Rom 15

1Kan ima ka ti njeng ɓa ka ka' agung ti mufur i som ima si to, ɓa kan ka ɓwet hai asikan kwa. 2Shak a sikani ka mas aɗeng ima u kin nusikan ɗat si ɓwi, ɓurti maɗesi ames, ɓa ka ta'us. 3Ɓurti Kristi mas a ɗama i ɗat si ɓwi i haisus kwa, fota ngga' ima si worong, “Se' ima si sya'a fur nasi hai yunti.”#15:3 Ɗing huni hwak: Nak 69:9. 4Shak ɗamam ima si worong ta si ɓele, si worong ɓa u kof kan shangi, ɓa ka ka'ti agung, hu njeng na mulut ima ka wisi ta Worong, ka te ti kintiɓwi.

5Ɓa DeeƁwe ma fati ka'ti agung hu njeng na mulut u fu rin i fut ti hai ta saa yuti, myan ima hun koltifai ti Yeso Kristi, 6ɓa shak asui mulwat amu u te andek, fo amu andek hun fati DeeƁwe ngye, Dee i Deembai amukan Yeso Kristi.

7Mat hun ɗiyai ra apil fota ngga' ima Kristi matu ta ra apil, ɓa hu kin si ha' DeeƁwe fit. 8I laksu, Kristi te ii yere i som Ju ii fo i mwawei i DeeƁwe, ɓa u kof nyai hya kintiɓwi ima fa washash mbayai, 9ɓa Ramam si fa DeeƁwe ngye ɓurti gu'ti ashur ames, fota ngga' ima si worong,

“Ɓurti andi,

i wa ha' ti asum asa fit na saa ti Ramam,

i wa tong ti nakwai wa kyel i asum ama.”#15:9 Ɗing huni hwak: 2Sa 22:50; Nak 18:49.

10Hum nyai,

“A Ramam,

jakak hun akul hu ɗufal ames.”#15:10 Ɗing huni hwak: Muh 32:43.

11Si hum nyai,

“A Ramam shak,

ha' hun asum i Deembai fit,

a alisas shak, ha' hun asum asus fit.”#15:11 Ɗing huni hwak: Nak 117:1.

12Ishaya hwak lak ni,

“Siir i Yese ma wa ɓwirikya,

ma wa muluk fit

u mas kaitat si Ramam hai,

Ramam si wa kinsus ɓwi hai.”#15:12 Ɗing huni hwak: Ish 11:10.

13Mwashi, ɓa DeeƁwe i kintiɓwi u hya hu ti mbai jakak, hu mute i cala, myan ima hun kinti mulut si yis hai, ɓa hu hya ti kintiɓwi yis kukwol ya ti mbaitat i Rin Masapai.

Ro i Pool wa Kyel i Ramam

14A shunun, yin ti haisun i ma nyai, hun ti haisu hu ti maɗesi kyalak, hu ti shangi hwak shak, kol ima hu ndok hu kofti ɗiyai, 15I worong findelal munjengani si ɗamam shini, fota ɓa i hum mbe' sui, ɓurti mal maɗesi ima DeeƁwe fan, 16ɓa i te ii maro i Kristi Yeso wa kyel i Ramam. Yin ro i makocok ma lak ti Muro Maɗesi i DeeƁwe, ɓa Ramam si te ii mal i ngyeshi ima DeeƁwe maat, ima si sapa ya ti Rin Masapai.

17Ɓurti andi, i pati ajin ti Yeso si ro ima i masi wa kyel i DeeƁwe. 18I wa pati ajin ti aɗeng ima Kristi masi ti yin je, yin kofti Ramam fisel i mas ti aɗeng ima DeeƁwe ma ɓweti ti hal ti findelal ima i lakus, hu ɗamam ima i masus, 19ti andok i ɗamam i lum ti fo hu i shok na fo, saa ti andok i Rin. Ta Yerushalima wa Ilirikum, i hya ro i but ti Muro Maɗesi i Kristi shak. 20Ngang i gwyal but Muro Maɗesi i Kristi ta kyel ima wa' si shangus ta, ɓurti kan i cu wei ti ta' tasi mahuhur i ɗeng. 21Fo i mandi, ta ngga' ima si worong ta,

“Som ima si lakus kwa si wa ɗingi,

som ima si hali kwa si wa shangi.”#15:21 Ɗing huni hwak: Ish 52:15.

22Ayis kin si shahun yes kyel amu ngang.

Pool Sinzam Haisus ɓa u wa Rom

23Mwashi i kat ti kyel i ro na ta' moti kwa. Ɓurti wilyal hu wilyal yin cwai ti ra ya ɓa i yes i ɗingu, 24i sinzam haisun ɓa i masi andi, myan ima yin wa Sipen. I kinɓwi i yes too' su myan ima yin musata ti fisel. Takfai tima i hal ɗat si ɓwi i mute akul si hun i myan ndyong, ashang hu bumun ɗak i ka' fisel. 25Mwashi i ma fisel i wa Yerushalima ɓa i kol som musapai mal ames. 26Som i koltifai ta Makidonya hu Akaya si hal ɗat si ɓwi si fa malal i bum ti som i jyel ta saa ti som musapai ta Yerushalima. 27Ɗatus masi andi, ti mwawei a wufer ta kyel ames. Ta ngga' ima Ramam si wis maɗesi i Rin ta kyel i som Ju, tehus hai ii wufer si bum som Ju ti maɗesi i ɗama i ra. 28Myan ima i mbit ro mai, i ɗingi nyai si mat malal mii, i wa yes i ɗingu myan ima yin wa Sipen. 29I shangi na i yes kyel amu, i yes ti maɗesi i Kristi kyalak.

30A shunun, i fwalsu ɓurti Deembai Yeso Kristi amukan hu matɓwet i Rin Masapai, wis hunati saa ti taksan amen hu fwalun DeeƁwe ta. 31Fwal hun ɓa DeeƁwe u re' un ya ta ra i som ima a som koltifai kwa, i kyel ta ta' ti Judya, hu ɓa bum ima i wa ti Yerushalima hwak u wis mumat ta kyel i som sapai. 32A ti andi, ti ɓweti i DeeƁwe, i wa muru kyel amu ti jakak ka lafos tikul. 33Ɓa DeeƁwe ma fati mute i cala u te akul hu hun shak. Aandi.

Currently Selected:

Rom 15: AlisIRonNT

Highlight

Compare

Copy