Santiagu 1

Tagriruk ay at ngay Tagtap

1Aw, Santiagu,#1:1 Santiagu: Isus at fadugsay at mafanud. tam Diyus ay tam Fun Isus at fanuguwan at sadi. Griruk aw sa ayu, am tagafanud siginans labi duwak fulan taw Israel, at nasaruwayan sa sangay talun.

Diyus Gtarabang Antam laman Maasungatan tuwa Tam

2Ku ngay fadugsay, useganani tuwa, dewa am gdalan nus nga setaw fag ngay famaskud. 3Teway nasaful wam te, nu gfatunglus tuwam gafanud dewa e famaskud, gananad tuwam gsungatan. 4Nu katanya, sungatani tuwa ngay famaskud, laman umtvngvd am. Nu katanya, matuyan tuwa ay ugali, ay di am e nayudanan.

5Ay nus nga sinu am nu dyay ngayu ay fagsafulun, eti yap sas Diyus. Ay kanya gfon sas fagayu taget anya, ay di gfangalo. 6Ay roro taget, afanudi tuwa ay lag gaduwanun. Teway sik taw nu gaduwanun way, kata way lumbak dagat taginfolian sas tagmara. 7Takatanya fag taw lag gfanseg te, tam Fun mon ban anya at fagetun. 8Teway tagfaduwa at amatanganan, fagayu at fagbulun gfainbalian way.

At Yud E Kwa ay at Mabalan fag Taw

9Nu sik fadugsay tuwo yud e kwa, useganani dawdaw, teway Diyus nafaabat emu. 10Ay nu mabalan tuwo fag fadugsay, useganani tuwa dewa Diyus nafababa emu, teway kata way o sik sariksik umlangke ay malyam. 11Ay gina mason menit nu masugba, ngay makmak umlangke, ay at sariksik mangarabasan wan, ay at fagmasineun malyam wan. Katanya yangay, sik mabalan fag taw, gina gasuwayan at fagbulun ayuwayu, umkate way sigad.

Ngay Famaskud

12Sik taw guseganan nu gsungatan tuwa dewa e ngay famaskud. Teway nu nababo tuwa, tam Fun mamanyun anya leleg at yud e fakatabuwan. Kanya Diyus at fatuyanan sa sangay takesug anya. 13Sik famaskud dewa nadalan emu, lag gamatangan te, “Diyus gfaskud angku.” Teway Diyus di gafaskudan at mauri, ay di gfaskud nus nga sinu. 14Gafaskudan tam nu gaguyudan way tam tam mauri fag fakaumsigun. 15Ay nu gfaning way tam tam fakaumsigun mandi, gfasure asalanan. Ay nu gfatunglus way tam gasalanan, sas fakateun tam fakadasugan.

16Ku fakafanyuun ku ngay fadugsay, dangai am galukan. 17Fagayu at famanyun masine ay kasakan tagsiginan tam Tama sas banwa. Kanya at naawat nus nge wain tagsas banwa tagfon fagmayamagun. Ay dewa fagayu ginbalian kata lanbung nu gadgalinan, tam Diyus di ginbalian. 18Diyus nafon antam leleg. Kanya fag leleg siginan at longan. Ay gsaful tam te, matuyan at longan. Sas fagayu at naawat, itam tuwa at ngay tagafanud at mafanud.

Dungugani ay Fagbuluni

19Ku fakafanyuun ku ngay fadugsay, amatangani: fagayu am mafalii tuwa nu nandungugan am, maadani tuwa nu gelongan, ay lag mafali nu gfangalimata am. 20Sik taw nu kadotama way, wa mafafatarabang anya nu nangugalian sat matuyan. 21Ay nu katanya, ubuni wan fagayu ay fagbulun at mauri, teway mafurat way. Ay fababauni ay faningi Diyus at longan at nafatsi sa ay amatanganan. Teway ka fag longan mafabalabag wa fiya ayu.

22Faningi tuwa Diyus at longan. Ay dangai gdungugan fagtvngvd. Nu gdungugan way am fagtvngvd, gfanluk way am ayu. 23Katatuy way sik taw nu nadungugan way fagtvngvd Diyus at longan, ay way gfaning: Kanya kata way sik taw nu nalinggat anya sasad arirawvn.#1:23 arirawvn: Sis Faniganun, salamin. 24Ay nu nalag wa anya, kanya nalo wan, ay rodi kanya wa namatang anya te, “Go tain aw?” 25Saman tuwa sik taw tagamatangan fiya fiya ay tagfaning sa tagkasakan fag suguwan tagfalfas taw. Kanya fag taw bundi sik tagfangalyam at nadungug, antuwa sik tagfaning. Ay nu katanya tuwa, Diyus mamanyun tuwa ban anya nus nge wain at fagbulun.

26Nu gamatangan o te, “Aw, gfaning aw Diyus,” dewa katanya, nu dway o mabaris nu gelongan at mauri, gfanluk way o emu. 27Tam Diyus tam Tama nu glag, tain at masine nu gseg tam anya? Masine nu gtarabang tuwa tam at ngay burangday#1:27 burangday: Sis Faniganun, balo. fag mangena ay anggan sat ngay ulila nu e nayudanan. Ay masine yangay nu gdi tam galabian ste fagdaul daga at ugali at mafurat. Takatanya fag taw malayun ay matuyan ay di e fasagbatan.

Currently Selected:

Santiagu 1: TAWEAST

Highlight

Copy

Compare