At Nafasure 11

Duwak Tagfatuyan

1Ay rodi e nafon angku sik fansukat kata sik suwan, ay kanya nalong angku te, “Alindugi wan ay sukati Diyus bale ay anggan at fagyagoan. Ay tapi yangay at ngay tagseg sanya. 2Ay lag gsukat at faglanuwan sis day bale, anway nafon wa sa sangay taw at yud gafanud sas Diyus. Ay ka fag ngay taw wa ban at rumasras Diyus at mafilian fag fulan, at kadugayan 42k magdanun. 3Ay mon akban sik fagmadaragangun sa ku duwak tagfatuyan, at kadugayan 1,260k menit, laman kanya nanfoyung ku longan. Kadugenya ban kanya gbalukasan saku.”

4Kanya fag duwak tagfatuyan kata duwak kayu ulibu ay kata duwak salung. Kanya fag duwa malindug sis Fun sas fagdaul daga at akbang. 5Ay nus nga sinu at tagamatangan nu gfauri ka fag duwak tagfatuyan, sik afuy malfas siginan at bibig ay matas at ngay fabarangyan. Ay nus nga sinu at tagamatangan nu gfauri ka fag duwak tagfatuyan, katanya fag faran nu gfate. 6Ay ka fag duwak tagfatuyan e fagmadaragangun mafatuwas moyan kaduge gfoyung. Ay e fagmadaragangun yangay gfe taguk sa sangay safa. Ay anggan e fagmadaragangun yangay gfe daylan sas fagdaul daga at taw, nus nga ginain at fakaumsigun.

7Ay nu ntabu wa ban ka fag duwak tagfatuyan nu gfoyung, sik tagfangagat fag mangimut malfas siginans tabyu at yud e bangsi, nanfabarangyan ban ka fag duwak tagfatuyan. Ay ka fag tagfangagat fag mangimut mabo ban ka fag duwak tagfatuyan, ay gfate wan. 8Ay nu nkate wa ban, at bilug mafulidan way ban sisad dalan fulan daul. Ebi sanya fag fulan nu natuktuk at Fun Isus sas salibagan kayu. Ka fag fulan nafafaskudan sas Suduma ay Iptu fag ngay talun. 9Ay tuluk menit ay kalati, fagayu fulan taw sas fagdaul daga tagsadsamanan at ngay fanlong luminggat ban ka fag duwak matean at bilug. Ay wa ban kaumsig gfalibing at matean at bilug. 10Ay ngay taw sas fagdaul daga guseganan sat naatean ka fag duwak taglong. Katvngvdan nu guseganan gfodfonan sat tiba at ngay famanyun, anway inkate wan ka fag duwak taglong tagfatakan dawdaw sas fagdaul daga at ngay taw. 11Ay nu nlangfe wa tuluk menit kalati, Diyus gdog yay nafaleleg ka fag duwak taglong. Ay rodi kanya nlindug. Ay kayu at nalag anya, kalimu dawdaw. 12Ay ka fag duwa nadungug sik longan dawdaw siginans banwa te, “Sakboi ste!” Ay at ngay fabarangyan nalag nu e naurug ka fag duwama sas banwa si sik linyabu. 13Ay ginanya fiya fiya fag lungud daga, nauwigan way sigad. Ay at fasafuluk afud fulan inrasras wan. Ay ginanya 7,000k taw inkate wan siginan at nauwigan. Ay at sawad kalimu dawdaw, ay igseg Diyus sas banwa. 14Inlangfe wan at faduwak fanfauri. Ay amatangani. At fatuluk fanfauri gadasugun wan.

At Fafituk Fagbudyungan

15Ay at fafituk tagfabarita nauyup at fagbudyungan, ay sas banwa e naelongan dawdaw te, “Katsi tam Fun Isus, Diyus at nafili, nanmagurang wa sas fagdaul daga, ay nu gmagurang yud e fakatabuwan.” 16Ay ka fag 24k tagmagurang, at malunggung sat ngay faglunggungan sis Diyus at akbang, namalub ay naseg Diyus te,

17“Gseg ami emu, em Fun em Diyus,

at Tiba Tungud at Madaragang.

O at Diyus siginan ngay ebi ay anggan katsi.

Guseganan ami sa emu, teway madaragang tuwo,

ay gfasigad wo gmagurang.

18At ngay taw sas fagayu talun kadotama dawdaw sa emu.

Ay am fandotaman insure sa anya.

Ay indasug wan at ngay menit,

laman e tumap at ngay kinkate at asalanan,

ay laman e mon sam ngay fanuguwan at natvngvdan,

ay sam ngay taglong, ay sam ngay taw,

ay anggan sas fagayu at takalimu emu,

dewa at madaragang ay at yud madaragang,

ay laman nanfamin ban ngay taw tagfauri tibak taw sas wa daga.”

19Ay rodi Diyus bale sas banwa nluwang at fandingding. Ay sanya sad bale kalag wan sik Fagsuwadan Fatuyanan. Ay nafangkilat, ay natalafun, ay naadgawangan, nafaleleg, ay namoyan yelu.

Currently Selected:

At Nafasure 11: TAWEAST

Highlight

Copy

Compare