Filipus 2

Faningi ay Fababauni Kata Tam Fun Isus

1Ku ngay fadugsay, tam Fun Isus igfatvngvd tam ngay amatanganan, teway insadi tuwa tam sa anya. Ay igfanabayan tuwa tam ngay amatanganan, teway kanya kesug tuwa gugat antam. Ay kanya kafanyu tuwa dawdaw antam, ay gimalu fiya fiya antam. Ay at Masine fag Falad, gufud tuwa gugat antam. Katvngvd tuwa anya tam Fun Isus ay Masine fag Falad nu gtarabang antam.

2Ay nu katanya, masadii tuwa dawdaw. Ay edkesugani tuwa, ay masinei tuwa fiya fiya nu gudgufudan am. Teway nu katanya tuwa ay fagbulun, mason way ngap nu guseganan aw.

3Dewa gina, lag e fasadan nanfaabatun ayu mandi. Ay lag e fasadan nanfandaragang. Ani tuwa fababauni. Amatangani tuwa te, am iba iglabi tuwa emu. 4Lag gamatangan te, “Tain manga nu mafabul aw si angku ku naumsigan?” Ay amatanganan, ani tuwa te, “Tain manga nu mafafatarabang aw ku iba?”

5Ay ay amatanganan, fakatai tuwa si tam Fun Isus at amatanganan. 6Tam Fun Isus, kanya wan tam Diyus. Kanya wan taglabi fagayu fagayu, teway kanya wan ay tam Diyus. Ay dewa katanya, di nke amatanganan, te, “Awi tuwa gugat taglabi fagayu fagayu.” 7Fangkabat nafababaun tuwa anya, ay insik taw. Katanya at nafagbulun, kata sik fun, naubun at fagmadaragangun ay insik fanuguwan.

8Ay roro, tam Fun Isus dewa insik taw, ya ntabu nu gfababaun. Nafabayan yay at ngay taw nu gfate anya. Ay at faran nu gfate anya sik mapla wa dawdaw. Nafaku anya sas salibagan kayu, ay nafabayan wa sanya anggan wa inkate. Katvngvd anya, tam Fun Isus nu gfaning tam Diyus fasadan.

9Tam Fun Isus nafababaun tuway anya, tam Diyus nafaabat dawdaw anya, laman ro we mafafasud tam Fun Isus. Ay tam Diyus nalong anya te, “O wan at Fun taglabi fagayu.” 10Fakatanyaun tam Diyus nafagbulun, laman ban fagayu taw ay fagayu falad nanfauseganan wa ban dawdaw sas Isus. Dewa tagsis banwa, ay dewa tagbanwan ste swa daga, ay dewa at ngay matean, kanya nanfauseganan yangay ban dawdaw sa tam Fun Isus. 11Ay kanya fagayu lumong te tam Fun Isus wa fiya at matuyan fag Fagsegan. Nu katanya, fagayu ban fauseganan watam Diyus, tam Tama.

12Ku ngay fagwes, nasaful watam te, katvngvd anya tuwa tam Fun Isus nu gfababaun anya, teway igfaning tuwa tam Diyus at fakaumsigun. Anggan itam, faningi yangay kata tam Diyus at fakaumsigun. Gurunganani tuwa, ay maamatanganani tuwa, laman ro fasaful tam sa tam iba te, itam wa fiya tam Fun Isus nafalangfe fag ngay taw.

Ku ngay fagwes, gina aw sanya si ay talun, nalag aw te, igfaning wam fiya tam Diyus. Ay glong aw ayu te, deyud aw sanya katsi, fatunglusi tuwa faningi anya. Ay faugati yap baliwa nu gfaning am. 13Teway tam Diyus tuwa tagfaamatanganan ayu, laman kaumsig tuwam nanfagbulun at masine. Ay kanya yangay tagfafagbulun ayu, laman ay fagbulun masine wa fiya, kata tuwa tam Diyus ngay naumsigan.

Dewas Nga Setaw Takadasug sa Antam, Fatunglusi tuwa Gugat Farapyagi Tam Fun Isus Fanlongan

14Dewa gina, dangay ayuwayu kamalusan, ay dangay ayuwayu garingangan, 15laman ro ay fagbulun at masine tuwa. Antuwa at yud e kafayud, ay at yud e sagbat mauri. Ay dewa te, si ay ngaba dayu, mason wan nu mauri, am dangay gafaningan, teway am, tam Diyus tuwam at unga. Katai tuwa sik ngay galeme nu gdamlag gugat, dewas nga setvngvd nu marum sad yabi. 16Ay fatunglusi tuwa nu gfoyung am at faran laman sik taw umke leleg at yud katabu.

Ay nu katanya tuwa ay fagbulun, e fanambagun wa ro fiya ku ngay nabaris gina aw kamoyung ayu. Ay gina ban tam Fun Isus indasug ste swa daga, am wa ban at sadi ku fagusegananun.

17Katsi, sudan way tam e fagbarisun. Dewa aw, e fagbarisun kway. Ay anggan am, e fagbarisun yangay am, teway ay iba kalimata nu gafanud am sa tam Fun Isus. Ay dewa katanya, guseganan aktuwa, teway kanya fag ngay fagbarisun, kata tam famanyun sa tam Fun Isus. 18Nu katanya, anggan am, useganani yangay dawdaw kata angku, teway igtarabangan tuwa tam igfon tam famanyun sa tam Fun Isus.

Pablu Fagusegananun sas Duwama

19Tam Fun Isus nu kaumsig, nanfasanya aw tam usama Timutiyu, laman nansibo ayu. Ay ku fagsegun, kwa ro gfalugo nu gfalo aw ste ginan. Ay tam usama nu nfoli wa ban, dumungug aw at ngay nafamansulit siginan ayu, ay guseganan kwa long ro dawdaw.

20-21Fagkanyaun tuwa ku fagsuguun sanya sa ayu, teway kanya wan ku ufud tagurungan kesug ayu. Satu ro iste, ngayu tuwa at taw ku fagsuguwan. Ay roro we gfaning tam Fun Isus at fakaumsigun, dasday Timutiyu. At iba igfaning way at fakaumsigun mandi.

22Ay roro tam usama di katanya. Kanya gurunganan tuwa, madyay igfalu tuwa dawdaw angku kaduge aw gfamoyung Masine fag Barita, kata sik sisiyan nu gfalu at magurang nu gfagbulun. 23Katanya, fagkanyaun tuwa ku nafili taglinggat ayu. Ay dewa katanya, katsi, igfanya akyay iste at ngay tagmagurang at fasadan sa angku. Ay nu nasaful kwan, ginanya wan nu gfalo aw tam usama.

24Ay gina ban aw inkalfas ste ginans sungsungan, anggan aw nansibo kyangay ayu. Teway igfanseg aw te, di ban glugo tam Fun nu gfalfas angku.

25Ay katsi ngaro, igfauli akyay tam usama Ipapruditu. Ebi, nafastiye am anya laman tagtarabang angku. Ay guseganan aktuwa dawdaw ay nafastiyean anya. Teway kanya tam usama, sik maseganama tuwa fag taw. Dewa gdalan at ngay mataka, igtarabang tuwa angku nu gfagbulun aw tam Diyus fagbulun. Ay dewa katanya, intuyan aw te, at masine siring, igfauli kwa sanya tam usama.

26-28Ay inbarita wa ro sanya si ayu, te tam usama indaylan way dawdaw. Ay glong aw ayu te, kin, indaylan wa fiya dawdaw tam usama. Tam Diyus nabul wa bangan anya. Ay roro tam Diyus infanyu tuway anya, nafafiya tuwa at daylan. Ay infanyu yangay angku, teway nu nkate way ro tam usama, inkayu yay ro ku nabiyatan.

Tam usama katsi, gyalagun wa dawdaw ayu. Ay gabiyatan wami sa em amatanganan, teway igsaful ami te, gafanawa wa ro am ayuwayu sanya. Ay nu nafauli aktuwa ro sanya, dakdi e nabiyatan sa ku amatanganan. Ay nu nalag wa ro am te nauli tuwa, guseganan yangay ro am dawdaw. Katanya ngaro fagmafaliun nu gfauli aw tam usama.

29-30Ay nu ndasug wa sanya tam usama, fauseganani tuwa anya, ay am useganani yangay dawdaw, teway at sadik tagafanud sa tam Fun indasug yangay sanya si ayu. Ay dangay kalyam at nafagbulun kaduge mafalyuwan. Dewa indaylan dawdaw, laman inkate wa bangan, nafagbulun tuwa tam Fun Isus fagbulun. Di nkesug at leleg. Fangkabat, natarabang tuwa angku kaduge yud am mafatarabang angku. Nu katanya, amatangani tuwa te, tam usama Ipapruditu sik masine tuwa fag fagulitan. Anggan tibak taw at ke ugali kata tam usama, kanya masine yangay ay fagulitan.

Currently Selected:

Filipus 2: TAWEAST

Highlight

Copy

Compare