Ebriyu 13

Tagfaning Diyus At Ugali

1Fatunglusi tuwa nu kadkafanyuwan am, teway dugsayan tuwam sa tam Fun Isus. 2Ay dangai kalyam nu gfasakbo am ngay betaw. Ebi e nafagbulun wan katanya, ay kanya wa gsaful te, at nafasakbo fag ngay betaw Diyus wa mangaro at ngay tagfabarita. 3Lag kalyam nu kafanyu am at ngay kinsungsung, kata nut sanya yangay am. Ay lag yangay kalyam at kinfaurianan kata yangay nu am at kinfauri.

4Fagayu am, galangi tuwa ay faningi tam ugali sa sik daduwa baliwa. Lag kamayun, laman di e gfafurat si ay ugali. Katanyai teway Diyus igfauri wa ban fiya ngay takamayun ay anggan tagfaning at mauri fag fagalabianun. 5Lag am galabian singku. Useganani wan nus nga seyu ginanya ay fagagbilugun. Fakatanyaun, Diyus wan at nalong te,

“Faggugat kwa kayayu emu,

ay kwa gfabayan emu.”#13:5 Diyuterunumyu 31:6,8.

6Nu katanya, mafalong tuwa tam yud gaduwanun te,

“Ku Fun tagtarabang angku.

Kwa kalimu.

Dewa nus nga setaw taw fagbulun sa angku,

Diyus wa kalyam angku.”#13:6 Danyu 118:6-7.

7Amatangani tuwa ay ngay tagfangguna at nafoyung ayu Diyus at longan. Amatangani at ngay ugali ay faningi at fagafanudun. 8Tam Fun Isus di gbadbalian. Nu setain kanya ebi, katanya yangay anggan katsi ay faggugat ban.

9Lag am gatabanan sa tibak foyungan ay fagyudun batang gdungug. At masine tagfatvngvd tuwa tam fagafanudun siginans Diyus at famanyun, ay bundi nu gfaning tam taw at ugali sas fakonun baliwa. Nu gfaning tam ngay ugali takatanya, we fanambagun.

10Katsi e fagyagoan watam bagu, teway Isus wan tam tagfon anyun. Ay at ngay taganyun tagfagbulun sis Diyus bale wa masine kaful nanfangon sa tam fagyagoan. 11Ebi at fun taganyun nauba taguk siginan at ngay nafate fag balan sa Taglabi nu Mafasamanan fag Silid, laman famalyam asalanan. Ay rodi ka fag ngay balan at bilug nabatas wa sas day fulan. 12Katanya yangay, anggan Isus natakan ay inkate sas day fulan, laman at taguk at famalyam taw asalanan.

13Nu katanya, nangakbang watam sas Isus sas day fulan. Ay sungatani gina e gfalingun antam, kata Isus nu gsungatan gina e gfalingun anya. 14Teway wa ste swa daga tam fagbanwanan taglugo. Gfanya yay tam tagadasugun ban. 15Nu katanya, gseg watam faggugat sas Diyus. Tuy wan tam anyun sas Diyus. Fakatanyaun, teway toglag tuwa tam Isus. 16Ay dangai kalyam nu gfagbulun tam at masine ay nu gtarabang tam tam iba. Fakatanyaun, teway Diyus kaumsig tuwa takatanya fag anyun.

17Faningi tuwa ay ngay tagfangguna ayu. Kanya gfatvngvd ay fagafanudun. Ay kanya nanfamansulit yangay ban sas Diyus sa baliwa nu gfagbulun. Ay nu gfaning tuwam anya, kanya gumsiganan tuwa nu gfagbulun. Ay roro nu dway am gfaning, kanya kabalu way, ay we fanambagun sa ayu.

18Ay darangini tuwemi. Intuyan ami te, wami e nabiyatan sa em amatanganan. Ay em fasadan laman fagayu em ugali matuyan tuwa. 19Ay matvngvd nu glong aw ayu te, darangini, laman mafali nu kafoli aw sa ayu.

At Fakatabuwan fag Darangin

20-21Gina tam Fun Isus inkate, at taguk tagfatvngvd Diyus at fatuyanan at yud e fakatabuwan. Diyus tagfanabayan antam at nafaleleg tam Fun Isus. Ay katsi tam Fun Isus tiba tungud fag tagtanud sat ngay tagafanud, kata sik tagtanud balan at fagbulun. Igdarangin aw sas Diyus te, foni ayu fagayu ay nayudanan, laman mafafaning tuwa ban am at fasadan. Ay kanya nangus fagbuluni sa ayu tagfauseganan tuwa anya. Kanya mafafagbulun wa fiya tuy fagayu, teway tam Fun Isus at nafagbulun kasakan wan. Ay e gseg tuwa ban anya faggugat. Kin, katanyai tuwa.

At Fakatabuwan fag Longan

22Ku ngay fadugsay, matvngvd nu glong aw ayu te, dungugani fiya fiya ku foyungan si ku rirukan tagfatvngvd ay amatanganan, teway wa ngaba ku rirukan. 23Kaumsig kyangay gfasaful sa ayu te, tam fadugsay, Timutiyu e nafalfas wan siginans sungsungan. Ay kanya nu mafali tuwa ban nu kadasug stiye, nantaban ban aw anya gina aw nanlag ayu.

24Ay intoi sa sangay tagfangguna ayu ay sa sangay tagafanud sanya te, “Go manabayan tuwam?” Ay ngay taw tagstes talun Italya ginto yangay te, “Go manabayan tuwam?” 25Diyus at mamanyun sa ayu fagayu.

Kin, katanyai tuwa.

Currently Selected:

Ebriyu 13: TAWEAST

Highlight

Copy

Compare