Filipus 1

Pablu Longan at Famasigad at Rirukan

1Tuy fag rirukan siginan angku, Pablu. Ay kaduge aw kawat tuy fag rirukan, e ufud aktuwa, tam usama Timutiyu. Ay ami fagduwa, tam Fun Isus ami at fanuguwan.

Ku fagfadasugan tuy fag rirukan, sa ayu ku ngay fadugsay sas fulan Filipus. Sa ku ngay ibama tagmagurang at ngay tagafanud sanya fag fulan, ay sat ngay tagtarabang, ay anggan sa tibak tagafanud sanya mandi fag fulan. Sanya nu gfadasug aw ku rirukan. Fagayu am, tam Diyus wam at ngay taw, teway insadi tuwam sa tam Fun Isus.

2Igdarangin aw sa tam Diyus, tam Tama, ay sa tam Fun Isus, tam Fagsegan. Igdarangin aw te, laman kanya falag tuwa nu kafanyu ayu, ay fanabayan tuwa ayu.

Pablu at Fagusegananun sas Taw Filipus Baliwa

3Ku ngay fadugsay, kayu ginan aw gamatangan ayu, guseganan aktuwa sa tam Diyus. 4Ay igdarangin aktuwa gugat fagayu tagafanud sanya si ay fulan. Ay kayu ginan aw igdarangin ayu, guseganan aktuwa. 5Siginan ngay am bagu gafanud, ay anggan katsi, gtarabangan tuwa tam gugat igfarapyag at Masine fag Barita sa sangay taw. Kanya tagfauseganan angku.

6Ay ebi tam Diyus, nafasigad nu gfaamatanganan ayu sat masine baliwa. Ay gsaful kway te, tam Diyus ban igfaugat tuwa gugat gugat nu gfaamatanganan ayu sat masine, yap ngay tam Fun Isus indasug ste swa daga. Ay ginanya long ban, tam Diyus, nafasine wa fiya fiya antam.

7Ku ngay fadugsay, guseganan aw dawdaw sa ayu kayu ginan aw gamatangan ayu. Igtungul tuwa nu guseganan aw dawdaw, teway kesug aw ayu.

Ay at sadi ya, tagfauseganan angku, teway igtarabang tuwam gugat angku, laman mafagurungan aktuwa tam Diyus at fon angku fag fagbulun. Teway tam Diyus nafon tuwa angku ku fagbulun, laman nanfayamag aw sa sangay taw te gurungan wa fiya at Masine fag Barita, ay nanfasaful akyangay sa sangay taw tagafayudun. Ay dewa aw masungsungan katsi, tunglusanan tuwa gugat nu gtarabangan tam. Katanya fagmasonun nu guseganan aw ayu.

8Ay tam Diyus saful wa te, gyalagun kwa fiya ayu. Ay kesug kwa fiya ayu, teway tam Fun Isus tuwa tagfaamatanganan angku.

Pablu at Darangin sas Taw Filipus Baliwa

9Ku ngay fadugsay, igdarangin aw ayu sa tam Diyus te, laman ginkugatan tuwa nu an am kesug ay iba. Ay laman kaugat yangay nu gsaful am tam Diyus. Ay gdarangin kyangay te, laman tam Diyus igfon ayu fagsafulun, laman gtoglag tuwam at masine ay at mauri. 10Fakatanyaun ku darangin, laman sumaful tuwam igfili at masine fiya fiya fag fagbulun. Ay nu katanya tuwa, gina ban tam Fun Isus indasug, masine wa long dawdaw ay ugali, ay wa long ban e gfayud ayu, 11teway ngayu tuwa ay nafagbulun at masine. Fakatanyaun ay fagbulun, tam Fun Isus tuwa tagfaamatanganan ayu. Ay nu katanya tuwa ay fagbulun, at ngay taw ayuwayu igfauseganan yangay tam Diyus. Ay lumong wa long ban ayuwayu te, tam Diyus masine wa fiya, ay madaragang wa fiya.

Tam Fun Isus Fanlongan Tunglusanan tuwa nu Karapyag

12Ku ngay fadugsay, igfoyung aw ayu takagurungan ste si emi baliwa, te, siginan aw insungsung, roro kaugat tuwa nu karapyag at Masine fag Barita sa sangay taw. 13Ay anggan fun daul at ngay sundalu nasaful wa te, ku faginsungsungun ay, igfoyung aw sa tam Fun Isus baliwa. Ay anggan at ngay taw sa ku ngaba dayu, nasaful yangay.

14Ay tiba tam ngay fadugsay iste, nu nalag te masungsungan akway, namatangan wa ayuwayu te, “Katsi itam wa ngaro tagfarapyag Masine fag Barita.” Ay katsi, igfoyung wa fiya Masine fag Barita. Madaragang tuwa nu kamoyung. Di kalimu, teway fakatanyaun, tam Fun wan at nafabitsug at ngay amatanganan.

15-17At ngay taw nu gfamoyung, roro wa kata at sadi at ngay amatanganan. Tiba, kafanyu tuwa angku. Gamatangan tuwa te, “Katsi tam Pablu masungsungan way. Ay roro fakatanyaun, teway tam Pablu igfagbulun tuwa tam Diyus fon anya fag fagbulun. Igfayamag tuwa te, gurungan wa fiya at Masine fag Barita. Katanya way at faginsungsungun. Ay nu katanya katsi, itam, gfatunglus tuwa tam tam Pablu fagbulun.” Katanya tuwa tiba, at ngay taw amatanganan. Masine tuwa. Ay roro tibak taw, ebi ginan, galabian way dawdaw nu gfamoyung aw. Kanya gafaabatun way dawdaw anya mandi. Wa gurunganan igfaning Diyus. Iglong te, “Katsi long, itam wan tagfarapyag at Masine fag Barita, laman ro Pablu malabian dawdaw antam.” Katanya way tibak taw amatanganan nu gfamoyung.

18Roro dewa katanya at ngay taw amatanganan, we masuwad sa angku. Dewa at masine, ay dewa at yud masine, at mafanud sa angku, e gfamoyung tuwa sa tam Fun Isus baliwa. Ay kanya tuwa ku fagusegananun fiya fiya.

Katsi dewa aw gatakan, tunglus tuwa nu guseganan aw, 19teway roro ngap dewa aw gatakan, tam Diyus e fasadan tuwa nanbul angku sanya ginan. Gsaful kwa te, am, igdarangin tuwam gugat angku, ay tam Fun Isus, nafatsi tuwa angku at Masine fag Falad, laman gufud tuwa gugat angku. Ay nu katanya, gafanud aw te, tam Diyus gbul wa ban fiya angku siginan ku natakan.

Masine tuwa sas Pablu, Dewa Gleleg ay Dewa Inkate

20Ku ngay fadugsay, ebi ginan, dakdi kalimu igfaning tam Fun. Ay katsi igfanseg aw fiya fiya te, tunglus tuwa ban nu gyud aw kalimu. Dakdi ban nangus e nafagbulun mapla sa tam Fun. Ay dewa te, umkate kwan, ay dewa te, igleleg kyay, ku ngay nafagbulun wan tagfasaful, te, tam Fun Isus madaragang wa fiya.

21Ay nu gtunglus tuwa nu gleleg aw, tunglusanan yangay nu gfagurungan aw tam Fun Isus at ngay fasadan. Ay glabi yay siring kamasine, nu mkate kwan, teway suma kwa tam Fun at day tigyangan. 22-23Ay roro, gamatangan kyangay te, nu gleleg kyay, tunglusanan yadi nu gfagbulun aw tam Fun Isus at ngay fagbulun. Ay kanya fag ngay fagbulun mafanambagun tuwa.

Nu aw way, we mangafili fagduwa ku amatanganan. Fagduwa kaumsig aktuwa. Ay nu si angku way ro mandi ku naumsigan, satu ro, kaumsig kwa glo ste ginan swa daga. Kaumsig kwa nangaful sa tam Fun Isus, teway kanya wan taglabi nu masine. 24-25Ay dewa katanya, nu glag aw ayu, gatarabangan yay am. Ay nu katanya, intuyan aw te, tam Fun Isus ya ro gbul angku, laman ro gtunglus yay nu gtarabang aw ayu. Nanfatvngvd kyay nu gafanud am sa tam Fun Isus, laman ban kaugat yay nu guseganan am sa anya.

26Ay nu nalfas akdi ste ginans bale sungsungan, nanlag akyay ayu. Ay nu lumadlagan wa ro tam, igsaful aw te, igbiya wa long ro dawdaw ay fagusegananun sa tam Fun Isus. Teway tam Fun Isus at nafagbulun sa angku at namasine wa dawdaw.

Dewas Nga Setaw Takadasug sa Antam, Fatvngvdi tuwa Tam Amatanganan

27Ku fagalongun fiya fiya sa ayu, nu gafanud watam at Masine fag Barita, te tam Fun Isus nafalangfe tuwa antam, fasurei tuwa si tam leleganan, te, itam wa fiya at nafalangfe fag ngay taw. Ay nu katanya tuwa ay fagbulun, dewa tam gyayuwan, dumungug aktuwa. Ay gina ban aw umdasug sanya si ayu, lumag aktuwa ay fagbulun, te, masadi tuwam, ay matvngvd tuwam. Ay igtarabangan tuwam igfamoyung sat yud gafanud te, “Afanudi tuwa at Masine fag Barita.”

28Ay tibak taw dewa igfaaringangan ayu, kalimata at Masine fag Barita, dangay am kalimu, nus di sirut. Teway, nu gdi am kalimu, kata wam igfasaful sanya fag ngay taw te, si anya at fakadasugan sas faurianan way. Ay kata yangay am igfasaful te, am, umlangfe wam fiya, teway tam Diyus wan tam tagfalangfe.

29Ebi, tam Diyus infanyu tuway antam, nafon antam sik lungud, laman gafanud tam sa tam Fun Isus. Ay katsi, gafanud watam fiya. Ay tam Diyus gtunglus tuway nu kafanyu antam, nafon yangay antam sik lungud. Ay roro kanya mangaro fag lungud, igfadasug way mangaro sa antam sik ngay mataka. Roro fakatanyaun tam Diyus at fagbulun sa antam, kaduge tam igbaris kanya fag ngay mataka, igfalag tam sa sangay taw te, itam wa fiya tam Fun Isus at ngay taw.

30Ebi, nalag wam nu gatakan aw. Ay anggan katsi, nadungug yangay am te, gatakan kyay fiya. Ay katsi, anggan am gatakan yangay am kata angku.

Currently Selected:

Filipus 1: TAWEAST

Highlight

Copy

Compare