Santiagu 2

Lag e Filian Taw

1Ku ngay fadugsay, nu gurungan tuwam sik tagafanud sa tam Fun Isus at tiba tungud, dangai am e filian taw. 2Kata tenday, e duwak taw indasug sa ay fagmafulun. At sadi sik mabalan ay e ngay fanumyu gintu ay at balukas masine dawdaw. Ay at sadi yud e kwa ay at balukas magiratan way. 3Ay nafalunggung am ka fag taw at masine at balukas sat masine fag faglunggungan. Ay roro nalong am sat yud e kwa te, “Malindugi way ste,” ay ate, “Malunggungi wadi sanya swa salug.” 4Nu katanya way ay fagbulun, e filian way am taw. Nu katanya way ay amatanganan, mauri wam.

5Ku fakafanyuun ku ngay fadugsay, dungugani! Tam Diyus nafili at yud e kwa fag ngay taw ste swa daga. Ay nafabalan ay nafainkugatan sas fagafanudun baliwa. Gsaful am te, Diyus e fagmagurangan at nafatuyanan sas fagayu takesug anya. Ay gfadasug ban sanya at yud e kwa fag ngay taw, go kin? 6Ay roro nu e filian way am taw, wa gtungul ay fagbulun, teway gfaplan way am sat yud e kwa fag taw. Amatangani at mabalan fag ngay taw at fagbulun. Kanya gfatakan way ayu ay gtaban ayu sa sangay tagbuknga at daga salubangan. 7Go wam gsaful te, kanya wa long tagfalingun Isus at ngayan? At ngayan masine tuwa! Ay kanya yangay fag ngayan at nafon sa ayu.

8Masine tuwa ay ugali nu gfaning tuwam tam Fun at suguwan at marirukan sis Diyus at longan te, “Afanyui tuwa am iba katvngvd nu kafanyu o emu.”#2:8 Lebitiku 19:18. 9Ay nu e filian way am taw, gasalanan way am. Ay Diyus glong way te, “Wam gfaning ku suguwan!” 10Teway nus nga sinu fag taw, dewa gfaning fagayu Diyus at longan, nu e nafamabo yay nus di sadik afud, Diyus glong yay te, kanya kata yay kamabo fagayu Diyus at longan. 11Fakatanyaun, Diyus nalong te, lag kamayun. Ay kanya yangay at nalong te, lag gfate. Nu katanya, dewa gyud o kamayun, nu gfate yay o, kamabo yay o Diyus at longan. 12Nu katanya, maamatangani tuwa ay longan ay ay fagbulun, teway at longan at nafalfas antam, kanya yangay ban at nanfasure tam asalanan. 13Umdasug ban sik menit Diyus gfili te, go sinu at fagfauriun ay go sinu at fagfalangfeun. Ginanya ban fag menit, wa ban umfanyu sat yud kafanyu at tiba. Ay roro, Diyus kafanyu tuwa takafanyu at tiba.

Tam Fagafanudun ay Tam Fagbulun

14Ku ngay fadugsay, sik taw dewa glong te, “Gafanud kwan,” go at longan e masuwad tuwa dewa yud e masine fag fagbulun sa tiba? Yaya! Go dewa katanya at fagafanudun mafabalabag tuwa anya? Yaya! 15Tenday, at sadi ay fadugsay, we balukas ay we fakonun. 16Ay am at sadi nalong te, “Loi wan, manabayani tuwa. Fangenbungi ay apsugi tuwa.” Ay dewa o nalong katanya, wo e nafon at fagayudanun sa anya. Go am longan e masuwad? Yaya! 17Katanya yangay fagafanudun: We masuwad nu dway kalag tam fagbulun at masine. 18Labon manga e lumong daw te, “Gafanud aktuwa, ay o masine tuwa am ngay fagbulun.” Katatuy ku famalus: “Nu dway o e nafagbulun at masine, setain nu lumag aw nu gafanud o? Ay roro angku, kalag tuwa ku fagafanudun, teway aw e fagbulun aktuwa at masine.” 19Go gafanud tuwo te, tam Diyus sadi wadi? Masine nu nasaful tuwo! Anggan ngay mafurat fag falad gafanud yangay katanya. Ay matvngvd nu kudkulugan kalimu Diyus. 20At yud way o mamatanganan fag taw! Nu kaumsig o, katsi nanfasaful aw emu at matuyan. Sik taw dewa kata gafanud, ay nu dway e fagbulun at masine, we masuwad. 21Ay amatangani tam fufuwama Abrayam. Diyus nu glag, kanya kata at yud e asalanan, teway at fagbulun gfaning Diyus, go kin? Nalag tam te, katanya gina mafamasadan nanganyun at baguwama Isaak sas fagyagoan anyun. 22Nasaful wo te, Abrayam at fagafanudun e masuwad tuwa, teway e fagbulun tuwa sigon. At fagafanudun ay at fagbulun gdiyuganan tuwa. Ay kasakan wan at fagafanudun teway e fagbulun wan. 23Katanya tuway, in-gurungan at marirukan sis Diyus at longan te, “Abrayam gafanud tuwa sas Diyus. Ay Diyus nu glag, kanya kata at yud e asalanan, teway gafanud tuwa sas Diyus.”#2:23 Fagsigadan 15:6. Ay Diyus nalong tuwa te, “Abrayam ku fagwes.”

24Nu katanya, nasaful watam Diyus at fagnalongun te, we asalanan. Bundi fagtvngvd te, gafanud wan, anggan tuwa sigon sat fagbulun at masine.

25Katanya yangay Rakab. Diyus nu glag, kanya kata tuwa at yud e asalanan. Dewa kanya ebi tagfesali at bilug fag mangena, masine tuwa at nafagbulun gina ngay taw Israel indasug sanya fag talun. Nafasakbo tuwa ka fag ngay masuksuwanan fag taw Israel. Ay anggan nafoyung yangay anya sa tibak dalan laman umlagyu.

26Sik bilug nu dway e falad, kanya nkate wan. Ay katanya yangay anggan tam fagafanudun nu dway e fagbulun at masine, kanya nkate yangay.

Currently Selected:

Santiagu 2: TAWEAST

Highlight

Copy

Compare