Rom 14

Ma To hu Manjengi

1Mat hun maɗufal ima fati mulut asus ti to, kan hu lefus ɓur hai ɓurti ambe' ames mayus akat hu amu kwa. 2Fati mulut i ɗeng honus cu ɗamam shak, nin maɗufali ima fati mulut asus ti toot, yis cwai a shukon kyek. 3Maɗufal ima cwaiyan ti shak cwaha, kan kom maɗufal ima wa' cwai ɗamam shak ya kwa. Maɗufal ima cwai shukon kyek, kan lef maɗufal ima cwai cwaha shak ɓur hai kwa, ɓurti DeeƁwe tuu matus. 4Ha awe ima ha lefti ɓur si yere i ɗeng hai ya? Na te mangra ahun fur, shak ɓuri mata ra i dee mawur ames. Ma wa mute mangra, ɓurti Deembai ndok u kinus u te mangra.

5Ɗeng ɗing mwen nin ti ɓin anggum i myani sapa, ɗeng ɗing shak mukonan a ɗama andek. Shak maɗufal ima ben mwen tima ti ɗatus, u te mangra i hai. 6Maɗufal ima ɗing mwen nin ti ti sapa, masi andi ɓa u fa Deembai ngye. Ma cwai ti lo, cu ɓa u fa Deembai ngye, ɓurti fati DeeƁwe palang. Yis ima cu lo kwa, masi andi ɓa u fa Deembai ngye, yis fati DeeƁwe palang. 7Ɓurti ɗeng amukan ma mupwet ti haisus kek kwa, hu ɗeng amukan ma mot ti haisus kek kwa. 8Na ka pwet, ka mupwet wa kyel i Deembai, na ka mot, ka ma mot wa kyel i Deembai. Na ka pwet ahun na ka mot, kan ii Deembai.

9A ɓurti mai, Kristi mot, lukfit ti mupwet, ɓa u te ii Deembai i som ima si mot hu ima si ti mupwet. 10Ha hee? Ami kin ha ɗing ti mafwashi i nusa ya? Ami kin ha kom ti nusa ya ya? Ɓurti shak ka wa mute mangra ta mabel i DeeƁwe, yis amun si kunggul i toti puɓwar ames hai. 11Mata worong,

“ ‘I shiɗat ti mupwet amen,’

Deembai lak,

‘shak fwaran si wa cinggir na mabel amen,

shak alisas si wa ha' ti DeeƁwe fit.’ ”#14:11 Ɗing huni hwak: Ish 45:23.

12Unai, shak a sikani ka wa fati ambe' i mupwet amukan ta mabel i DeeƁwe.

13Ɓurti andi, ka hon lefti ɗiyai ɓur hai. Fo i mandi, ka zan na mulwat nyai, ka wa mute ii afyai i bukat ahun a ɗama i tirim wa kyel i shunukan kwa. 14Fota yis ima mata saa ti Deembai Yeso, i shangi ndere nyai cwa nin ti kaciwa' sapa ti haisut kwa. Na ɗeng zan nyai, ɗama nin mati sapa kwa, ani a ɗingi ames. 15Na ha rafat nusa mulut ya ɓurti aɗeng ma ha cwai, ha dun matɓwet. Kan cwa ima ha cwai te ii fisel ti mufur i nusa ima Kristi mot ɓursus kwa. 16Kan aɗeng ima ha ɗingi a maɗesi ta kyel ama, tehus ii ɗama findel mafwashi ta kyel i shini kwa. 17Ɓurti kaitat i DeeƁwe a findel i cwai hu woi kwa, a findel i mute manderei, mute cala hu jakak saa ti Rin Masapai. 18Ɓurti shak maɗufal ima mas ro i Kristi na fisel moti, ma kinti DeeƁwe ɗat si ɓwi hu ɗufal hwak si ɓwetus.

19Ɓurti andi, ka mas shak aɗeng ima ka wa masi i yes ti mute cala, hu ta' ti ɗamam i cwai ti wei na saa kanti. 20Kan hu nggul ro i DeeƁwe ya ɓurti cwa kwa. Shak cwaha mati sapa, ɗak a mafwashi na ha cu cwa ima ma wa kinti ɗeng bukat. 21Ɓin ɗat ha hon cwai ti lo, hu woti ham i manggɓu', hu masti shak aɗeng ima ma wa kinti nusa u fur.

22Shak aɗeng ima ha fa mwawei i hai, kina na saa asu hu DeeƁwe. Disyo' ma si maɗufal ima fa haisus mafwashi si aɗeng ima te mangra i hai kwa. 23Maɗufal ima mulut asus ti fas i cwai kwa, na cu mas mafwashi ndai, ɓurti cwai amesi ii ta fati mulut kwa. Shak ɗama ima yes ii ta fati mulut kwa a mafwashi.

Currently Selected:

Rom 14: AlisIRonNT

Highlight

Compare

Copy