At Nafasure 12

Sik Mangena ay sik Yaw Daul

1Ay rodi, e sik madulawan insure sas banwa. Nalag aw sik mangena gbalukasan tam menit, ay malindug si tam magdanun, ay igsangboan labi duwak galeme. 2Ay kanya gfafiyon, ay garingang dawdaw katvngvdan nu gatakan ay kasait gfasalug.

3Ay e sadi yak madulawan sis banwa, sik yaw daul maraska. Fitu at alfuyu ay safulu at sunge. Ay fagayu at alfuyu e sangbo, kata sik fun at sangbo. 4Ay at iyug nairus at fatuluk afud galeme sis banwa ay naukas sas daga. Ay kanya fag yaw maturuk sa ka fag mangena tagafasalugun at akbang, laman tumulun ka fag ngenge tagasalugun. 5Ay ka fag mangena nafasalug wa fiya, at ngenge sik ama. Ay roro e nabul wan at ngenge ay nataban wa sas Diyus sat faglunggungan. Kanya tagmagurang ban sas fagayu talun. Ay gina ban igmagurang, at famalang ban sik bakal. 6Ay ka fag mangena nalagyu wan sas talun at yud e taw. Ay sanya fag talun Diyus at nafamasadan ebi ataw sa anya, laman kaduge sanya gtarabang yay anya 1,260k menit.

7Ay rodi, e gbarangyan wa sas banwa. Migil ay at ngay ufud fag ngay tagfabarita nafabarangyan ka fag yaw daul. Ay ka fag yaw daul ay anggan at ngay fanuguwan fag tagfabarita, nafabarangyan yangay anya. 8Ay ka fag yaw daul ay anggan at ngay fanuguwan nalabawan wan, ay naayan wan siginans banwa. 9Ay e naukas wa anya siginans banwa. Kanya ebi yay taguna fag yaw daul. Ay at ngayan tiba, Satanas ay ate Tagfansalag. Kanya faggugat tagfanluk sas fagdaul daga at taw. Ay katsi e naukas wa ka fag yaw daul ay at ngay fanuguwan sas wa daga.

10Ay rodi nadungug akyangay dawdaw sik longan siginans banwa te, “Katsi ndasug wan tagfalangfe taw. Kanya madaragang tuwa ay igmagurang fagayu. Ay anggan Diyus at Nafili fag Fun igmagurang yangay. Ay e naukas wan ka fag takamuwagan sa tam ngay fadugsay at fagbulun baliwa. Faggugat kanya dan wa kamuwagan sa tam ngay fadugsay at fagbulun baliwa, dewa mamenit ay dewa mayabi, sa tam Diyus at akbang. 11Katsi tam ngay fadugsay nababo wan takamuwagan, anway sas Tupa at taguk, ay sat nafodfoyungan yangay sa tiba. Ay tam ngay fadugsay wa kesug at leleg, dewa e gafateun anya. 12Useganani am, fagayu tagsis banwa. Ay roro e gfauri way ayu, am tagbanwan sas daga ay sad dagat, anway Satanas indasug wa sa ayu. Ay kanya gfandotaman dawdaw, anway nasaful te, wa ban glugo at lungud.”

13Ay ka fag yaw daul nu nasaful wa te, e naukas wa anya sas daga, kanya matarung nu naalo ka fag mangena, ebi at nangenge sik ama. 14Ay e nafon sanya fag mangena duwak fakfak kata sik biyo dawdaw, laman kanya lumayug siginan ka fag yaw daul, ay laman umdasug sas talun at yud e taw. Ay sanya e gtarabang tuwa anya tuluk banwa kalati. 15Ay ka fag yaw daul naulub sik safa daul siginan at bibig sa ka fag mangena baliwa laman falimus anya. 16Ay roro daga natarabang ka fag mangena, teway inkaldi ayu daw daga ay nasutsut ka fag yaw daul naulub fag safa. 17Ay ka fag yaw daul inkugat yay nu kadotama sa ka fag mangena. Ay kanya nalo wan laman nanfabarangyan ka fag mangena at kadagdagan at sawad, at masuwad te, fagayu tagfaning Diyus at ngay suguwan ay tagfoyung Isus at fagbulun. 18Ay ka fag yaw daul inturuk sas tigyangan dagat.

Currently Selected:

At Nafasure 12: TAWEAST

Highlight

Copy

Compare