Rom 13

Fati Hai tasi Kaitat

1A kpang shak ɗufal si fa hai si som i kaitat, ɓurti kaitat ti tyai na kaciwa' DeeƁwe fa kwa. Shak kaitat ima si na a DeeƁwe no'. 2Ɓurti andi, maɗufal ima nggwes i masti aɗeng ima som i kaitat si lak, nggwes ti aɗeng ima DeeƁwe no' ndai. Som ima si masi andi, si dul ti a haisus ɓur hai. 3Ɓurti som ima si mas maɗesi si myan som i kaitat fo kwa, a som ima si mas mafwashi si myanus fo. Na ha ɓweti ha mwen makaitat fo kwa, masa maɗesi ma wa palangsa. 4Ɓurti yis a yere i DeeƁwe ima ma wa masa maɗesi. Na ha mas mafwashi, ha wa myanat, ɓurti awal ames ii gbya' kwa. A yere i DeeƁwe, ma ro i futut ɓa u ndash som i masti mafwashi.

5Ɓurti andi, a kiga' hu fa hai wa kyel i som i kaitat. A ɓurti tital ti futut i DeeƁwe fo kyek kwa, a ɓurti ɓa hu te kaciwa' mafwashi. 6Ayis kin hu talan ti cef i wufen, ɓurti som i kaitat a yarai i DeeƁwe ima si fa myan ames shak si ro i kaitat. 7Tal hun ɗufal shak wufyar ames. Na ii cef i wufen, tal hun, na ii kyel woor, tal hun, na ii fati ngye, fahun ngye, na ii fati mbaitat, fahun mbaitat.

Kof hun Matɓwet Ɓurti Mwen ti Kat Ndyong

8Kan ha kol wufer i ɗama i ɗeng kwa, ii ɓweti ɗiyai je. Ɓurti maɗufal ima ɓwet nusus, hya anggut ndai. 9Anggut ni, “Kan ha mas arak i zuruk kwa, kan ha for ɗeng kwa, kan ha shir shir kwa, kan ha yok kwa,”#13:9 Ɗing huni hwak: Mul 20:13,15-17; Muh 5:17-19; Muh 5:21. hu shak anggum i anggut ima si mata, si nggi' shak si anggut andek moti hai, “Ɓweta ima hu ɗiyai hai fota haisa.”#13:9 Ɗing huni hwak: Koc 19:18. 10Matɓwet ti kyan ima si ɗiyai hai afol kwa. Ɓurti andi, matɓwet a hya ti anggut.

11Mas hun mai, ɓurti hu shang musut i myan ima ka mana mwashi. Myan si ru ɓa hu ɓusho ta arak, ɓurti bum amukan ma anggasi mwashi, ɓin i myan ima ai ka mat mwawei. 12Fo' katndyong i mulang ta, mwen ti katndyong i ɓwai. Ɓurti andi, ka wak ro i maɓing ya, ka ru' ɗam i ɓwol i kweneng. 13Ka mas mute maɗesi, fota mute i kweneng, kaciwa' woti ɗamam met-met hu filal, kaciwa' arak i zuruk, hu masti ɗamam i shusho, kaciwa' shaal, hu nadon. 14Fo i mandi, zan hun mute i Deembai Yeso Kristi fota arom amu, kan hu mas ambe' ima gwel i lo' i maɗufal masi kwa.

Currently Selected:

Rom 13: AlisIRonNT

Highlight

Compare

Copy