri ne ai kesi liothau ani nia, nau kwai alaṉia ana kini liliothaua nau.
26Ma lalae mai asi kula na kera soree isada, Kamulua toa nau ki e ai,
Asi kula eri boo toto keki alaṉida ana kaluwane ṉa God ne maruki ki.
27Ma tha Aisaia ka ’ai sulia Isirela, Mada sa kwalafa tha Isirela keka oro mena ’uria lau boo migee one na ni amali, ṉadee toa na ni u isada na toto keki faamarukida: 28Uria nia kai faasuia si ra eri, ma kai adea kai mamana fofoa ana kokoto la: sulaania tha Lord kai ilia si ra eri kai mamana fofoa i fanua nei iano. 29Ma, ’uria si do ba na tha Aisaia e sorea inao,
Mada sa tha Lord ana Omea Baita ki e ai si akwasia ta kwalafa ifakulua,
Kulu ’uria Sodoma, ma kera adea kuki ’uria Gomora.
30Sui si ta na kuki sorea? Si do eri, na Jenetaele ki, ne ai kesi tari buriana kokoto la kera fulatoona bada kokoto la, kokoto la ne lae mai ana fitooa neri: 31Isirela molo, na kera tari buriana lo ana kokoto la, kesi fulatoona lo eri. 32Uria ta? Uria na kesi rofe uria ana fitooa, ’uria bana sa kera rofea asi ra ana ṉa lo ki. Uria na kera taofai kera ana fau ba ana faataofai lana imole; 33’Uria si do na kera keda,
Rikia fasi, kwai alua i Saeno fau ana faataofai lana imole ma gwa kale ni lakwadora la ania:
Ma wane na kai fitoona, sa keka faaseenoni iana e ai.
Currently Selected:
Roma 9: MLU1949
Highlight
Share
Compare
Copy
Want to have your highlights saved across all your devices? Sign up or sign in
British and Foreign Bible Society 1949, 1951
