Efesu 6

Sik Longan sa sangay Sisiyan ay sa sangay Magurang

1Ngay sisiyan, faningi tuwa ay ngay magurang, anway katanya tuwa at matuyan bilang sik tagafanud sa tam Fun. 2“Esugi tuwa ay tama ay ay tina.” Kanya taguna fag suguwan at ke fatuyanan. Katatuy at fatuyanan te,

3“Laman manabayan tuwa ban nu gbanwan o, ay glugo tuwa am leleg ste swa daga.”#6:3 Diyuterunumyu 5:16.

4Ngay mama, lag gfaunatan ay sisiyan. Ay kaduge am daduwa gfadaulan ay sisiyan, fananadi foyungi anya kata tam Fun at ugali ay at foyungan.

Sik Longan sa sik Fanuguwan ay sa sik Fun

5Ngay fanuguwan, faningi tuwa ay fun ste swa daga. Galangi tuwa malimuwani anya. Ay madaragangi tuwa ay fagbulun sa anya, kata nu gfagbulun am sa tam Fun Isus. 6Ay nu gfagbulun am, dangay fagtvngvd gina ay iba glag, laman ay iba gseg ayu. Dewa ay iba yud glag, fatunglusi tuwa nu gfagbulun am masine, anway tam Fun Isus wam at fanuguwan. Ay manga madaragangi nu gfaning am Diyus at fasadan. 7Fasineuni tuwa nu gfagbulun am, kata nu gfagbulun am sa tam Fun Isus, bunwa sas taw. 8Ay nasaful wam te, nus nge wain sik taw at nafagbulun nu masine tuwa, tam Fun gfafoli yangay sa anya, dewa sik fanuguwan ay dewa yud sik fanuguwan.

9Ngay fun, katanya yangay ay fagbulun sa ay ngay fanuguwan. Lag gfalimuwanan ay ngay fanuguwan, anway nasaful wam te, sadi tuwa anggan ayu ay Fun sas banwa. Anway ay Fun sas banwa we filian taw.

At ngay Tagafanud e ngay Famalabag siginans Mauri

10Katatuy ku longan at fakatabuwan sa ayu: Fatunglusi tuwa madaragangi nu gfaning am tam Fun, anway Diyus wan at nafon ayu at fagmadaragangun. 11Suluni kata sik balukas Diyus at nafon ayu fag ngay famalabag, laman e fansalag tuwam sas Satanas takaumsig gfanluk ayu. 12Anway tam fabarangyan bunwa sik taw. Tam fabarangyan anwa at ngay mafurat fag falad sas kiwang, at ngay fun, at ke ngay fagmadaragangun, ay ngay tagmagurang stes fag daga at marum. 13Ay nu katanya, suluni tuwa Diyus at nafon ayu fag ngay famalabag, laman dewa ban mauri at ngay menit, e fansalag tuwam. Ay nu ntabu wa nu gfabarangyan am, matvngvd tuwa gugat nu gafanud am.

14Nu katanya, famasadani fiya fiya. Ay ginawangani at matuyan fag longan ay at fagmatuyanun ay famalabag si ay dubdub. 15Ay suluni ay fatus ay famasadani, laman nanfoyung am at Masine fag Barita tagfon fagmanabayanun. 16Ay faggugat fatsii tuwa ayu ay fagafanudun sas Diyus, anway kanya kata ay famalabag tagdingding ayu, laman mafafalayung tuwam Satanas at fangayon fag ngay busuy at ke afuy sit fungfung. 17Diyus at famalangfe, kata sik famalabag si ay alfuyu. Ay buli ay fiso at Masine fag Falad at nafon ayu. Ka fag fiso at masuwad, Diyus at longan. 18Ay faggugat darangini, anway at Masine fag Falad tagtarabang ayu gina am e fagetun, laman faggugat matagakan tuwam ay maasungatan tuwam. Ay darangini yangay Diyus at ngay taw. 19Ay anggan am, darangini tuwa angku te, laman Diyus gfaamatanganan tuwa angku ku longan. Ay laman dakdi kalimu nu gfoyung aw sas taw at Masine fag Barita at masuksukan. 20Diyus nasugu angku laman nanfoyung aw at Masine fag Barita. Katanya katsi ku fagmasungsunganun. Darangini angku laman maseganama aktuwa nu gfoyung at masine.

Taguyan at Longan

21Nasugu aw tam fakesugun tam fadugsay, Tikiku, sa ayu. Ay kanya sik takamoyung matuyan, tagfaning tam Fun. Ay kanya moyung ban ayu ku banwanan ay ku fagbulun, laman sumaful am te, go setain nu ste aw. 22Katanya ku fagnasuguun anya sa ayu, laman sumaful am te, go setain nu ste ami, ay laman kanya gfatvngvd yay ay ngay amatanganan.

23Tam Diyus tam Tama, ay anggan tam Fun Isus tagfanabayan ayu. Edkesugani ay afanudi tuwa. 24Tam Diyus at mamanyun ayu fagayu, am takesug tam Fun Isus. Katanya tuwa at fakesugun at yud e fakatabuwan.

Currently Selected:

Efesu 6: TAWEAST

Highlight

Copy

Compare