At Nafasure 10

Sik Tagfabarita ay sik Fafil Sirut at Mafabilugan

1Ay rodi nalag kyangay sadi yak madaragang fag tagfabarita nu kadaga siginans banwa. Ay kanya sis buknga linyabu, ay e balango sit alfuyu. Ay sit wa mata katvngvd menit nu masulo. Ay at ngay bitis katvngvd sik afuy nu gigang. 2Ay kanya gbitbitanan sik fafil sirut mafarafadan. Ay at siyun fag darafa gsiyad sis dagat ay at wala fag darafa gsiyad sis daga. 3Ay kanya nauro kata sik liyun nu guni dawdaw. Ay nu nauro wan, natalafun way sigad fitu ginan. 4Ay nu natalafun wa fitu ginan, gananrirukun akyama ku nadungug sanya ginan fag fituk talafun, ay roro nadungug aw sik longan siginans banwa te, “Agi yap griruk, ay agi yap gfoyung am nadungug sanya ginan fag fituk talafun at longan.”

5Ay ka fag tagfabarita ku nalag at malindug tagsiyad sad dagat ay sis daga, gfaturuk at siyun fag take sas banwa. 6Ay kanya nafatvngvd at longan sas Diyus, at tagleleg faggugat faggugat, ay at naawat banwa ay daga, ay fagayu tagsanya, ay anggan dagat ay fagayu tagsanya. Kanya nalong te, “Wa ban glugo sirut, 7teway gina ban at fafituk tagfabarita muyup at fagbudyungan, umgurungan wa ban fiya Diyus at masuksukan fag fasadan, kata at longan ebi ebi sat ngay fanuguwan fag ngay taglong.”

8Ay ku nadungug fag elongan siginans banwa, nalong yangay angku te, “Loi wan sa ka fag tagfabarita at malindug tagsiyad sad dagat ay sis daga, ay buli wan ka fag fafil sirut at mafarafadan sit daluwap.” 9Nu katanya, inkakbang aw sanya fag tagfabarita, ay nalong aw anya te, “Foni wa angku ka fag fafil sirut.” Ay kanya nabalus angku te, “Na, buli wan ay oni. Ay nu naamsak wo, matamis tuwa sam bibig katvngvd sik deut, ay roro nu natulun wo gfasait way am ungdan.” 10Ay nabul akwa fiya ka fag fafil sirut sit daluwap. Ay naon kwan. Ay nu naamsak akwan, matamis sa ku bibig katvngvd sik deut. Ay nu natulun kwan, kadvk akway ku ungdan.

11Ay e nalong angku te, “Dogi yangay foyungi at kumdasug ban sas fagayu fulan taw sas fagdaul daga tagsadsamanan at ngay fanlong.”

Currently Selected:

At Nafasure 10: TAWEAST

Highlight

Copy

Compare